މީގެ މަހެއް ކުރިން ރަޝިއާގެ ސިފައިން ޔޫކްރެއިނަށް އަރައި ފެށި ހަނގުރާމައިގެ ސަބަބުން ޔޫކްރެއިންގެ އިގްތިސާދަށް 565 ބިލިއަން ޑޮލަރުގެ ގެއްލުން ލިބިފައިވާ ކަމަށް އަންދާޒާކޮށްފި އެވެ.
އިކޮނޮމީ މިނިސްޓަރު ޔޫލިއާ ސްވިރިޑެންކޯ ފޭސްބުކްގައި ކުރެއްވި ޕޯސްޓެއްގައި ވިދާޅުވީ ގެއްލުމުގެ އަދަދުގެ ތެރޭގައި އިންފްރާސްޓްރަކްޗާ ގެއްލުމާއި، ވިޔަފާރި ހުއްޓުމުން ލިބޭ ގެއްލުން ހިމެނޭ ކަމަށެވެ.
"ކޮންމެ ދުވަހަކު ވެސް ނަންބަރުތައް ދަނީ ބަދަލުވަމުން. ހިތާމައަކީ ކޮންމެ ދުވަހަކު ވެސް ނަންބަރުތައް މަތިވަމުން ދިޔުން،" ޑެޕިއުޓީ ބޮޑު ވަޒީރުކަން ވެސް ކުރައްވާ ސްވިރިޑެންކޯ ވިދާޅުވި އެވެ.
ފެބްރުއަރީ 24 ވަނަ ދުވަހު ފެށި ހަނގުރާމައިގައި ރަޝިއާއިން ބައެއް ސިޓީތަކަށް ދީފައިވާ ވައިގެ ހަމަލާތަކާ ހެދި، ސިޓީތަކުގެ ބައެއް ހިސާބުތަކުގެ އިމާރާތްތައް ވަނީ އެއްކޮށް ބިމާ ހަމަވެފަ އެވެ.
ގެއްލުން ލިބިފައިވާ ޕަބްލިކް އިންފްރާސްޓްރަކްޗާގެ ތެރޭގައި މަގުތަކާއި، ރޭލު ދަގަނޑުތަކާއި އެއާޕޯޓުތައް ހިމެނޭ އިރު، އެ ދާއިރާއިން 119 ބިލިއަން ޑޮލަރުގެ ގެއްލުން ލިބިފައިވާ ކަމަށް ބެލެވެ އެވެ.
ޕްރައިވެޓް މުދަލަށް ލިބޭ ގެއްލުމުގެ ތެރޭގައި ފަރުދުންގެ ގެތައް ހިމެނޭ އިރު، އެ ދާއިރާއިން 90.5 ބިލިއަން ޑޮލަރުގެ ގެއްލުން ލިބިފައިވާ ކަމަށް ބެލެވެ އެވެ.
ޕްރައިވެޓް ކުންފުނިތަކަށް 80 ބިލިއަން ޑޮލަރުގެ ގެއްލުން ލިބިފައިވާ ކަމަށް އަންދާޒާ ކުރެވެ އެވެ.
ސްވިރިޑެންކޯ ލަފާކުރެއްވި ގޮތުގައި 2022 ވަނަ އަހަރު ޖީޑީޕީ 112 ބިލިއަން ޑޮލަރުން ދަށްވާނެ އެވެ. އެއީ މިދިޔަ އަހަރާ އަޅާ ބަލާއިރު 55 ޕަސެންޓުގެ ވެއްޓުމެކެވެ.
