ރަޝިއާއިން ފޯރުކޮށްދޭ ގޭހަށް ރޫބްލްސްއިން އަގު ދައްކަން ޖެހުމަކީ ބަލައިގަނެވޭނެ ކަމެއް ނޫން ކަމަށް ޖީ7 ގައުމުތަކުން ބުނެފި އެވެ.
ސިނާއީ ގޮތުން އެންމެ ކުރިއަރާފައިވާ ގައުމުތައް ހިމެނޭ ޖީ7 ގެ ރިޔާސަތު ބަލަހައްޓާ ޖަރުމަނުވިލާތުން ބުނީ އެއީ އެއްބަސްވުންތަކާ ހިލާފު ނިންމުމެއް ކަމަށެވެ.
"ރޫބްލްސްއިން އަގު ދެއްކުމަކީ ބަލައިގަނެވޭނެ ކަމެއް ނޫން. ކުންފުނިތަކުން [ރަޝިއާގެ ރައީސް ލެޑިމިއަ] ޕުޓިންގެ ވާހަކައަށް ސަމާލުކަން ނުދިނުމަށް ގޮވާލަން،" ޖަރުމަނުވިލާތުން ބުންޏެވެ.
މިދިޔަ ހަފްތާގައި ޕުޓިން ވިދާޅުވީ "އެކުވެރި ނޫން ގައުމުތަކަށް" ސަޕްލައި ކުރާ ގޭހަށް އަގު ދައްކަން ޖެހޭނީ ހަމައެކަނި ރަޝިއާގެ ފައިސާ، ރޫބުލްސްއިން ކަމަށެވެ.
ރަޝިއާއާ އެކުވެރި ނޫން ގައުމުތަކުގެ ތެރޭގައި މުޅި ޔޫރަޕިއަން ޔޫނިއަން (އީޔޫ) ހިމެނެ އެވެ. އެފަދަ ނިންމުމެއް އިއުލާނު ކުރި އިރު، އީޔޫ އާއި އެމެރިކާއިން ވަނީ ރަޝިއާއާ ދެކޮޅަށް ގިނަ ފިޔަވަޅުތަކެއް އަޅާފަ އެވެ.
ޖީ7 އިން ރަޝިއާގެ ނިންމުން ބަލައިނުގަންނާނެ ކަމަށް ބުނި އިރު، ޖީ7 ގެ ގައުމުތަކަކީ އިނގިރޭސިވިލާތް، ކެނެޑާ، ފްރާންސް، ޖަރުމަނުވިލާތް، އިޓަލީ، ޖަޕާން އަދި އެމެރިކާ އެވެ.
ފްރާންސްގެ ރައީސް އިމޭނުއެލް މެކްރޯން ވެސް މިދިޔަ ހުކުރު ދުވަހު ވިދާޅުވީ ގޭހުގެ އަގު ރޫބުލްސްއިން ދައްކަން ޖެހުން ބަލައިނުގަނެވޭނެ ކަމަށެވެ.
