ރަޝިއާއިން ޔޫކްރެއިންގައި ކެމިކަލް ހަތިޔާރު ބޭނުން ކުރުމުގެ ފުރުސަތު ވަރަށް ބޮޑު ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެ އެވެ.
"ޔޫކްރެއިންގެ ސަރަހައްދުގައި ރަޝިއާއިން ކެމިކަލް ހަތިޔާރުގެ ބޮޑު ހަމަލާއެއް ދިނުމުގެ ފުރުސަތު ވަރަށް ބޮޑު،" ބްރަސެލްސްގައި ބޭއްވި ޖީ7 ސަމިޓުގައި ވީޑިއޯ މެދުވެރިކޮށް ޒެލެންސްކީ ވިދާޅުވި އެވެ.
އޭގެ އިތުރުން ރަޝިއާއިން މިހާރު ވެސް ސުލްހަވެރިން ޔޫކްރެއިންގެ ރައްޔިތުންނާ ދެކޮޅަށް "ފޮސްފޮރަސް ބޮން" ބޭނުންކޮށްފައިވާ ކަމަށް އޭނާ ތުހުމަތު ކުރެއްވި އެވެ.
"ފޮސްފޮރަސް ބޮން" ބޭނުން ކުރި ކަމަށް ޔޫކްރެއިނުން އެންމެ ފުރަތަމަ ތުހުމަތު ކުރީ ހަނގުރާމަ ފެށިތާ ދެ ހަފްތާ ފަހުންނެވެ.
ޒެލެންސްކީ ގައުމުތަކަށް ގޮވާލެއްވީ ރަޝިއާއާ އެކު ވިޔަފާރި ކުރުން އެއްކޮށް ހުއްޓާލުމަށާއި ޖީޕީއެސް ނެވިގޭޝަން ސިސްޓަމް ބޭނުން ކުރުމުގެ ފުރުސަތު ރަޝިއާއަށް ނުދިނުމަށެވެ.
އޭގެ އިތުރުން ދުނިޔޭގެ މާލީ ނިޒާމުން ރަޝިއާގެ ބޭންކުތައް އެކަހެރި ކުރަން ޖެހޭ ކަމަށާއި ހިފަހައްޓާފައިވާ ރަޝިއާގެ މުދާ ބޭނުން ކުރަން ވާނީ ޔޫކްރެއިން އަލުން ބިނާ ކުރުމަށް ކަމަށް ޒެލެންސްކީ ވިދާޅުވި އެވެ.
އޭނާ ވިދާޅުވީ ޔޫކްރެއިންގައި ކުރަމުންދާ ހަނގުރާމައިގެ ސަބަބުން ދުނިޔެއަށް ކާބޯތަކެތީގެ ކާރިސާއެއް ކުރިމަތިވުމުގެ ފުރުސަތު އެބަ އޮތް ކަމަށެވެ.
"ޔޫކްރެއިންގައި ސުލްހަ ނެތި ގިނަ ދުވަސް ހޭދަވާ ވަރަކަށް، ދުނިޔޭގެ މާކެޓުގައި ހުންނަ ޔޫކްރެއިންގެ ކާބޯތަކެތި ދާނީ މަދުވަމުން."
ޒެލެންސްކީ ވިދާޅުވީ ހަނގުރާމައިގެ ސަބަބުން ގިނަ ޒަރޫރީ ތަކެތި އޭޝިއާ އާއި އެފްރިކާ އަދި ޔޫރަޕްގެ ގައުމުތަކުން ލިބުން ދަތިވުން އެކަށީގެންވާ ކަމަށެވެ.
ދުނިޔޭގައި އެންމެ ގިނައިން ދަނޑުގައި އުފައްދާ ބާވަތްތައް އެކްސްޕޯޓް ކުރާ އެއް ގައުމަކީ ޔޫކްރެއިނެވެ. އެގޮތުން ޒުވާރި އާއި ގޮދަން ފުށް ފާހަގަކުރެވެ އެވެ.
