މަރިޔުޕޯލްގައި ތިބި ޔޫކްރެއިން ސިފައިން އަމާން ދީފި ނަމަ، އެ ސިޓީގެ ރައްޔިތުންނަށް ރައްކާތެރިކަމާ އެކު ސިޓީއިން ނުކުތުމުގެ ފުރުސަތު ދޭނެ ކަމަށް ރަޝިއާއިން ބުނި ނަމަވެސް، ޔޫކްރެއިން ސިފައިން އަމާން ދޭން ދެކޮޅު ހަދައިފި އެވެ.
ރަޝިއާގެ ހުށަހެޅުމުގެ ދަށުން ޔޫކްރެއިނުން ހަތިޔާރު ބަހައްޓައިފި ނަމަ، މަރިޔުޕޯލް ސިޓީގެ ރައްޔިތުންނަށް އެ ސިޓީ ދޫކޮށް ރައްކާތެރި ހިސާބުތަކަށް ދިޔުމުގެ މަގުފަހިކޮށްދޭނެ އެވެ.
ނަމަވެސް އެ ހުށަހެޅުން ގަބޫލުނުކޮށް، ޔޫކްރެއިނުން ބުނީ ސިފައިން ހަތިޔާރު ބަހައްޓައި، އެ ސިޓީ ރަޝިއާއަށް ވެދުން ކުރުމުގެ އެއްވެސް ވިސްނުމެއް ނެތް ކަމަށެވެ.
މަރިޔުޕޯލްގައި 300،000 މީހުން ތާށިވެފައިވާ ކަމަށް ބެލެވެ އެވެ. އެ ސިޓީއަށް އިންސާނީ އެހީ ވެއްދުމަށް ވސް ރަޝިއާއިން ހުއްދަ ދީފައި ނުވާތީ، ކާބޯތަކެއްޗާއި ބޭސް އަދި ބޯފެން ވަނީ ހުސް ވާން ގާތްވެފަ އެވެ. އޭގެ އިތުރުން ކަރަންޓާއި ފެން ކެނޑިފައި ވާތާ އެތައް ދުވަހެއް ވެއްޖެ އެވެ.
ރަޝިއާގެ ހުށަހެޅުން ބަލައިގަންނަން ޔޫކްރެއިނަށް ދިން ސުންގަޑިއަކީ ރަޝިއާ ގަޑިން ހޯމަ ދުވަހުގެ ފަތިހު 05:00 އެވެ. ހުށަހެޅުން ގަބޫލުކޮށްފި ނަމަ، 10:00 ގައި އާއްމުންނަށް ސިޓީއިން ދިޔުމުގެ ފުރުސަތު ހުޅުވާލާނެ ކަމަށް ބުންޏެވެ.
