ޔޫކްރެއިންގެ ދެކުނުގައި އޮންނަ ކްރައިމިއާ ހިފިތާ އަށް އަހަރު ފުރުމާ ދިމާކޮށް ރަޝިއާގައި ކުލަގަދަ ހަރަކާތްތަކެއް ކުރިއަށް ގެންގޮސްފި އެވެ.
ވެރިރަށް މޮސްކޯގެ ލުޒްނިކީ ސްޓޭޑިއަމްގައި ބޭއްވި ކޮންސެޓުގައި ރައީސް ލެޑިމިއަ ޕުޓިން ބައިވެރިވެވަޑައިގެން، ރައްޔިތުންނާ މުހާތަބު ކުރެއްވި އެވެ.
ދައުލަތުގެ މުވައްޒަފުން ބުނީ ކޮންސެޓުގައި ބައިވެރިވާން އެ މީހުންނަށް އެންގި ކަމަށެވެ. ސްކޫލްތަކުގައި ވެސް "ކްރައިމިއަން ސްޕްރިންގް"ގެ ނަމުގައި ހާއްސަ ފިލާވަޅުތަކެއް ދަނީ ނަގައިދެމުންނެވެ.
ޔޫކްރެއިންގައި މިހާރު ކުރަމުންދާ ހަނގުރާމައިގައި ދެކުނު އައްސޭރިފަށުގެ ސިޓީތަކާއި އަވަށްތަކަށް ރަޝިއާ ސިފައިން ދަތުރު ފެށީ ކްރައިމިއާގައި ހުރި މަރުކަޒުތަކުންނެވެ.
ރަޝިއާގެ އޮފިޝަލުން ބުނީ ހާއްސަ ކޮންސެޓަށް 200،000 އަށް ވުރެ ގިނަ މީހުން ޖަމާވި ކަމަށެވެ. އެ ތަނުގެ ރަސްމީ ކެޕޭސިޓީއަކީ 81،000 މީހުންނެވެ. ނަމަވެސް ސްޓޭޑިއަމްގެ ބޭރުގައި ވެސް ގިނަ ބަޔަކު ތިއްބެވެ.
ރައްޔިތުންނާ މުހާތަބު ކުރައްވަމުން ޕުޓިން ވަނީ ރަޝިއާ ސިފައިންނަށް ތައުރީފު ކުރައްވައި، ފައުޖުގެ ކިބައިން ފެންނަނީ އާދަޔާ ހިލާފު އެއްބައިވަންތަކަމެއްގެ ގޮތުގައި ސިފަކުރައްވާފަ އެވެ.
ޕުޓިންގެ ވާހަކައިގެ ވަކި ހިސާބަކުން، ކޮންސެޓްގެ ލައިވް ކަވަރޭޖް ކުއްލިއަކަށް ދައުލަތުގެ ހުރިހާ ބޮޑެތި ޓީވީ ޗެނަލްތަކުން މެދުކެނޑުނެވެ. ރަޝިއާއިން ބުނީ އެއީ ދިމާވި ޓެކްނިކަލް މައްސަލައެއް ކަމަށެވެ.
މޮސްކޯގެ މޭޔަރު ސާގެއި ސޮބްޔާނިން އަދި ދައުލަތުގެ ޓީވީގެ ނޫސްވެރިޔާ މާގަރީޓާ ސިމޮންޔަން އާއި ފޮރިން މިނިސްޓްރީގެ ތަރުޖަމާން މާރިއާ ޒަހަރޯވާ ވެސް ކޮންސެޓުގައި ވާހަކަދެއްކެވި އެވެ.
