ޔޫކްރެއިނާއި ރަޝިއާއާ ދެމެދު ސުލްހައިގެ މަޝްވަރާތައް ބާއްވަން އެންމެ ރަނގަޅު ތަނަކީ ގުދުސް ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެ އެވެ.
އާދީއްތަ ދުވަހު ޓެލެގްރާމް މެދުވެރިކޮށް ނެރުނު ވީޑިއޯއެއްގައި ޒެލެންސްކީ ވަނީ ދެ ގައުމުގެ މެދުގައި މަޝްވަރާ ބާއްވަން އިޒްރޭލުގެ ބޮޑު ވަޒީރު ނަފްތާލީ ބެނެޓް ކުރައްވާ މަސައްކަތަށް ޝުކުރު އަދާ ކުރައްވާފަ އެވެ.
"އެމަނިކުފާނުގެ ހުރިހާ މަސައްކަތަކަށް އަޅުގަނޑުމެން ޝުކުރުވެރިވަން. އެހެންވީމަ، ކޮންމެވެސް އިރަކުން ރަޝިއާއާ އެކު މި ވާހަކަ ފެށޭނެ ކަމަށް ބެލެވޭ. ބައްދަލުވުން ގުދުސްގައި އޮތުން ވެސް އެކަށީގެންވޭ،" ޒެލެންސްކީ ވިދާޅުވި އެވެ.
"ސުލްހަ ހޯދަން އެންމެ ރަނގަޅު ތަނަކީ މިއީ."
ބެނެޓް ވަނީ ޒެލެންސްކީގެ އިތުރުން ރަޝިއާގެ ރައީސް ލެޑިމިއަ ޕުޓިންއާ ގަވާއިދުން ފޯނުން މަޝްވަރާ ކުރައްވާފަ އެވެ. އޭގެ އިތުރުން މާޗް ފަސް ވަނަ ދުވަހު ބެނެޓް ވަނީ ރަޝިއާއަށް ވަޑައިގެން ޕުޓިންއާ އެކު ތިން ގަޑިއިރުގެ ބައްދަލުވުމެއްގައި ބައިވެރިވެވަޑައިގެންފަ އެވެ.
ޔަހޫދީ ދަރިފަސްކޮޅަށް ނިސްބަތްވެވަޑައިގަންނަވާ ޒެލެންސްކީ ވަނީ އާދީއްތަ ދުވަހު އިޒްރޭލުގެ ޕާލިމެންޓުގައި ތަގުރީރު ކުރައްވާފަ އެވެ. އޭގެ ކުރިން އެމަނިކުފާނު ވަނީ އެމެރިކާ، އިނގިރޭސިވިލާތް އަދި ޖަރުމަނުވިލާތުގެ ޕާލިމެންޓުގައި ވެސް ތަގުރީރު ކުރައްވާފަ އެވެ.
ވީޑިއޯ މެދުވެރިކޮށް ދެއްވި ތަގުރީރުގައި ޒެލެންސްކީ އިޒްރޭލަށް ގޮވާލެއްވީ ވަކި އަތަކަށް ނުޖެހި އޮތުން ނިމުމަކަށް ގެނައުމަށެވެ. އިޒްރޭލުން ޔޫކްރެއިނަށް އިންސާނީ އެހީ ފޮނުވި ނަމަވެސް، މިހާތަނަށް އަސްކަރީ އެހީއެއް ނުދެ އެވެ. އަދި ހުޅަނގުގެ ގައުމުތަކުން ރަޝިއާއާ ދެކޮޅަށް ދަތި ކުރުމުގެ ފިޔަވަޅު އެޅުމުން، އެކަމުގައި ވެސް އިޒްރޭލުން ބައިވެރިއެއް ނުވެ އެވެ.
