ޔޫކްރެއިންގެ މަރިޔުޕޯލް ސިޓީއަށް ހަމަލާ ދިނުން ހުއްޓާލާނީ އެ ތަނުގައި ތިބި ޔޫކްރެއިންގެ ސިފައިން އަމާން ދިނުމުން ކަމަށް ރަޝިއާގެ ރައީސް ލެޑިމިއަ ޕުޓިން ވިދާޅުވެއްޖެ އެވެ.
ޕުޓިން އެގޮތަށް ވިދާޅުވީ އަންގާރަ ދުވަހުގެ ރޭ ފްރާންސްގެ ރައީސް އިމޭނުއެލް މެކްރޯންއާ އެކު ފޯނުން ކުރެއްވި އެއް ގަޑިއިރުގެ މަޝްވަރާގައި ކަމަށް ރަޝިއާ ސަރުކާރުން ނެރުނު ބަޔާނެއްގައި ބުންޏެވެ.
ނަމަވެސް ފްރާންސްގެ އޮފިޝަލުން ވިދާޅުވީ މަޝްވަރާގައި ޕުޓިން އެއްބަސްވެވަޑައިގެންނެވީ މަރިޔުޕޯލް ސިޓީއިން އާއްމުން ބޭރު ކުރެވޭނެ ގޮތްތަކެއް ހަމަޖެއްސުމަށް ކަމަށެވެ.
އެމެރިކާގެ ކުންފުނި، މެކްސާއިން ނަގާފައިވާ ސެޓެލައިޓް ފޮޓޯތަކުން މަރިޔުޕޯލްއަށް ލިބިފައިވާ ގެއްލުންތައް ވަރަށް ބޮޑަށް ފެނެ އެވެ. އެގޮތުން ސިޓީގެ ބައެއް ހިސާބުތަކުގެ އިމާރާތްތައް ވަނީ ބިމާ ހަމަވެފަ އެވެ.
މަރިޔުޕޯލް ސިޓީގައި ތިބި އާއްމުން ރައްކާތެރި ހިސާބަކަށް ގެންދިޔުމުގެ ޕްލޭނެއް ފްރާންސާއި ތުރުކީ އަދި ގްރީސްގެ އިތުރުން އިންސާނީ އެހީދޭ ގްރޫޕްތައް ގުޅިގެން ތައްޔާރުކޮށް، ޕުޓިންއަށް ހުށަހަޅާފައިވެ އެވެ.
ފްރާންސްގެ ރައީސަށް ޕުޓިން ވިދާޅުވީ އެ ޕްލޭނާ މެދު "ވިސްނަވާނެ" ކަމަށެވެ. ނަމަވެސް ރަޝިއާ ސަރުކާރުން ނެރުނު ބަޔާނުގައި ޕުޓިން އެގޮތަށް ވިދާޅުވި ކަމަށް ފާހަގަކޮށްފައެއް ނުވެ އެވެ.
ޔޫކްރެއިނުން ތުހުމަތު ކުރާ ގޮތުގައި ރަޝިއާއިން ދަނީ މަރިޔުޕޯލްގެ އެތައް ހާސް ރައްޔިތުންނެއް ގަދަކަމުން "ރަހީނުކޮށް" ރަޝިއާގެ ހިސާބުތަކަށް ގެންދަމުންނެވެ.
މަރިޔުޕޯލް ސިޓީ ދޫކޮށް ރައްކާތެރި ހިސާބަކަށް ބަދަލުވެފައިވާ މޭޔަރު ވަޑީމް ބޮޔިޗެންކޯ ވިދާޅުވީ މިހާތަނަށް އެ ސިޓީއިން 5000 މީހުން މަރުވެފައިވާ ކަމަށާއި އޭގެ ތެރޭގައި 210 ކުދިން ހިމެނޭ ކަމަށެވެ.
