ސުލްހައިގެ މަޝްވަރާތަކުގައި ދެ ގައުމުގެ އިތުބާރު ބޮޑު ކުރަން، ރަޝިއާއިން ޔޫކްރެއިންގެ ދެ ސަރަހައްދަކަށް ދޭ ހަމަލާތައް މަދު ކުރަން ނިންމައިފި އެވެ.
ރަޝިއާއިން ބުނީ ވެރިރަށް ކިޔެވް ވަށައިގެންވާ ސަރަހައްދާއި އުތުރުގައި އޮންނަ ޗެރްނިހިވް ސިޓީއަށް ދޭ ހަމަލާތައް ވަރަށް ބޮޑަށް މަދު ކުރާނެ ކަމަށެވެ.
ސަލާމަތާ ގުޅުން ހުރި ޔަގީންކަން ދީފި ނަމަ، ޔޫކްރެއިނަކީ "ނިޔުޓްރަލް" ނުވަތަ އަސްކަރީ ގޮތުން ވަކި އަތަކަށް ނުޖެހި އޮންނަ ގައުމަކަށް ހަދަން ޔޫކްރެއިން ސަރުކާރުން ހުށަހަޅާފައިވެ އެވެ.
ފެބްރުއަރީ 24 ވަނަ ދުވަހު ރަޝިއާގެ ސިފައިން ޔޫކްރެއިނަށް އަރައި ހަމަލާ ދޭން ފެށި އެންމެ ބޮޑު ސަބަބަކީ ހުޅަނގުގެ އަސްކަރީ ކޯލިޝަން، ނޭޓޯގެ މެމްބަރުކަން ހޯދަން ޔޫކްރެއިނުން މަސައްކަތް ކުރުމެވެ.
ވެރިރަށް ކިޔެވްގެ ކޮންޓްރޯލް ނުލިބި ގިނަ ދުވަސްވަމުން ދާތީ، މި ހަފްތާގައި ރަޝިއާއިން ބުނީ "އަސްކަރީ އޮޕަރޭޝަނުގެ" ފޯކަސް ބަދަލުކޮށް، އިރުމަތީ ޔޫކްރެއިން "މިނިވަން ކުރަން" އަމާޒު ހިފާފައިވާ ކަމަށެވެ.
އިރުމަތީ ޔޫކްރެއިން ނުވަތަ ޑޮންބަސް ސަރަހައްދުގައި 2014 ވަނަ އަހަރުން ފެށިގެން އޮންނަނީ ޔޫކްރެއިން ސަރުކާރާ ވަކިން އުޅޭ ދެ ގްރޫޕެއްގެ ވެރިކަމެވެ.
ހަނގުރާމަ ފެށުމުގެ ކުރިން، ރަޝިއާއިން ބުނީ އެ ދެ ސަރަހައްދަކީ ވެސް މިނިވަން ދައުލަތްތަކުގެ ގޮތުގައި ބަލައިގަންނަން ނިންމާފައިވާ ކަމަށެވެ.
