ލަންޑަން، އިނގިރޭސިވިލާތް (މާޗް 25) - ސްކޮޓްލެންޑާއި ވޭލްސްގައި ރެކޯޑް އަދަދަށް ކޮވިޑް ކޭސް އިތުރުވެ، މުޅި އިނގިރޭސިވިލާތުގައި ކޮވިޑްގެ ބިރުވެރިކަން އަނެއްކާވެސް ބޮޑުވާން ފަށައިފި އެވެ.
އޮފީސް ފޯ ނޭޝަނަލް ސްޓެޓިސްޓިކްސްއިން ބުނީ ކޭސްތައް އިތުރުވަމުން ދަނީ ކޮވިޑް ފަތުރާ ވައިރަހުގެ ހަލުވިކަމާ އެކު ދައުރުވާ އޮމިކްރޯން ވޭރިއެންޓްގެ ސަބްވޭރިއެންޓެއް ކަމަށްވާ ބީއޭ.2 ގެ ސަބަބުން ކަމަށެވެ.
މިދިޔަ ހަފްތާގައި މުޅި އިނގިރޭސިވިލާތުން 4.26 މިލިއަން ކޭސް ރިކޯޑް ކުރިއިރު، މިހާތަނަށް އެންމެ ގިނަ ކޭސް ރިކޯޑްކޮށްފައި ވަނީ މި އަހަރުގެ ފުރަތަމަ ހަފްތާގަ އެވެ. އެއީ 4.3 މިލިއަން ކޭސް އެވެ.
މި އަހަރުގެ ފުރަތަމަ ހަފްތާގައި ރެކޯޑް އަދަދަށް ކޭސްތައް އިތުރުވި ނަމަވެސް، އޮމިކްރޯންގެ ސަބަބުން ބަލިވާ މިންވަރު ކުޑަވާތީ، ކޮވިޑްގައި މަރުވި މީހުންގެ އަދަދު މައްޗެއް ނުވެ އެވެ.
މިހާރު އަނެއްކާވެސް ކޭސްތައް އިތުރުވާން ފަށާފައިވާ އިރު، އިންގްލެންޑާއި ވޭލްސްގައި އެޑްމިޓް ކުރާ މީހުންގެ އަދަދު ވެސް ދަނީ އިތުރުވަމުންނެވެ. ނަމަވެސް އައިސީޔޫގައި ފަރުވާ ދޭން ޖެހޭ އަދަދު މައްޗެއް ނުވެ އެވެ.
ސްކޮޓްލެންޑްގައި މި ވަގުތު 2،326 މީހުންނަށް ހޮސްޕިޓަލްގައި ފަރުވާދެމުންދާ އިރު، އެއީ ރެކޯޑް އަދަދެކެވެ. އިނގިރޭސިވިލާތުގައި މިހާތަނަށް ކޮވިޑް ޖެހިގެން މަރުވީ 164،454 މީހުންނެވެ.
