ރަޝިއާގެ އިދިކޮޅު ލީޑަރު އެލެކްސީ ނަވަލްނީއާ ދެކޮޅަށް އުފުލި މަކަރާއި ހީލަތް ހެދުމުގެ ދައުވާ ސާބިތުވެ، ނުވަ އަހަރުގެ ޖަލު ހުކުމެއް އިއްވައިފި އެވެ.
ޖަރުމަނުވިލާތުގައި ހުންނަވަނިކޮށް، ޒަހަރުގެ ސަބަބުން ފުރާނައަށް ނުރައްކާވާ ހާލަތެއް ނަވަލްނީއަށް ކުރިމަތިވެވަޑައިގެންނެވި އެވެ. އެކަމުގައި އޭނާ ތުހުމަތު ކުރައްވަނީ ރަޝިއާ ސަރުކާރަށެވެ.
ފަރުވާއަށް ފަހު، މިދިޔަ އަހަރު އެނބުރި ރަޝިއާއަށް ވަޑައިގެންނެވުމާ އެކު ނަވަލްނީ ހައްޔަރު ކުރި އެވެ. ޖަރުމަނު ހޮސްޕިޓަލުގައި ހުންނެވީ ކަފާލާތުގެ ޝަރުތާ ހިލާފަށް ކަމަށް ބުނެ އުފުލި މައްސަލައެއްގައި މިހާރު ވެސް ނަވަލްނީ ގެންދަވަނީ ތިން އަހަރުގެ ޖަލު ހުކުމެއް ތަންފީޒު ކުރަމުންނެވެ.
އަންގާރަ ދުވަހު އޭނާގެ މައްޗަށް ސާބިތުވީ މަކަރާއި ހީލަތް ހެދުމާއި ކޯޓުގެ ހުރުމަތް ކަނޑާލުމުގެ ދައުވާ އެވެ. ނަމަވެސް އެއީ ސިޔާސީ ދައުވާތަކެއް ކަމަށް ނަވަލްނީ އާއި އިދިކޮޅު ސަޕޯޓަރުން ވެސް ބުނެ އެވެ.
ދައުލަތުން ބުނާ ގޮތުގައި ނަވަލްނީ ވަނީ އެމަނިކުފާނުގެ ސިޔާސީ ޖަމިއްޔާތަކާއި އާއި ކޮރަޕްޝަނާ ދެކޮޅު ޖަމިއްޔާއަށް އެކި ފަރާތްތަކުން ދިން ފައިސާގެ ތެރެއިން 4.7 މިލިއަން ޑޮލަރު އަމިއްލަ ބޭނުމަށް ނަންގަވާފަ އެވެ. ރަޝިއާ ސަރުކާރުން މިދިޔަ އަހަރު ވަނީ ނަވަލްނީއާ ގުޅުން ހުރި ހުރިހާ ޖަމިއްޔާއެއް ހިންގުން މަނާކޮށްފަ އެވެ.
އަލަށް އިއްވި ހުކުމާ އެކު، ކުރިން ތަންފީޒު ކުރަމުން ދިޔަ ހުކުމުގައި ޖަލުގައި ހޭދަކުރި ދުވަސްތަކެއް އުނިވެގެން ދާނެ އެވެ. އެހެންކަމުން ޖަލުގައި ދެން ހޭދަކުރައްވަން ޖެހޭނީ ހަތް އަހަރެވެ.
