ރަޝިއާގެ ސިފައިން ޔޫކްރެއިނަށް އަރައި ކުރަމުންދާ ހަނގުރާމަ ވަގުތުން މެދުކަނޑާލުމަށް އދ. ގެ އެންމެ މަތީ ކޯޓުން ބުދަ ދުވަހު އަމުރުކޮށްފި އެވެ.
"ޔޫކްރެއިންގެ ބިމުގެ ސަރަހައްދުގައި ފެބްރުއަރީ 24 ވަނަ ދުވަހު ރަޝިއާއިން ފެށި އަސްކަރީ އޮޕަރޭޝަން ވަގުތުން މެދުކަނޑާލަން ޖެހޭ،" ފަނޑިޔާރު ޖޮއޭން ޑޮނޮހިޔު ވިދާޅުވި އެވެ.
"ރަޝިއާއިން ބާރުގެ ބޭނުން ކުރާ ގޮތްތަކާ މެދު ކޯޓުން ވަރަށް ބޮޑަށް ކަންބޮޑުވޭ. އަދި އެ އަމަލުތަކަކީ ބައިނަލްއަގްވާމީ ގާނޫނާ ހިލާފު ސީރިއަސް މައްސަލަތަކެއް."
ރަޝިއާއާ ދެކޮޅަށް އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އަށް މައްސަލަ ހުށަހެޅީ މިދިޔަ ފެބްރުއަރީ މަހު ޔޫކްރެއިން ސަރުކާރުންނެވެ.
ޔޫކްރެއިނުން ބުނީ އެ ގައުމުގެ އިރުމަތީގައި އޮންނަ ޑޮނެސްކް އަދި ލުހާންސްކްގައި ސަރުކާރުން ގިނަ އަދަދެއްގެ ބަޔަކު މަރަމުންދާ ކަމަށް ރަޝިއާއިން ދޮގު ތުހުމަތެއް ކުރި ކަމަށެވެ.
އެ ތުހުމަތުގެ ބޭނުން ހިފައި، ރަޝިއާއިން ބުނަމުން ދަނީ ޔޫކްރެއިންގައި ހަނގުރާމަ ފަށަން ޖެހުނީ ޑޮނެސްކް އަދި ލުހާންސްކްގައި އިންސާނިއްޔަތާ ހިލާފު ބޮޑެތި ޖަރީމާ ހިންގާތީ ކަމަށެވެ.
ނަމަވެސް ޔޫކްރެއިނުން ބުނީ "ޖަރީމާގެ އަމަލުތައް" ހިންގަން ރާވަމުން ދަނީ ރަޝިއާއިން ކަމަށާއި، ފެބްރުއަރީ 24 ވަނަ ދުވަހު ރައީސް ލެޑިމިއަ ޕުޓިން ފެއްޓެވި ހަމަލާތަކުން އެ މަންޒަރު ފެންނަ ކަމަށެވެ.
އެހެންވެ، ޔޫކްރެއިން ސަރުކާރުން ކޯޓުގައި އެދުނީ "އަސްކަރީ އޮޕަރޭޝަންތައް ވަގުތުން މެދުކަނޑާލުމުގެ" އަމުރެއް ރަޝިއާއާ ދެކޮޅަށް ނެރެދިނުމަށެވެ. މައްސަލައިގެ ހުކުމަކާ ހަމައަށް ދެވެންދެން އެ އަމުރު ދަމަހައްޓައިދިނުމަށް ވެސް އެދުނެވެ. ހުކުމަކާ ހަމައަށް ދިޔުމަށް އަހަރުތަކެއް ހޭދަވުން އެކަށީގެންވެ އެވެ.
މައްސަލައިގެ އަޑުއެހުން މިދިޔަ ހަފްތާގައި ފެށުމުން ރަޝިއާއިން ކޯޓަށް ހާޒިރެއް ނުވެ އެވެ. ރަޝިއާގެ ސަފީރު އެލްގެޒެންޑާ ޝުލްގުން ކޯޓަށް ފޮނުއްވި ސިޓީއެއްގައި ވިދާޅުވީ ރަޝިއާއިން އަޑުއެހުންތަކުގައި ބައިވެރިނުވާނެ ކަމަށެވެ.
އައިސީޖޭ އުފެއްދީ ދެ ވަނަ ބޮޑު ހަނގުރާމައަށް ފަހު އދ. ގެ މެމްބަރު ގައުމުތަކުގެ މެދުގައި އުފެދޭ ހިޔާލު ތަފާތުވުން ހައްލު ކުރުމަށެވެ. އެ ކޯޓުގެ ނިންމުންތަކަށް ގާނޫނީ ގޮތުން އަމަލު ކުރަން ޖެހުނު ނަމަވެސް، އަމަލު ނުކުރާ ނަމަ ތަންފީޒު ކުރެވޭނެ ގޮތެއް ނޯވެ އެވެ.
