ރަޝިއާއިން މިދިޔަ ބުދަ ދުވަހު ބޮން އެޅި ތިއޭޓަރުގައި ތާށިވެފައިވާ އެތައް ސަތޭކަ ބަޔަކު ސަލާމަތް ނުކުރެވި ލަސްވަމުން ދަނީ މަގުމަތީގައި ހަމަލާ ބަދަލު ކުރާތީ ކަމަށް މަރިޔުޕޯލް ސިޓީގެ މޭޔަރު ވިދާޅުވެއްޖެ އެވެ.
މޭޔަރު ވަޑީމް ބޮޔިޗެންކޯ ބީބީސީއަށް ވިދާޅުވީ ހަމަލާތައް މަޑު ޖެހުނު ވަގުތު ރެސްކިއު ޓީމުން ވަނީ އިމާރާތަށް ލިބުނު ގެއްލުމުގައި އުފެދުނު ކުނިތައް އެއް ފަރާތް ކޮށްފައި ކަމަށެވެ. މީހުން ސަލާމަތް ކުރުމުގެ މަސައްކަތް ނުފެށެނީސް ހަމަލާތައް ވަރުގަދަ ކުރި އެވެ.
އެ ތިއޭޓަރަކީ ކުޑަކުދިން ތިބި ތަނެއްކަން ހާމަކޮށްދޭން ފާހަގަތައް ލިޔެފައި ހުރި ނަމަވެސް، ރަޝިއާއިން ހަމަލާ ދިނީ ކަމަށް ޔޫކްރެއިނުން ތުހުމަތު ކުރެ އެވެ. އެކަމަކު ރަޝިއާއިން އެ ތުހުމަތު ދޮގުކުރެ އެވެ.
މަރިޔުޕޯލް ސިޓީއިން ނުނިކުމެވިފައި 400،000 މީހުން ތިބި ކަމަށް ބެލެވޭ އިރު، ހުކުރު ދުވަހު 5،000 އެއްހާ މީހުން ރައްކާތެރިކަމާ އެކު ސިޓީއިން ނުކުތެވެ.
ސިޓީގެ މޭޔަރު ވިދާޅުވީ ސިޓީގެ މެދުތެރޭގައި ވަރުގަދަ ހަމަލާތައް މިހާރު ބަދަލުކުރަމުންދާ ކަމަށެވެ. އެ ތަނުން ފެނާއި، ކަރަންޓު އަދި ފެން ކެނޑިފައި ވާތާ އެތައް ދުވަހެއް ވެއްޖެ އެވެ.
މިދިޔަ ބުދަ ދުވަހު ރަޝިއާއިން ބޮން އެޅި ތިއޭޓަރެއްގެ ތެރޭގައި 1،300 މީހުން ރައްކާތެރިކަން ހޯދަން ވަދެ ތިއްބެވެ. މިހާތަނަށް ސަލާމަތް ކުރެވިފައި ވަނީ 130 މީހުންނެވެ.
ރިޕޯޓުތައް ބުނާ ގޮތުން އެ ސިޓީގައި އާއްމުން ދިރިއުޅޭ އިމާރާތްތަކުގެ 80 ޕަސެންޓަށް ވަނީ ގެއްލުންވެފަ އެވެ.
