ޒުވާން ހުނަރުވެރި ކުރެހުންތެރިޔާ އައިމިނަތު ޝިމްހާ ޝަކީބް ކުރަހާފައިވާ މާލޭގެ އިހުގެ ތަސްވީރުތައް ހިމެނޭ "މާލޭ ކިއްލާ" ނުވަތަ "މާލޭ ފޯޓްރެސް" އާޓް އެގްޒިބިޝަން ކްރޮސްރޯޑްސް މޯލްޑިވްސްގައި މިރޭ ހުޅުވައިފި އެވެ.
މިއީ ރައްޔިތުންގެ މަޖިލީހުގެ ރައީސް އަދި ދިވެހި ތާރީހު ދިރާސާކުރައްވާ މުހައްމަދު ނަޝީދުގެ އަމިއްލަފުޅު ޕްރޮޖެކްޓެކެވެ. މި އެގްޒިބިޝަނުގައި ހިމެނޭ ތަސްވީރުތަކަކީ ނަޝީދު ލިޔުއްވަމުން އަންނަ އަދި މި އަހަރު ނެރެން ހަމަޖެހިފައިވާ ފޮތަކަށް އެމަނިކުފާނުގެ އިރުޝާދުގެ ދަށުން ޝިމްހާ ކުރެހި ތަސްވީރުތަކެކެވެ.
އާދީއްތަ ދުވަހުގެ ނިޔަލަށް ކްރޮސްރޯޑްސްގެ ދަ މެރީނާގެ ގެލަރީގައި އޮންނަ މި އެގްޒިބިޝަން މިރޭ ހުޅުވައިދެއްވީ ނަޝީދު އާއި ނޯބެލް ސުލްހައިގެ އިނާމުގެ ނޮމިނީއެއް ކަމަށްވާ ގެމްބިއާ އަރަމުން އަންނަ ލީޑަރު ޖާހާ ޑުކުރޭހް އެވެ. މި ރަސްމިއްޔާތުގައި ރާއްޖޭގެ ކުރީގެ ހެލްތު މިނިސްޓަރު އައިމިނަތު ޖަމީލް ބައިވެރިވެވަޑައިގެންނެވި އެވެ.
ޝިމްހާ (ކ) ތަސްވީރުތަކުގެ ތަފްސީލް ކިޔައިދެނީ.
މިރޭ ނަޝީދު ވިދާޅުވީ މި ތަސްވީރުތަކުން ފެންނާނީ 1800ގެ އަހަރުތަކުގައި މާލެ އޮތް ގޮތް ކަމަށާއި އޭގެ ތެރެއިން ބައެއް ތަންތަނަކީ އޭގެ ފޮޓޯއެއް ވެސް ނެތް ތަންތަން ކަމަށެވެ. އެހެންވެ އެތަންތަނުގެ ހިޔާލު ގެންނެވީ ފަތްކޮޅުތަކާއި ލޯފާމާނުތަކާއި ދޭދޭ މީހުންގެ ވާހަކަތަކާއި ބުރާރަ ވާހަކަތަކުން މައުލޫމާތު ނަންގަވައިގެން ކަމަށެވެ. އެގޮތުން 16 ވަނަ ގަރުނުގެ ޕޯޗުގީސް ޗާޓުތަކާއި ހަސަން ތާޖުއްދީން ލިޔުއްވި ތާރީހު ދީބާ މަހަލް އާއި އެޗް.ސީ.ޕީ ބެލް ނަންގަވާފައިވާ ފޮޓޯތައް ދިރާސާކޮށްފައިވެ އެވެ.
ތަސްވީރުތަކުން ފެންނަ ތަންތަނުގެ ތެރޭގައި ނާނޭ ބުރުޒު، ބޮޑު ގަނޑުވަރު، އަލިރަސްގެފާނު ޒިޔާރަތް، މުއިވެޔޮދޮށް، ކުޑަމާލެ، ލޮނުޒިޔާރަތް، ހެންވޭރު މައިޒާން، ބޮޑު ކޯއްޓޭ ބުރުޒު ހިމެނެ އެވެ. މީގެ އިތުރުން ހެވިކުޅޭ މަންޒަރާއި މާލޭ ފަޅުތެރޭގައި ބޮލިހިލާ މަންޒަރުތައް ވެސް ހިމެނެ އެވެ.
ނަޝީދު (ކ) މާލޭގެ ޗާޓުގެ ކުރެހުން ކުއްޖަކަށް ކިޔައިދެނީ.
މި ޕްރޮޖެކްޓް ޝިމްހާ އަށް ދެއްވީ ނަޝީދު ވިދާޅުވި ގޮތުގައި އޭނާގެ ކުރެހުންތައް ރީތިވެގެން ކަމަށެވެ.
"އަޅުގަނޑަކީ ކުރެހުންތެރިއެއް ނޫން. އެކަމަކު ރީތީ އެއްޗެއް ފެނިއްޖެއްޔާ އެނގޭނެ،" ނަޝީދު ވިދާޅުވި އެވެ.
ނަޝީދު ވަނީ ތަސްވީރުތަކާއި އިހުގެ މާލެއާ ބެހޭ ޝައުގުވެރި ޕްރެޒެންޓޭޝަނެއް ވެސް މިރޭ ދެއްވައިފަ އެވެ.
ޝިމްހާ ބުނީ މިއީ 18 މަސް ދުވަހުގެ މަސައްކަތް ކަމަށާއި ބައެއް ކުރެހުންތައް އަށް ފަހަރު ވެސް ސްކެޗް ހަދާފައި ހުންނާނެ ކަމަށެވެ. އެންމެ ކަމުދިޔައީ ނާނޭ ބުރުޒުގެ ތަސްވީރު ކަމަށް ޝިމްހާ ބުންޏެވެ.
ކުރެހުންތެރިޔާ ޝިމްހާ.
މި އެގްޒިބިޝަނުގެ ކަވާ އާޓް ކަމަށްވާ މާލޭގެ އިހުގެ މެޕް ކުރަހާފައިވަނީ އީގާން ބަދީއު އެވެ. އެއީ ޕޯޗުގީޒުން ރާއްޖެ ހިފި ޒަމާނުގައި މާލެ މަތިން ފެންނާނެ ގޮތަށް ކުރަހާފައިވާ ކުރެހުމެވެ. އެ ކުރެހުމުގައި މާލޭގައި އޭރު ހުންނާނެ 272 ގެ ފެންނަން ހުރެ އެވެ.
ދުބާއީގައި ކުރިއަށްދާ އެކްސްޕޯ 2020 ގައި ވެސް މި ތަސްވީރުތައް އެގްޒިބިޓްކޮށްފައިވެ އެވެ. މާލޭގައި ވެސް އެގްޒިބިޝަން ބާއްވަން ވަނީ ނިންމައިފަ އެވެ.
