ނ. ވެލިދޫ ބަނދަރުގެ ހުޅަނގު ކޮޅުގައި ޒަމާނީ ބައްޓަމައަކަށް ފައްކާކުރަމުން އަންނަ "އޯ ތުރީ" ޕެޓްރޯލް ޝެޑުގެ އަޑީ ޓޭންކު ތަކުގައި 54،000 ލިޓަރުގެ ތެޔޮ ރައްކާކުރެވެ އެވެ. އެތަނުގެ ފިއުއެލް ސިސްޓަމްތައް ޑިޒައިންކޮށްފައިވަނީ އަމިއްލަ އަށް ހިދުމަތް ހޯދޭ ގޮތަށް "ސެލްފް ސާވިސް" ކޮންސެޕްޓަށެވެ. އިމާރާތުގެ ފަރުމާގައި ޒަމާނީ ހިތްގައިމު ކަމެވެ.
"މިތަނަކީ ދިހަ، ވިއްސަކަށް އަހަރުގެ ހައްލެއް ނޫނެވެ. ފަންސާސް ފަސްދޮޅަސް އަހަރު ކުރިއަށް ވިސްނާފައި ކުރާ އަގުބޮޑު އިންވެސްޓްމަންޓް،" އެކެވެ. ވެލިދޫ އަށް އުފަން ވިޔަފާރިވެރިޔާ، "ބަހާރު" އަބްދުﷲ އިބްރާހިމް، އޭނާގެ ޕާޓްނަރުން، ހަސަން ހަލީމް އާއި އަބްދުއްރަޝީދު އަލީ (ގައްޒަ) އުފަން ރަށަށް އޮތް ލޯތްބާއި އުންމީދުގައި، ރަށުގެ ބަނދަރުގެ ހިތްގައިމުކަމުގެ އެއް އަރިމަތީގައި އިމާރާތްކޮށް ނިންމަމުންދާ ޕެޓްރޯލް ޝެޑުގެ ފަހުރުގައި ބުނެލީ މިހެންނެވެ.
އާބާދީގައި 2700 އެއްހާ މީހުން ދިރިއުޅޭ ވެލިދޫ އަކީ ނޫނު އަތޮޅުގެ އެންމެ ތިޔާގި ރަށެވެ. އެންމެ ބޮޑު އާބާދީއެއް އޮތީ އެރަށުގަ އެވެ. އެކަމަކު ތެލުގެ ވިޔަފާރި އަކީ، އަތޮޅުގެ ހުރިހާ ރަށެކޭ އެއްގޮތަށް ވެލިދޫ އަށް ވެސް ބޮޑުވެފައިވާ ދައްޗެކެވެ. ބޮޑު ބިރެކެވެ.
"އަދިވެސް ޕެޓްރޯލާއި ތެޔޮ ވިއްކަނީ ގެތަކުގައި ގޯތި ތެރޭގައި ފިހާރަތަކުގައި. މިކަމުގެ ނުރައްކާތެރިކަން އެހާ ބޮޑު. ރަށަށް މެހުމާނަކު އެރިޔަސް، ސައިކަލަށް ޕެޓްރޯލް ފޮދެއް ހޯދަން ކުރަން ޖެހެނީ އުނދަގޫ މަސައްކަތެއް،" އޭނާ ބުންޏެވެ.
ބަހާރު އާއި އޭނާގެ ޕާޓްނަރުން، ހަސަން ހަލީމް އާއި އަބްދުއްރަޝީދު އަލީ (ގައްޒަ) ގުޅިގެން ހިންގާ އޯ ތްރީ ކުންފުނިން ޕެޓްރޯލް ޝެޑްގެ މަޝްރޫއާ ހަވާލުވީ 2018 ވަނަ އަހަރު އެވެ. އެއީ ކައުންސިލުން އެފަދަ ޕްރޮޖެކްޓަކަށް ހުޅުވާލައި ބިން ދޫކުރަން ނިންމުމާ ގުޅިގެންނެވެ. ނަމަވެސް ކޮރޯނާ ވައިރަހުގެ ޕެންޑެމިކް ޖެހި، ނިންމަން ބޭނުންވި ސްޕީޑުގައި ކުރިއަށް ނުގޮސް ޕެޓްރޯލް ޝެޑުގެ މަސައްކަތް ވެސް ލަސްވި އެވެ. މިހާރު ގާތްގަނޑަކަށް ފިނިޝިން ސްޓޭޖުގައި އޮތް ޕެޓްރޯލްޝެޑް ހުޅުވަން ދެން އޮތީ ކުޑަ ދުވަސްކޮޅެކެވެ.
ވެލިދޫގައި ހަދަމުންދާ ޕެޓްރޯލް ޝެޑް: މިތަނަކީ ރާއްޖޭގެ ފުރަތަމަ ސެލްފް ސާވިސް ޕެޓްރޯލް ޝެޑު ފޮޓޯ މުހައްމަދު ޝާބިން / އަދަދު
"އަޅުގަނޑުމެން މަސައްކަތްކުރީ ރޯދަ މަހަށް ހުޅުވޭ ވަރު ކުރަން. އެކަމަކު ބައެއް މެޓީރިއަލް ލިބުން ލަސްވެގެން ބާކީ މި އޮތް 15 ވަރަކަށް ދުވަސް ތެރޭގައި ނުނިމިދާނެ. މި ބަލަނީ ވީހާވެސް އަވަހަށް ހިދުމަތް ފައްޓަން،" ރަށު ކޮޅުގައި ޝެޑުގެ މަސައްކަތް މެނޭޖްކުރާ ވެރިޔާ، އާދަމް އިބްރާހިމް (އެޑަމް) ބުންޏެވެ.
ތެލުގެ ވިޔަފާރިއަށް ރައްކާތެރިކަން، ވެލިދޫއަށް އައިކޮނިކް ބިނާ އެއް
ބަހާރުގެ ވިސްނުމުގައި "އޯ ތުރީ" ޕެޓްރޯލްޝެޑް ވެގެންދާނީ ވެލިދޫ އަށް ރައްކާތެރިކަމާއެކު ތެލުގެ ވިޔަފާރި ކުރުމަށް ފަހިވާ ފުރުސަތަކަށް އެކަންޏެއް ނޫނެވެ. އެތަނުގެ ހިތްގައިމު ފަރުމާއާ އެކު ތަން އެއްކޮށް ނިމޭއިރު، އެ ޝެޑް ވެލިދޫގެ "އައިކޮނިކް" ބިނާ އަކަށް ވާނެ އެވެ.
"ރާއްޖޭގެ މޮޅު ޑިޒައިނަރުންނާއި އިންޖީނަރުން ލައްވައި ޑިޒައިން ކޮށްގެން، ކުރެހުމަށް އެކަނި ވެސް އެއް ލައްކަ ރުފިޔާ އަޅުގަނޑުމެން ހޭދަކުރިން. އާންމު އުސޫލަކުން ވިސްނާފައި، އަހަރެމެންނަށް ހަތަރުގަނޑު ފާރު ރާނައި، ޑިސްޕެންސަރު ބައިންދާފައި ތެޔޮ އަޅާލެވޭނެ. އެކަމަކު އެ ފެންވަރުގައި އެހާ ހިތްގައިމު ޑިޒައިނަކަށް ޝެޑު ހެދީ އަހަރެމެންގެ އުފަން ރަށަށް ތަރައްގީ އާއި ރީތި ނަން ގެންނަން ބޭނުންވާތީ،" ބަހާރު ބުންޏެވެ.
އޭނާ ބުނީ ތަނަށް ފައްތާފައިވަނީ ހުޅަނގުގެ ގައުމުތަކުގައި ގެންގުޅޭ "ސެލްފް ސާވިސް" ކޮންސެޕްޓު ކަމަށެވެ. ނަމަވެސް ރާއްޖޭގެ ބެންކުތަކުން އަދި އެފަދަ ހިދުމަތް ދޭން ފަށާފައި ނުވާތީ ކަސްޓަމަރުންނަށް އެ ފުރުސަތު ދޭނެ ގޮތް ފަހިވެފައި ނެތް ކަން ވެސް ފާހަގަކުރި އެވެ.
ވެލިދޫގައި ހަދަމުންދާ ޕެޓްރޯލްޝެޑްގެ މަތިން ނަގާފައިވާ ޑްރޯން ފޮޓޯ އެއް . އަދަދު ފޮޓޯ/މުހައްމަދު ޝާބިން
"ބޭންކް ތަކުން އަދި ނެތް ކާޑު ޖަހާލައިގެން ކެނޑޭ ގޮތެއް. އެކަމަކު އެގޮތަށް އެ މެޝިން ތައް ޑިޒައިންކޮށްފައި ހުރީ. އެ ހިދުމަތް ލިބޭހާ އަވަހަކަށް އެތަން އޭގެ އަސްލު ކޮންސެޕްޓަށް ދާނެ." ބަހާރު ބުންޏެވެ.
ބަހާރު ގަބޫލުކުރާ ގޮތުގައި ވިޔަފާރިއެއްގެ ކާމިޔާބީގައި ދުރުވިސްނުން ގެންގުޅުމަކީ މުހިންމު ކަމެކެވެ. އެ ޕްޓްރޯލް ޝެޑަކީ އޭނާގެ އެފަދަ މަސައްކަތެކެވެ. އެ މަސައްކަތުން ވެލިދޫއަށް ޒަމާންތަކެއް ވަންދެން ފައިދާ ވާނެ ކަމަށް އޭނާ ގަބޫލުކުރެ އެވެ. މުސްތަގުބަލުގައި ވެލިދޫ އަކީ އާބާދީ އިތުރުވާނެ ކަމުގެ ޔަގީންކަން ބޮޑު ރަށެއް ކަމަށް ގަބޫލުކުރެވޭތީ، މީގެ އަހަރުތަކެއް ފަހުން އޭނާ އަށް އެތަނުން ނެރެން ބޭނުންވާ ހަގީގީ ނަފާ ވެސް ލިބެން ފަށާނެ ކަމަށް ވެސް ބަހާރު ދެކެ އެވެ.
