ލާމަރުކަޒީ އުސޫލު ފުރިހަމައަށް ތަންފީޒުކުރުމަކީ ސަރުކާރުގެ ވައުދެއް ކަމަށް ވިޔަސް، އެ އުސޫލު ތަންފީޒުކޮށް ކައުންސިލްތަކަށް ބާރުތައް ނުދޭކަމަށް ތުހުމަތުކުރައްވައި ރައްޔިތުންގެ މަޖިލީހުގެ އެމްޑީޕީގެ ބައެއް މެމްބަރުންނާއި އިދިކޮޅު ބައެއް މެމްބަރުން މިއަދު ކަންބޮޑުވުން ފާޅުކުރައްވައިފި އެވެ.
ސަރުކާރުގެ ފަރާތުން ދުވާފަރު ދާއިރާގެ އެމްޑީޕީ މެމްބަރު އިސްމާއީލް އަހުމަދު ހުށަހެޅުއްވި ކުންފުނީގެ ބިލުގެ ބަހުސްގައި ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވީ އެ ބިލު ސަރުކާރުން މިހާރު ހުށަހެޅީ ކީއްކުރަންތޯ ސުވާލު އުފެދޭ ކަމަށެވެ. ކައުންސިލްތަކުން ކުންފުނި ހެދުމާ ބެހޭ ބައެއް އެެ ގާނޫނުގައި ހިމަނާފައި އޮތުމުން އެކަމަށް އޭނާ ވަރަށް ބޮޑަށް ފާޑުވިދާޅުވި އެވެ.
ލާމަރުކަޒީ ނިޒާމު ރަނގަޅަށް ތަންފީޒުކުރަން ވައުދުވެގެން އައި ނަމަވެސް ސަރުކާރުން ކުރަނީ ކޮންކަމެއްތޯ ވެސް އޭނާ ސުވާލު ކުރެއްވި އެވެ.
ނައިފަރު ދާއިރާގެ މެމްބަރު އަހުމަދު ޝިޔާމް މަޖިލީހުގެ ޖަލްސާއެއްގައި ވާހަކަދައްކަވަނީ. ކައުންސިލްތަކަށް ބާރު ނުދޭތީ އޭނާ މިއަދު ސަރުކާރަށް ވަރަށް ބޮޑަށް ފާޑުވިދާޅުވި.
"ކޮން ކަމެއްތޯ ކައުންސިލްތަކަށް ކޮށްދެވުނީ؟ މި ބިލުގައި އެބަ އޮތް ކައުންސިލްތަކުން ކުންފުނިތައް ހިންގާ ވާހަކަ. އެއީކީ މި ބިލަށް ގެނެސްގެން ކުރަން ޖެހޭ ކަމެއް ނޫނޭ. އެއީ މިހާރުވެސް ކުރެވިފައި އޮންނަން ޖެހޭ ކަމެއް އިއްޒަތްތެރި ރައީސް،" ޝިޔާމް ވިދާޅުވި އެވެ.
ކައުންސިލްތަކުން ކުންފުނި ހަދައިގެން ވިޔަފާރިކުރުން މަނާނޫން ކަމަށާއި އެހެން ނަމަވެސް މައި ސަރުކާރުގައި ހުރިހާ ބާރުތަކެއް ހިފަހައްޓައިގެން އުޅެނީ ކަމަށް ވެސް އޭނާ ވިދާޅުވި އެވެ. އެހެންވެ ކައުންސިލްތަކުގެ އިހުތިސާސްގެ ތެރޭގައި ހިމެނޭ ބިންތައް ބޭނުން ނުކުރެވެނީ އެހެންވެ ކަމަށް ވެސް އޭނާ ތުހުމަތުކުރެއްވި އެވެ.
"ދެން ލާމަރުކަޒީ ނިޒާމުގެ ވާހަކަ އެމްޑީޕީން ނުދެއްކިއްޔާ މާ ތާހިރުވާނެ،" ޝިޔާމް ވިދާޅުވި އެވެ.
ކައުންސިލްތަކަށް ބާރުތައް ދޫނުކުރާ ކަަމުގެ ހެއްކެއްގެ ގޮތުގައި އޭނާ ދެއްކެވީ ބ. އަތޮޅުގައި ހުރި ބައެއް ފަޅުރައްތަކުގެ ނަފާ އެ އަތޮޅުގެ ކައުންސިލަށް ނުލިބޭތީ މަޖިލީހުގެ ލާމަރުކަޒީ ކޮމިޓީއަށް ހުށަހަޅާފައިވާ ޝަކުވާ އެވެ.
އުނގޫފާރު ދާއިރާގެ އެމްޑީޕީ މެމްބަރު މުހައްމަދު ވަހީދު (ވައްޑޭ) ވެސް ވިދާޅުވީ ކައުންސިލްތަކުން ކުންފުނިތައް ހެދުމުގެ ހުއްދަ މިހާރުވެސް ދެވޭނެ ކަމަށެވެ. ބާރުގަދަ ލާމަރުކަޒީ ނިޒާމެއް ރާއްޖޭގައި ގާއިމްކުރުމަކީ އޭނާ ވިދާޅުވި ގޮތުގައި ރައީސް އިބްރާހީމް މުހައްމަދު ސޯލިހުގެ ރިޔާސީ ވައުދެކެވެ. އެހެން ނަމަވެސް އެ ހުއްދަ ދިނުމާބެހޭ ބައިތަކާއެކު ކުންފުނީގެ ބިލު މަޖިލީހަށް ފޮނުވީ އެމަނިކުފާނުގެ ވެރިކަމުގެ ދައުރުގެ ގާތްގަނޑަކަށް ހަތަރު އަހަރު ދުވަސް ފާއިތުވިފަހުން ކަމަށް ވުމުން ވަހީދު ކަންބޮޑުވުން ފާޅުކުރެއްވި އެވެ.
"މިދިޔަ ހަތަރު އަހަރު ދުވަހުގެ ތެރޭގައި، ހަމަ ކަންބޮޑުވުމާއެކީ އަޅުގަނޑު ފާހަގަކޮށްލަން އަދި ރާއްޖޭގެ އެެއްވެސް ކައުންސިލަކަށް ލޯކަލް އޮތޯރިޓީ ކުންފުންޏެއް ރަޖިސްޓްރީ ކުރިޔަ ނުދީ ހިފަހައްޓާލައިގެން އެ ތިއްބަވަނީ،" ވަހީދު ވިދާޅުވި އެވެ.
ކައުންސިލްތަކުން ކުންފުނިތައް ހެދުމުގެ ހުއްދަ ނުދޭތީ އިކޮނޮމިކް މިނިސްޓަރު ފައްޔާޒް އިސްމާއީލަށް ވެސް އޭނާ ވަރަށް ބޮޑަށް ފާޑުވިދާޅުވި އެވެ.
