ރަޝިއާއިން މި ވަގުތު އެންމެ ބޮޑަށް ހަމަލާދެމުންދާ ޔޫކްރެއިންގެ މަރިޔުޕޯލް ސިޓީގެ ރައްޔިތުން ރަހީނުކޮށްގެން ރަޝިއާއަށް ގެންދާ ކަމަށް ތުހުމަތުކޮށްފި އެވެ.
ޔޫކްރެއިން ޕާލިމެންޓްގެ އިންސާނީ ހައްގުތަކާ ގުޅޭ އޮމްބަޑްސްޕާސަން ލިޔުޑްމިޔިލާ ޑެނިސޯވާ ވިދާޅުވީ އެތައް ހާށް ރައްޔިތުން ގަދަކަމުން ގެންގޮސްފައިވާ ކަމަށެވެ.
އޭގެ ތެރޭގައި ގިނައިން ހިމެނެނީ އަންހެނުންނާއި ކުޑަކުދިން ކަމަށާއި، އެ މީހުން އެންމެ ފުރަތަމަ ގެންދިޔައީ މީހުން ބަންދު ކުރާ ކޭމްޕަކަށް ކަމަށް ވިދާޅުވި އެވެ. އޭގެ ފަހުން ވަނީ ޓަގަންރޮގްގައި ހުންނަ ކުޅިވަރު ހޯލަކަށް ބަދަލުކޮށްފައި ކަމަށް ވެސް ވިދާޅުވި އެވެ.
ޓަގަންރޮގް އަކީ މަރިޔުޕޯލް އާއި 112 ކިލޯމީޓަރު އިރުން އޮންނަ ރަޝިއާގެ އައްސޭރިފަށުގެ ސިޓީއެކެވެ. ޓަގަންރޮގްއަށް ގެންދިޔުމަށް ފަހު ބައެއް މީހުން، ރަޝިއާގެ އެހެން ހިސާބުތަކަށް ވެސް ފޮނުވާލާފައިވާ ކަމަށް ޑެނިސޯވާ ތުހުމަތު ކުރެއްވި އެވެ.
މަރިޔުޕޯލްގެ މޭޔަރު ވަޑީމް ބޮޔިޗެންކޯ އެކަން ސިފަކުރެއްވީ ރަޝިއާގެ ފައުޖުން އައިސް އެ ސިޓީގެ ރައްޔިތުން ރަހީނުކުރުމުގެ ގޮތުގަ އެވެ. އެއީ ދެ ވަނަ ބޮޑު ހަނގުރާމައިގައި ޖަރުމަނުވިލާތުގެ ލީޑަރު އެޑޯލްފް ހިޓްލަރް އަމަލު ކުރެއްވި ގޮތް ކަމުގައި އޭނާ ސިފަކުރެއްވި އެވެ.
