ރަޝިއާގެ ސިފައިން ޔޫކްރެއިނަށް އަރައި ކުރަމުންދާ ހަނގުރާމަ "ވަގުތުން" ހުއްޓާލުމަށް ގޮވާލައި އދ. ގެ އާއްމު މަޖިލީހުން އަނެއްކާވެސް ގަރާރެއް ފާސްކޮށްފި އެވެ.
ނިއު ޔޯކްގައި ހުންނަ އދ. ގެ މައި މަރުކަޒުގައި ގަރާރަށް ތާއީދުކޮށް 140 ގައުމުން ވޯޓު ދިނެވެ. ވަކި ކޮޅަކަށް ނުޖެހޭ 38 ގައުމު ތިބި އިރު، ފަސް ގައުމުން ވޯޓު ދިނީ ގަރާރާ ދެކޮޅަށެވެ.
މީގެ ކުރިން މާޗް ދެ ވަނަ ދުވަހު ވެސް އދ. ގެ އާއްމު މަޖިލީހުން މިފަދަ ގަރާރެއް ފާސްކުރި އެވެ. އެ ގަރާރަށް ތާއީދުކޮށް 141 ގައުމުން ވޯޓު ދިނެވެ.
ފްރާންސާއި މެކްސިކޯއިން ތައްޔާރު ކުރި އާ ގަރާރު، އދ. ގެ އާއްމު މަޖިލީހުގެ ހާއްސަ ބައްދަލުވުމަކަށް ބުދަ ދުވަހު ހުށަހެޅީ ޔޫކްރެއިނުންނެވެ.
ދެކުނު އެފްރިކާއިން ވެސް ޔޫކްރެއިން ހަނގުރާމަ މައްސަލައިގައި ގަރާރެއް ހުށަހެޅި އެވެ. ނަމަވެސް އެ ގަރާރުގައި ރަޝިއާގެ ނަން އެއްވެސް ވަރަކަށް ފާސްކޮށްފައެއް ނުވެ އެވެ.
ދެކުނު އެފްރިކާގެ ގަރާރަށް 50 ގައުމުން ތާއީދުކުރި އިރު، 36 ގައުމުން ވަކި ކޮޅަކަށް ނުޖެހެ އެވެ. އަދި 67 ގައުމުން ވޯޓު ދިނީ ދެކޮޅަށެވެ. އެހެންކަމުން އެ ގަރާރު ބަލައެއް ނުގަނެ އެވެ.
