ސައިކޮލޮޖީ ކިޔަވާ ދަރިވަރުންގެ މެދުގައި އެކަކު އަނެކަކަށް އެހީތެރިވެ ބާރުވެރިކުރުވުމަށް ވިލާ ކޮލެޖާއި މަސްތުވާތަކެއްޗާ ދެކޮޅަށް މަސައްކަތްކުރާ ޖަމިއްޔާއެއް ކަމަށްވާ ޖާނީ ގުޅިގެން ހާއްސަ ޕްރޮގްރާމެއް ފަށައިފި އެވެ.
މި ހިނގާ މާޗު މަހުގެ 20 އިން 24 އަށް ކުރިޔަށްދާ އެ ޕްރޮގްރާމަކީ ވިލާ ކޮލެޖުގައި ސައިކޮލޮޖީ ކިޔަވާ ދަރިވަރުން ތަމްރީނުކޮށް، އެ ދަރިވަރުން މެދުވެރިކޮށް އިތުރު މީހުންނަށް އެހީތެރިކަން ފޯރުކޮށްދިނުމަށް އަމާޒުކޮށް ފަށާ ޕްރޮގްރާމެކެވެ.
އެ ޕްރޮގްރާމް ފެށުމަށްޓަކައި މިއަދު ވިލާ ކޮލެޖުގަައި ވަނީ ރަސްމިއްޔާތެއް ބާއްވައިފަ އެވެ. ރަސްމިއްޔާތު ޝަރަފްވެރިކޮށްދެއްވީ ވިލާ ކޮލެޖުގެ ރެކްޓާ ޑރ. އަހުމަދު އަންވަރު އެވެ.
އެ ރަސްމިއްޔާތުގައި ވާހަކަ ދައްކަވަމުން ޑރ. އަންވަރު ވިދާޅުވީ އެ ޕްރޮގްރާމުގެ ސަބަބުން ސައިކޮލޮޖީގެ ދާއިރާއިން ވިލާއިން ކުރާ މަސައްކަތްތައް ތަރުތީބުވެގެން ދާނެ ކަމަށެވެ.
ވިލާ ކޮލެޖުގެ ރެކްޓާ ޑރ. އަހުމަދު އަންވަރު މިއަދުގެ ރަސްމިއްޔާތުގައި ވާހަކަދައްކަވަނީ. ފޮޓޯ: އަދަދު
"މި ޕްރޮގްރާމް ދާނީ އޮގަނައިޒްޑްކޮށް. ސިސްޓަމެޓިކްކޮށް. އެ ދާންވާ ސްޓެޕް ބައި ސްޓެޕްކޮށް. މިހާރު އަޅުގަނޑުމެން މި ކުރާ ކަންކަން ހުންނާނީ އެއްތަނުން ތަންކޮޅެއް އަނެއް ތަނުން ތަންކޮޅެއް. ރިލޭޓްވެދާނެ، ރެލެވެންޓްވެދާނެ. އެހެންނަމަވެސް އެހާ އޮގަނައިޒްޑް ނުވެދާނެ. މި ޓްރެއިންކޮށްގެން އެކަމަށް ތައްޔާރުވީމަ ދާނީ ވަރަށް ސިސްޓަމެޓިކްކޮށް. މިއީ ކުރަން ޖެހޭ ކަމެއް،" ޑރ. އަންވަރު ވިދާޅުވި އެވެ.
ޑރ. އަންވަރު ވިދާޅުވީ ވިލާ ކޮލެޖާއި ޖާނީ ގުޅިގެން ފެށި އެ ޕްރޮގްރާމަކީ ކޮލެޖަކުން ޖަމިއްޔާއަކާއި ގުޅިގެން ފެށި އެފަދަ ފުރަތަމަ ޕްރޮގްރާމް ކަމަށެވެ.
އަދި އެއީ އެކަކު އަނެކަކަށް އެހީތެރިވެ، މުޖުތަމައުގެ ހުރި މައްސަލަތައް ހައްލުކުރުމަށް ވެސް ކުރެވޭ މުހިންމު މަސައްކަތެއް ކަމަށް ވިދާޅުވި އެވެ.
އެ ޕްރޮގްރާމުގައި އެންމެ އިސްކޮށް ހުންނަވާނީ ވިލާ ކޮލެޖުގެ ސީނިއާ ލެކްޗަރާ ޑރ. އައިޝަތު ނަޝީދާ އެވެ.
