މަޝްހޫރު ވިޔަފާރިވެރިޔާ މުހައްމަދު ޝަވީދު ހިމެނޭ ދޮޅު މިލިއަން ރުފިޔާގެ މައްސަލައެއްގައި ހުކުމް ތަންފީޒުކުރުމާއި، އެ މައްސަލައިގައި ހިމެނޭ ފައިސާތަކެއް ހިފަހައްޓަން ސިވިލް ކޯޓުން އިއްޔެ ނެރުނު އަމުރެއް ތަންފީޒުކުރުން މަޑުޖައްސާލަން ހައި ކޯޓުން މިއަދު އަމުރުކޮށްފި އެވެ.
ސިވިލް ކޯޓުން ހުކުމް ތަންފީޒުކުރުމުގެ މައްސަލައަކާ ގުޅިގެން އިއްޔެ ނެރުނު އެ ކޯޓު އަމުރުގައި ޝަވީދު ހިމެނޭހެން އޭނާގެ އާއިލާގެ ޖުމްލަ އަށް މީހެއްގެ އެކައުންޓް ފްރީޒްކުރުމަށް ބޭންކް އޮފް މޯލްޑިވްސްގެ މައްޗަށް ވަނީ އަންގައިފަ އެވެ.
އަދި އެ އެކައުންޓްތަކުގައި 1.4 މިލިއަން ރުފިޔާގެ އަދަދެއް ހުރި ނަމަ އެ ފައިސާ ހިފަހައްޓައި ސިވިލް ކޯޓަށް އެންގުމަށް އެ ކޯޓުން ވަނީ ބީއެމްއެލްގެ މައްޗަށް އަންގައިފަ އެވެ.
އެ މައްސަލައިގައި ޝަވީދުގެ އިތުރުން ހިމެނޭ މަރިޔަމް ޝިފާގެ އެދުމަކަށް ހައި ކޯޓުން މިއަދު ނެރުނު އަމުރުގައި ބުނީ ސިވިލް ކޯޓުގެ ހުކުމް ތަންފީޒުކުރުން މިހިނދުން މަޑުޖައްސާ ނުލައިފިނަމަ އެ މައްސަލަ ހުށަހެޅި ޝިފާގެ މަސްލަހަތަށް އުނިކަމެއް އައިސްދާނެފަދަ ކަންކަން ހުރިކަމަށް ފާހަގަވާ ކަމަށެވެ.
އެހެންކަމުން ހައި ކޯޓުން ވަކި ގޮތެއް އަންގަންދެން, ސިވިލް ކޯޓުގެ އެ ގަޒިއްޔާގެ ހުކުމް ތަންފީޒުކުރުމަށް އެއްވެސް ފިޔަވަޅެއް ނޭޅުމަށް ހައި ކޯޓުން ވަނީ ސިވިލް ކޯޓުގެ މައްޗަށް އަމުރުކޮށްފަ އެވެ.
އެ މައްސަލައިގައި ޝިފާގެ އިތުރުން ދެން ހިމެނެނީ ހ. ވާލީވިލާ އަށް ނިސްބަތްވާ މުހައްމަދު ޝަވީދު، ފާތިމަތު ފަރީދާ، އަހުމަދު ޝިޔާމް، އާމިނަތު އަޝްފާ، އާމިނަތު ޝިފާ، ހަސަން ޝިޔާމް، އަލީ ޝިޔާމް އަދި ސ. މަރަދޫފޭދޫ، ފަހާގެ، ހައުލަތު ފަހީމް އެވެ.
ސިވިލް ކޯޓުން ވަނީ އެ އެންމެންގެ ބޭންކް އެކައުންޓްތަކުގެ މައުލޫމާތު ދިނުމަށާއި އެ އެކައުންޓުތަކުގައި 1.4 މިލިއަން ރުފިޔާގެ އަދަދެއް ހުރެއްޖެނަމަ އެ ފްރީޒްކުރުމަށް އަންގައިފަ އެވެ.
ސިވިލް ކޯޓުން ނެރުނު އަމުރަކީ ޝަވީދު އަދި ޝިފާގެ އާއިލާ މީހެއްކަމުގައިވާ މުހައްމަދު އަނީސް، އެ އަށް މީހުނާ ދެކޮޅަށް 2011 ވަނަ އަހަރު ކުރި ދައުވާއެއްގެ މައްސަލައެއްގެ ހުކުމް ތަންފީޒުކުރުމުގެ އަމުރެކެވެ.
އެ މައްސަލަ އިސްތިއުނާފީ މަރުހަލާތަކުން ނިމުނީ މިދިޔަ އަހަރު، ސުޕްރީމް ކޯޓުން ސިވިލް ކޯޓުގެ ހުކުމަށް ތާއިދުކުރުމުންނެވެ.
ޝަވީދާ ދެކޮޅަށް އަނީސް 2011 ވަނަ އަހަރު ހުށަހެޅި މައްސަލައަކީ އަނީސްގެ ވެސް ހިއްސާ އޮންނަ އާއިލީ ކުންފުނިތަކެއްގައި ހުރި އަނީސްގެ އަމިއްލަ މުދާ ހިމެނޭހެން މުދާތަކެއް ލިކުއިޑޭޓްނުކޮށް އާއިލާގެ މެމްބަރުންތަކެއްގެ މެދުގައި ވާރިސުންގެ ގޮތުގައި ބަހާލި މައްސަލައެކެވެ. އެ މައްސަލައިގައި އަނީސް ހުށަހެޅި މައްސަލަ 2011 ވަނަ އަހަރު ސިވިލް ކޯޓުން ނިންމީ އޭނާއާ އެއްކޮޅަށެވެ.
އެ މައްސަލައިގައި ހިމެނޭ ޝަވީދަކީ ރާއްޖޭގެ ކުޅިވަރުގެ ދާއިރާގައި މުހިންމު މަގާމުތަކެއް މީގެ ކުރިން އަދާކުރައްވާފައިވާ ބޭފުޅެކެވެ. އެގޮތުން އޭނާ ވަނީ މީގެ ކުރިން އޮލިމްޕިކް ކޮމިޓީގެ ރައީސްކަން ކުރައްވައިފަ އެވެ.
