ސްރީލަންކާއަށް ބޭނުންވާ ކާބޯތަކެއްޗާއި، ބޭސް އަދި އެހެނިހެން ޒަރޫރީ ތަކެތި ހޯދަން އިންޑިއާއިން އެއް ބިލިއަން ޑޮލަރުގެ ކްރެޑިޓް ލައިން ދޫކުރަން އެއްބަސްވުމުގައި ސޮއިކޮށްފި އެވެ.
ސްޓޭޓް ބޭންކް އޮފް އިންޑިއާ (އެސްބީއައި) އަދި ލަންކާ ސަރުކާރާ ދެމެދު އެއްބަސްވުމުގައި ސޮއިކުރީ ބުރާސްފަތި ދުވަހު އެވެ. ލަންކާ ފިނޭންސް މިނިސްޓަރު ބެސިލް ރާޖަޕަކްސަ ވަނީ ދެ ދުވަހުގެ ދަތުރެއް އިންޑިއާއަށް ކުރައްވާފަ އެވެ.
ބެސިލް އާއި އިންޑިއާގެ ފިނޭންސް މިނިސްޓަރު ނިރްމަލާ ސިތަރަމަން އަދި އެކްސްޓާނަލް އެފެއާޒް މިނިސްޓަރު އެސް ޖެއިޝަންކަރާ ދެމެދު ނިއުދިއްލީގައި ބުރާސްފަތި ދުވަހު ބައްދަލުވުމެއް އޮތެވެ.
ބުދަ ދުވަހު ބެސިލް ވަނީ ބޮޑު ވަޒީރު ނަރެންދް މޯދީއާ ބައްދަލުކުރައްވައި، ސްރީލަންކާގެ އިގްތިސާދަށް އިންޑިއާއިން އެހީވާތީ ޝުކުރު އަދާ ކުރައްވާފަ އެވެ.
އިންޑިއާއިން ވަނީ ލަންކާގެ ބޭރު ފައިސާގެ ރިޒާވް ހަރުދަނާ ކުރުމަށް ދާދި ފަހުން 500 މިލިއަން ޑޮލަރުގެ ކަރަންސީ ސްވޮޕެއް ވެސް ހަދާފަ އެވެ. އެހެންވެ، ދެ ގައުމުގެ ދެމެދުގައިވާ ޖުމްލަ ކަރަންސީ ސްވޮޕްގެ އަދަދު ވަނީ 900 މިލިއަން ޑޮލަރަށް އަރާފަ އެވެ.
އޭގެ އިތުރުން ސްރީލަންކާއިން އިންޑިއާއަށް ދައްކަން ޖެހޭ 500 މިލިއަން ޑޮލަރުގެ ދަރަންޏެއް ދެއްކުމަށް އިތުރު ވަގުތު ވެސް ދީފައިވެ އެވެ.
ތެލުގެ އިތުރުން ހަނޑުލާއި ބައެއް އެހެން ޒަރޫރީ ކާބޯތަކެތީގެ ދަތިކަން ވެސް ސްރީލަންކާއަށް ވަނީ ކުރިމަތިވެފަ އެވެ. އެހެންވެ، ސުޕަމާކެޓްތަކުން ތަކެތި ވިއްކަނީ ރޭޝަންކޮށްގެންނެވެ.
ތަކެތީގެ ދަތިކަމާ ހެދި ޖެނުއަރީ މަހު އިންފްލޭޝަން ރޭޓް ރެކޯޑް މިންވަރަކުން 25 ޕަސެންޓަށް އުފުލުނެވެ.
ސްރީލަންކާއަށް ބޭރު ފައިސާ ލިބޭ މައިގަނޑު އެއް ސިނާއަތަކީ ފަތުރުވެރިކަމެވެ. ނަމަވެސް ކޮވިޑް ބަލިމަޑުކަމުގައި އެ ސިނާއަތް ވަނީ ހުއްޓިފަ އެވެ.
