"ލަސްނުކޮށް" ސުލްހައިގެ މަޝްވަރާ ފެށުމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ހޮނިހިރު ދުވަހު ގޮވާލައްވައިފި އެވެ.
ޒެލެންސްކީ ވިދާޅުވީ ރަޝިއާގެ ސިފައިން ޔޫކްރެއިނަށް އަރައި ފެށި ހަނގުރާމައިގައި ރަޝިއާއަށް ހެދިފައިވާ "ގޯސްތަކުން" ލިބޭ ގެއްލުން ކުޑަ ކުރުމަށް އޮތް ހަމައެކަނި ފުރުސަތަކީ ސުލްހައިގެ މަޝްވަރާ ފެށުން ކަމަށެވެ.
"ރަޝިއާއިން ހަދާފައިވާ ގޯސްތަކުން ލިބެމުންދާ ގެއްލުން ކުޑަ ކުރަން ލިބޭ ހަމައެކަނި ފުރުސަތަކީ މިއީ،" ރޭ ވީޑިއޯ މެދުވެރިކޮށް ދެއްވި ހިތާބުގައި ޒެލެންސްކީ ވިދާޅުވި އެވެ.
"މިއީ ބައްދަލުކުރަންވީ ވަގުތު. މިއީ މަޝްވަރާ ކުރަންވީ ވަގުތު. މިއީ ޔޫކްރެއިނަށް އިންސާފު ހޯދައިދީ، ޔޫކްރެއިންގެ ބިމުގެ ސަރަހައްދު އަނބުރާ ކަށަވަރު ކުރަންވީ ވަގުތު."
ސުލްހައިގެ މަޝްވަރާއަށް ގޮވާލާފައިވާ އިރު، ރަޝިއާގެ ފައުޖުން ދަނީ މެދުކެނޑުމެއް ނެތި ޔޫކްރެއިންގެ ދެކުނުގައި އޮންނަ މަރިޔުޕޯލް ސިޓީއަށް ހަމަލާދެމުންނެވެ.
އެ ސިޓީއިން ނުނިކުމެވިފައި 400،000 މީހުން ތިބި ކަމަށް ބެލެވޭ އިރު، ހުކުރު ދުވަހު 5،000 އެއްހާ މީހުން ރައްކާތެރިކަމާ އެކު ސިޓީއިން ނުކުތެވެ.
ސިޓީގެ މޭޔަރު ވިދާޅުވީ ސިޓީގެ މެދުތެރޭގައި ވަރުގަދަ ހަމަލާތައް މިހާރު ބަދަލުކުރަމުންދާ ކަމަށެވެ. އެ ތަނުން ފެނާއި، ކަރަންޓު އަދި ފެން ކެނޑިފައި ވާތާ އެތައް ދުވަހެއް ވެއްޖެ އެވެ.
މިދިޔަ ބުދަ ދުވަހު ރަޝިއާއިން ބޮން އެޅި ތިއޭޓަރެއްގެ ތެރޭގައި 1،300 މީހުން ރައްކާތެރިކަން ހޯދަ ވަދެ ތިބި އިރު، އެ ތަނުން މީހުން ފެނޭތޯ އަދިވެސް ދަނީ މަސައްކަތް ކުރަމުންނެވެ. މިހާތަނަށް ސަލާމަތް ކުރެވިފައި ވަނީ 130 މީހުންނެވެ.
ރިޕޯޓުތައް ބުނާ ގޮތުން އެ ސިޓީގައި އާއްމުން ދިރިއުޅޭ އިމާރާތްތަކުގެ 80 ޕަސެންޓަށް ވަނީ ގެއްލުންވެފަ އެވެ.
