އުމުރުން އެންމެ ހަ އަހަރުގެ ކުޑަ އަންހެން ކުއްޖަކަށް އައްޑޫ ސިޓީގައި ޖިންސީ ގޯނާ ކުރި ކަމަށް ތުހުމަތު ކުރާ މައްސަލަ އަވަސްކޮށްދިނުމަށް އައްޑޫ ސިޓީ ކައުންސިލުން ގޮވާލައިފި އެވެ.
ހަ އަހަރުގެ އެ ކުއްޖާއަށް ޖިންސީ ގޯނާ ކުރި ކަމަށް ތުހުމަތު ކުރެވޭ 59 އަހަރުގެ އަންހެނަކު އިއްޔެ ފުލުހުން ވަނީ ހައްޔަރު ކޮށްފަ އެވެ. ނަމަވެސް, އެ ރަށު މީހުން ޖިންސީ ގޯނާގެ ތުހުމަތު ކުރަނީ ކުއްޖާގެ ކާފައަށެވެ. އެކަމަކު ފުލުހުން ވަނީ ހައްޔަރުކުރި މީހާގެ އިތުރުން އެހެން މީހެއްގެ މައްޗަށް ތުހުމަތު ކުރެވޭނެ ހެކި މިހާތަނަށް ނެތް ކަމަށް ބުނެފަ އެވެ.
ހައްޔަރު ކުރީ ކަމާނުބެހޭ މީހެއް ކަމަށް ބުނެ އިއްޔެއިން ފެށިގެން ދަނީ އެ ކުއްޖާގެ ކާފަގެ ގޭ ދޮށުގައި މުޒާހަރާ ކުރަމުންނެވެ.
އެކަމާ ގުޅިގެން އައްޑޫ ކައުންސިލުން މިއަދު ނެރުނު ބަޔާނެއްގައި ބުނީ މި މަހުގެ 23 ވަނަ ދުވަހު އައްޑޫސިޓީގައި ކުޑަކުއްޖަކަށް ޖިންސީ ގޯނާކުރި މައްސަލައާއި ގުޅޭ ހިތަދޫގައި ކުޑަކުއްޖަކަށް ޖިންސީ ގޯނާކުރިކަމުގެ މައްސަލައެއް ފެންމަތިވެ ކައުންސިލްގެ ސަމާލުކަމަށް އައިސްފައިވާ ކަމަށެވެ.
ކުޑަކުދިންނަށް ކުރެވޭ ޖިންސީގޯނާގެ ކުށްތަކަކީ މި ކައުންސިލާއި މުޅި މުޖްތަމައުގެ ކަންބޮޑުވުން އިންތިހާއަށް އޮތް މައްސަލައަކަށްވާތީ، މިފަދަ ކުށްތަކަށް އަރައިގަންނަ ފަރާތްތަކާއި އެކަމުގައި އެކިގޮތްގޮތުން ބައިވެރިވާ ފަރާތްތަކުން ހިންގާ ކަންކަމަކީ ކައުންސިލުން އެއްގޮތަކަށް ވެސް ބަލައިގަންނާނެ އަދި އެކަމަށް ތާއީދުކުރާނެ ކަންކަމެއް ވެސް ނޫން ކަމަށް އެ ކައުންސިލުން ބުންޏެވެ.
އައްޑޫ ސިޓީގެ ރައްޔިތުންގެ މެދުގައި މިހާރު ކަންބޮޑުވުން އޮތް އިސްވެދެންނެވުނު މައްސަލާގައި ދިވެހި ފުލުހުންގެ ހިދުމަތަށާއި ކަމާބެހޭ ފަރާތްތަކުން މިމައްސަލަ ސީރިއަސް މައްސަލައެއްގެ ގޮތުގައި ބައްލަވައި މިކަމުގައި ޝާމިލްވާ އެންމެހާ ފަރާތްތަކުގެ މައްސަލަތައް ވަކިވަކިން ތަހުގީގުކޮށް ދިނުމަށް ވެސް އެ ކައުންސިލުން އެދިފައިވެ އެވެ.
"މުޖުތަމައުގެ ސަލާމަތާއި ރައްކާތެރިކަން ބިނާވެގެންވަނީ އަދުލު އިންސާފު ގާއިމްވެފައި އޮތުމުގެ މައްޗަށް. މިމައްސަލައަކީ ދެއަމާންކަމާއި ސަލާމަތާއި ގުޅިފައިވާ ނާޒުކު މައްސަލައަކަށްވާތީ މި މައްސަލައިގައި އަދުލުއިންސާފު ހޯދައިދިނުން އަވަސްކޮށްދިނުމަށް ދައުލަތުގެ މުވައްސަސާތަކާއި ކަމާއިބެހޭ އެންމެހާ އިދާރާތަކަށް ދަންނަވަން،" ކައުންސިލުން ބުނެފައިވެ އެވެ.
އިއްޔެ މެންދުރުން ފެށިގެން އެ ކުއްޖާގެ ކާފަގެ ގޭގެ ދޮރުމަތީގައި ގިނަ ބަޔަކު އެއްވެ އޭނާ ހައްޔަރުކުރުމަށް ގޮވާލަމުން ދިޔަ އެވެ. ތިން ފުލުހުން އެ ގޭގެ ދޮރުމަރީ ތިބި ނަމަވެސް ކުއްޖާގެ ކާފަ ލަަންކާއަށް ފުރުވާލަން އުޅޭކަމުގެ ތުހުމަތާ އެކު އެ ސަރަހައްދަށް އެއްވާ މީހުން އިތުރުވި އެވެ.
މުޒާހަރާ ކުރި މީހުން އެ ސަރަހައްދުން ދުރަށް ނުދިއުމުން އެންމެ ފަހުން ބާރުގެ ބޭނުންކޮށްގެން އެ މުޒާހަރާ ރޭ ފަތިހު ވަނީ ރޫޅާލާފަ އެވެ. އަދި އެކަކު ވަނީ ހައްޔަރު ވެސް ކޮށްފައި ކަމަށް މައުލޫމާތު ލިބެ އެވެ.
