އައްޑޫ ސިޓީގެ މަރަދޫ އަދި މަރަދޫފޭދޫގެ ބަނދަރު ތަރައްގީކުރުމަށްފަހު މިއަދު ހުޅުވައިފި އެވެ. ދެ އަވަށުގެ ބަނދަރު ވެސް ހުޅުވައިދެއްވީ ރައީސް އިބްރާހިމް މުހައްމަދު ސޯލިހެވެ.
މަރަދޫ ބަނދަރު ބޮޑުކުރުމުގެ މަޝްރޫއުއަކީ 28 މިލިއަން ރުފިޔާ ދައުލަތުގެ ބަޖެޓުން ހަރަދުކޮށްގެން ހިންގި މަޝްރޫއުއެކެވެ. އެމްޓީސީސީން 2019 ވަނަ އަހަރު ފެށި މި މަޝްރޫއުގެ ދަށުން ބޭރު ތޮށީގެ ބަނދަރުފަޅީގައި 276 މީޓަރަށް އެލްބްލޮކް ޖައްސާފައިވެ އެވެ. އަދި, މޫދުވީ ފަޅީގައި 340 މީޓަރަށް ބޮޑު ހިލަ ޖެހި އެވެ.
އެއްގަމު ތޮށިން ބޭރުތޮއްޓަށް އެރުމަށް 140 މީޓަރުގެ ފާލަމެއް އަޅާފައިވާއިރު, ބޭރު ތޮށީގައި ގާ އެތުރުމާއެކު މަގު ބައްތި ވެސް މަޝްރޫއުގެ ދަށުން ވަނީ ޖަހާފަ އެވެ.
އެމްޓީސީސީއާ ހަވާލުކޮށްގެން ކުރިއަށް ގެންދިޔަ މަރަދޫފޭދޫ ބަނދަރު ތަރައްގީ ކުރުމުގެ މަޝްރޫއުގެ ދަށުން 243 މީޓަރުގެ ބޮޑުހިލައިގެ ބޭރު ތޮއްޓެއް ވަނީ ޖަހާފަ އެވެ. އެއާއެކު, 100 މީޓަރުގެ ރިވެޓްމަންޓެއް ޖެހުމާއި 260 މީޓަރުގެ ކޮންކްރީޓް ބްލޮކް އެއްގަމު ތޮއްޓެއް ޖެހުމާއި ނެރު ބައްތި ޖެހުމާއި 42 މީޓަރު ގްރޯއިން ވަނީ ޖަހާފަ އެވެ.
އޭގެ އިތުރުން، ޖުމްލަ 31 މިލިއަން ރުފިޔާ ހަރަދުކޮށްގެން ކުރިއަށް ގެންދިޔަ މި މަޝްރޫއުގެ ދަށުން އެއްގަމު ތޮއްޓާ އިންވެގެން ޕޭވްމަންޓް ހެދުމާއި ބަނދަރު ސަރަހައްދުގައި ލައިޓް ޖެހުމުގެ އިތުރުން ރޭމްޕެއް ވެސް ވަނީ ހަދާފަ އެވެ.
ދެ ބަނދަރު ހުޅުވުމަށް ވަކިވަކިން ރަސްމިއްޔާތެއް ބާއްވާފައިވާއިރު, މަރަދޫ ބަނދަރު ހުޅުވުމުގެ ރަސްމިއްޔާތުގައި އައްޑޫ ސިޓީގެ މޭޔަރު އަލީ ނިޒާރު ވިދާޅުވީ, ރައީސް ސޯލިހު ވަނީ އައްޑޫގެ ރައްޔިތުންނަށް ގިނަ ހަދިޔާތަކެއް ދެއްވާފަ ކަމަށެވެ. އައްޑޫގައި މި ސަރުކާރުން ހިންގާ ގިނަ މަޝްރޫއުތައް ފާހަގަ ކުރައްވަމުން ނިޒާރު ވަނީ ރައީސަށް ވަރަށް ބޮޑަށް ތައުރީފު ކުރައްވައި ޝުކުރު އަދާކުރައްވާފަ އެވެ.
މަރަދޫ ދާއިރާގެ މެންބަރު އިބްރާހިމް ޝަރީފް ވިދާޅުވީ, މަރަދޫ ބަނދަރު ބޮޑުކުރުމުގެ މަޝްރޫއުއަކީ ސީދާ ރައީސް ސޯލިހުގެ އެހީތެރިކަމާއެކު ކުރިއަށް ގެންދެވުނު މަޝްރޫއުއެއް ކަމަށެވެ. އެމަނިކުފާނަކީ މެންބަރުން ބޭނުންވާ މަޝްރޫއުތައް ބަޖެޓްގައި ހިމަނަން ފުރުސަތު ދެއްވައި, ރައީސްއެއް ކަމަށް ވިދާޅުވެ ޝަރީފް ތައުރީފް ކުރެއްވި އެވެ.
ޝަރީފް ވިދާޅުވި ގޮތުގައި, އައްޑޫގެ ބިން ހިއްކުން ފަދަ ބޮޑު މަޝްރޫއުއެއް މި ސަރުކާރުން ކުރިއަށް ގެންދިޔުމުން ހާމަވެގެންދާ ކަމަކީ ބޮޑު އާބާދީއެއްގެ އަޑު ރައީސް އަޑު އައްސަވައިފިކަން ކަމަށާއި އައްޑޫގެ ތަރައްގީއަށް ރައީސް މަސައްކަތް ކުރައްވާނެ ކަމުގެ ފުރިހަމަ ޔަގީންކަން އެބަ އޮތް ކަމަށެވެ.
މަރަދޫފޭދޫގެ ބަނދަރު ހުޅުވުމަށް ބޭއްވި ރަސްމިއްޔާތުގައި ދާއިރާގެ މެންބަރު ރޮޒައިނާ އާދަމް ވިދާޅުވި ގޮތުގައި, އައްޑޫ ސިޓީގެ ތަރައްގީގެ ރައީސްއަކީ ރައީސް ސޯލިހެވެ. އޭނާ ވިދާޅުވީ ރައީސްއަކީ ވައުދުތައް ބަރާބަރަށް ފުއްދަވާ ރައީސްއެއް ކަމަށެވެ. ރޮޒައިނާ ވިދާޅުވީ, އައްޑޫ ސިޓީގެ ހުރިހާ ސަރަހައްދަކުން ވެސް ފެނިގެން ދަނީ މި ސަރުކާރުން ހިންގާ ތަރައްގީގެ މަޝްރޫއުތައް ކަމަށެވެ.
މެންބަރު ވިދާޅުވި ގޮތުގައި އައްޑޫ ސިޓީއަށް ރައީސް ވައުދުވެވަޑައިގެންނެވި ހުރިހާ ކަމެއް ވާނެ އެވެ.
އައްޑޫގައި ކުރިއަށްދާ މަޝްރޫއުތައް:
ހަތަރު ރަށުގެ މަގު ހެދުން
- އައްޑޫ ސިޓީ ރީޖަނަލް ވޭސްޓް މެނޭޖްމަންޓް ފެސިލިޓީ
- ކަސްޓަމްސް ސައުތް ރީޖަން ހެޑް އޮފީސް އިމާރާތް
- އައްޑޫ ސިޓީ ފެނުގެ ނިޒާމް އަޕްގްރޭޑްކުރުން
- އައްޑޫސިޓީ ޑިސްޓްރިކްޓް ކޯޓު އިމާރާތްކުރުން
- އައްޑޫސިޓީ ޑިސްޓްރިކްޓް ކޯޓު އިމާރާތްކުރުން
- އައްޑޫ ހައި ސްކޫލް 12 ކްލާސްރޫމް އިމާރާތް
