ރަޝިއާ އާއި ޔޫރަޕް ގުޅިގެން މާސްގެ ބިމަށް ކުޑަ އުޅަނދެއް ފޮނުވަން ރޭވި މިޝަން މެދުކަނޑާލައިފި އެވެ.
"ޔޫކްރެއިންއާ ދެކޮޅަށް ހިންގަމުންދާ ހަނގުރާމައިގެ ސަބަބުން ކުރިމަތިވެފައިވާ ހިތި ނަތީޖާ އާއި މީހުންގެ ފުރާނަ ގެއްލިދިޔުމާ މެދު އަޅުގަނޑުމެން ހިތާމަ ކުރަން،" ޔޫރަޕިއަން ސްޕޭސް އެޖެންސީން ބުންޏެވެ.
"އެކްސޯ މާސް" މިޝަންގެ ތެރެއިން ރޭވީ ރަޝިއާގެ ލޯންޗަރެއްގެ އެހީގައި އަންނަ ސެޕްޓެމްބަރު މަހު ޖައްވަށް ރޮކެޓެއް ފޮނުވުމަށެވެ.
އެ ރޮކެޓުގައި ގެންދާ ކުޑަ އުޅަނދެއް މާސްގެ ބިމަށް ތިރި ކުރުމަށް ފަހު ގިނަ ތަހުލީލަތައް ހިންގަން ރޭވި އެވެ. އެގޮތުން ވެލިގަނޑު ކޮނެ، އެއްވެސް ދިރުމެއްގެ އަސަރު ހުރިތޯ ބެލުމަކީ މައިގަނޑު ބޭނުމެވެ.
ނަމަވެސް ޔޫކްރެއިން ހަނގުރާމައާ އަޅާފައިވާ ދަތިކުރުމުގެ ފިޔަވަޅުތަކަށް ރައްދެއްގެ ގޮތުން ރަޝިއާގެ ޖައްވީ އިދާރާ ރޮސްކޮސްމޯސް އިން ވަނީ ރޮކެޓް ލޯންޗު ކުރުން ސަސްޕެންޑުކޮށްފަ އެވެ.
"އެކްސޯ މާސް" މިޝަން އެންމެ ފުރަތަމަ ފަށަން އުޅުނީ 2020 ގަ އެވެ. ނަމަވެސް ކޮވިޑް ބަލިމަޑުކަމާ ހެދި މިޝަން ފަސްކުރަން ޖެހުނީ އެވެ.
