ހާހަކަށް ވުރެ ގިނަ އާއްމުން ރައްކާތެރިކަން ހޯދުމަށް ވަދެ ތިބި ތިއޭޓަރަކަށް ރަޝިއާއިން ބޮން އަޅާފައިވާ ކަމަށް ޔޫކްރެއިން ސަރުކާރުން ތުހުމަތުކޮށްފި އެވެ.
ދެކުނު މަރިޔުޕޯލް ސިޓީގެ ޑެޕިއުޓީ މޭޔަރު ސާގެއި އޮރްލޯވް ވިދާޅުވީ އެ އިމާރާތުގައި 1000-1200 އާ ދެމެދުގެ އަދަދަކަށް މީހުން ތިބި ކަމަށެވެ. ހަމަލާގައި މަރުވީ ކިހާ އަދަދެއްގެ މީހުން ކަމެއް ސާފެއް ނޫނެވެ.
ހަމަލާގެ ފޮޓޯތައް ދައުރުވާން ފަށާފައިވާ އިރު، ތިން ފަންގިފިލާގެ އިމާރާތަށް ވަނީ ބޮޑެތި ގެއްލުންތަކެއް ލިބިފަ އެވެ. މީގެ ކުރިން ރަޝިއާގެ ހަމަލާތައް އަމާޒުކޮށްފައިވާ ތަންތަނުގެ ތެރޭގައި މާބަނޑު އަންހެނުންނަށް ހާއްސަ ހޮސްޕިޓަލަކާއި، ފައްޅިއަކާއި އާއްމުން ދިރިއުޅޭ އެޕާޓްމަންޓް އިމާރާތްތައް ހިމެނެ އެވެ.
އެމެރިކާގެ މެކްސާ ކުންފުނިން މާޗް 14 ވަނަ ދުވަހު ނަގާފައިވާ ސެޓެލައިޓް ފޮޓޯތަކުން ފެންނަ ގޮތުގައި އެ އިމާރާތުގައި ކުޑަކުދިން ތިބިކަން އަންގައިދިނުމަށް ރަޝިއާ ބަހުން "ކުޑަކުދިން" ލިޔެފައިވެ އެވެ.
ތިއޭޓަރު ހުންނަ އިމާރާތުގެ ބިމުގައި ރަޝިއާ ބަހުން "ކުޑަކުދިން" ލިޔެފައި.
ޔޫކްރެއިންގެ ރައީސް ވޮލޮޑިމިރް ޒެލެންސްކީ އެ ހަމަލާ ކުށްވެރި ކުރެއްވުމަށް ފަހު ވިދާޅުވީ ރަޝިއާއިން ތިއޭޓަރަށް އަމާޒު ކުރީ ގަސްދުގައި ކަމަށެވެ.
ޒެލެންސްކީ އާއި ފޮރިން މިނިސްޓަރު ޑިމިޓްރޯ ކުލެބާ އަދި މަރިޔުޕޯލް ސިޓީ ކައުންސިލުން ބުނީ ރަޝިއާއިން ދަނީ "ހަނގުރާމައިގެ ޖަރީމާތައް" ހިންގަމުން ކަމަށެވެ.
ހަނގުރާމަ ފެށި ފަހުން އެ ސިޓީން 2،400 އަށް ވުރެ ގިނަ މީހުން މަރުވެފައިވާ ކަމަށް ބެލެވެ އެވެ. މީހުންގެ ހަށިތައް ވަޅުލާން ބޮޑެތި ވަޅުތައް ވަނީ ކޮނެފަ އެވެ.
އެ ސިޓީގައި 300،000 މީހުން ތާށިވެފައިވާ އިރު، ކަރަންޓާއި ފެނާއި ގޭހުގެ ހިދުމަތް ކެނޑިފައި ވާތާ އެތައް ދުވަހެއް ވެއްޖެ އެވެ.
ކާބޯތަކެއްޗާއި ފެނުގެ ސަޕްލައި ހުސްވާން ކައިރިވެފައިވާ އިރު، އިންސާނީ އެހީ އެތެރެ ކުރުމުގެ ފުރުސަތު ވެސް ރަޝިއާގެ ފައުޖުން ނުދޭ ކަމަށް ޔޫކްރެއިނުން ބުނެ އެވެ.
ހަމަލާގެ ހަބަރު ފެތުރެން ފެށުމާ އެކު ރަޝިއާގެ ޑިފެންސް މިނިސްޓްރީން ބުނީ މަރިޔުޕޯލްގެ ތިއޭޓަރަށް އެ ގައުމުން ހަމަލާއެއް ނުދޭ ކަމަށެވެ.
