ރަޝިއާގެ ސިފައިން ޔޫކްރެއިނަށް އަރައި ހަނގުރާމަ ފެށިތާ މަހެއް ފުރުން ފާހަގަކުރުމުގެ ގޮތުން ގައުމުތަކުގައި މުޒާހަރާ ކުރުމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ގޮވާލައްވައިފި އެވެ.
ބުދަ ދުވަހުގެ ރޭ ނެރުއްވި ވީޑިއޯގައި ޒެލެންސްކީ ވަނީ ފުރަތަމަ ފަހަރަށް އިނގިރޭސި ބަހުން ވާހަކަ ދައްކަވައިފަ އެވެ. ދުނިޔޭގެ އެކި ގައުމުތަކުގެ ރައްޔިތުންނަށް އޭނާ ގޮވާލެއްވީ ހަނގުރާމައަށް މަހެއް ފުރިފައި ވާތީ، މަގުތަކަށް ނުކުމެ މުޒާހަރާ ކުރުމަށެވެ.
އޭނާ ވިދާޅުވީ ރަޝިއާއިން ހަނގުރާމަ ކުރަނީ ހަމައެކަނި ޔޫކްރެއިނާ ދެކޮޅަށް ނޫން ކަމަށާއި އެއީ ދުނިޔޭގެ ހުރިހާ ގައުމެއްގެ ރައްޔިތުންގެ މިނިވަންކަމާ ދެކޮޅަށް ކުރާ ހަނގުރާމައެއް ކަމަށެވެ. ރަޝިއާގެ ހަނގުރާމަ ހުއްޓުވުމުގެ މަސައްކަތް ގައުމުތަކުން ކުރަން ޖެހޭ ކަމަށް އޭނާ ވިދާޅުވި އެވެ.
"އޮފީސްތަކާއި، ގެތަކާއި، ސްކޫލްތަކާއި، ޔުނިވާސިޓީތަކުން ނުކުމެ، ސުލްހައަށްޓަކައި އެއްވަމާ. ޔޫކްރެއިނަށް ތާއީދު ކުރަން ޔޫކްރެއިންގެ ރަމްޒުތައް ހިފައިގެން އެއްވަމާ. ހުރިހާ އެންމެން އެއްވެ، ދިރިހުރުމުގެ ހައްގާއި މިނިވަންކަމަށް ތާއީދު ކުރާކަން ހާމަކުރަމާ،" ޒެލެންސްކީ ވިދާޅުވި އެވެ.
ޔޫކްރެއިން ހަނގުރާމައެއް މަހެއް ފުރިފައިވާ ބުރާސްފަތި ދުވަހު ނޭޓޯ ގައުމުތަކުން ބްރަސްލެގައި ކުއްލި ބައްދަލުވުމެއް ބާއްވާނެ އެވެ. އެ ބައްދަލުވުމަށް އެމެރިކާގެ ރައީސް ޖޯ ބައިޑެން ވެސް ޔޫރަޕަށް ވަޑައިގެން، ގައުމުތަކުގެ ވެރިންނާ ބައްދަލުކުރައްވާނެ އެވެ.
