މޮންފިލްސް އަތުން ބަލިވެ މެޑްވެޑޭވް އަށް ދުނިޔޭގެ ރޭންކިން އެއް ވަނަ ގެއްލެނީ

އިންޑިއަން ވެލްސް، ޔުނައިޓެޑް ސްޓޭޓްސް (މާޗް 15) - މިހާރު ކުރިއަށްދާ އިންޑިއަން ވެލްސް ޓެނިސް މުބާރާތުގެ ގަދަ 32 ކުޅުންތެރިންގެ ބުރުގައި ފްރާންސްގެ ގައެލް މޮންފިލްސް އަތުން ބަލިވެ، ރަޝިއާގެ ޑަނީލް މެޑްވެޑޭވް އަށް ދުނިޔޭގެ ރޭންކިންގެ އެއް ވަނަ ގެއްލޭނެކަން ކަށަވަރުވެއްޖެ އެވެ.

އުމުރުން 35 އަހަރުގެ މޮންފިލްސް އަތުން މެޑްވެޑޭވް ބަލިވީ 4-6, 6-3, 6-1 އިންނެވެ. މި ނަތީޖާއާ އެކު ދެން އެންމެ އަވަހަށް ނެރޭ ޓެނިސް ރޭންކިން އިން މެޑްވެޑޭވް ފަހަތަށް ޖައްސާލުމަށް ފަހު ދެން އެއް ވަނަ އަށް އެރުމުގެ ފުރުސަތު އޮތީ ކޮވިޑް ވެކްސިން މައްސަލައިގައި އިންޑިއަން ވެލްސް މުބާރާތުގައި ނުކުޅެން ނިންމި ސާބިއާގެ ނޮވަކް ޖޮކޮވިޗް އެވެ.

ދެ ގަޑިއިރާއި ހަ މިނިޓް ވަންދެން ކުޅުނު މެޗުގައި މެޑްވެޑޭވް ބަލިކުރުމަށް ފަހު މޮންފިލްސް ބުނީ ފޯމުގައި ރަނގަޅަށް ކުޅެލެވޭ ދުވަހެއްގައި އޭނާ އަށް ކޮންމެ ކުޅުންތެރިއަކު ވެސް ބަލިކުރެވޭނެ ކަމުގެ ޔަގީންކަން އޮންނަ ކަމަށެވެ.

މެޑްވެޑޭވްއާ ދެކޮޅަށް ކުޅުނު މެޗުގެ ތެރެއިން މޮންފިލްސް ބޯޅަ ފޮނުވާލަނީ.-- ފޮޓޯ: އޭއެފްޕީ

އޭޓީޕީ މުބާރާތެއްގެ މެޗެއްގައި މޮންފިލްސް އެންމެ ފަހުން ދުނިޔޭގެ ރޭންކިން އެއް ވަނައިގައި އޮތް ކުޅުންތެރިއަކު ބަލިކުރީ 2009 ވަނަ އަހަރު އެވެ.

ދުނިޔޭގެ ރޭންކިންގެ ފަސް ވަނައިގައި އޮތް ގްރީސްގެ ސްޓެފާނޯސް ސިޓްސިޕާސް ވަނީ އެމެރިކާގެ 21 އަހަރުގެ ޖެންސަން ބްރޫކްސްބައި އަތުން ބަލިވެފަ އެވެ. ބްރޫކްސްބައި މޮޅުވި މި މެޗުގައި ސެޓުތައް ދިޔައީ 1-6, 6-3, 6-2 އިންނެވެ.

ނަޑާލްގެ ރެކޯޑް ކުރިއަށް، ޖެހިޖެހިގެން 17 ވަނަ މޮޅު

މި ފަހަރުގެ އޮސްޓްރޭލިއަން އޯޕަން ކާމިޔާބުކޮށް ރެކޯޑް 21 ވަނަ ގްރޭންޑް ސްލޭމް ތަށި އުފުލާލި ސްޕެއިނުގެ ރަފައެލް ނަޑާލް އަންނަނީ މި އަހަރުގެ ރަނގަޅު ފޯމު ދަމަހައްޓަމުންނެވެ. އުމުރުން 35 އަހަރުގެ ނަޑާލް ވަނީ 2022 ގައި މިހާތަނަށް ކުޅުނު 17 މެޗުން މޮޅުވެފަ އެވެ. މި އަހަރުގެ މެލްބަން ސަމާ ސެޓް މުބާރާތާއި އޮސްޓްރޭލިއަން އޯޕަން އަދި މެކްސިކަން އޯޕަންގެ ޗެމްޕިއަންކަން ހޯދި ނަޑާލަކީ މި ވަގުތު އެންމެ ރަނގަޅު ފޯމެއްގައި ކުޅެމުން އަންނަ ކުޅުންތެރިޔާ އެވެ.

އެވަންސް އަތުން މޮޅުވި މެޗަށް ފަހު ނަޑާލް އުފާފާޅުކުރަނީ.-- ފޮޓޯ: އޭއެފްޕީ

އިންޑިއަން ވެލްސްގެ ގަދަ 32 ކުޅުންތެރިންގެ ބުރުގައި ނަޑާލް ވަނީ އިންގްލެންޑް ޑޭން އެވާންސް ބަލިކޮށްފަ އެވެ. އެ މެޗުގެ ސެޓުތައް ދިޔައީ 7-5 6-3 އިންނެވެ.

ދުނިޔޭގެ ރޭންކިންގެ ހަތަރު ވަނައިގައި އޮތް ނަޑާލް ދެން އޮތް ބުުރުގައި ނުކުންނަން ޖެހޭނީ އެމެރިކާގެ ރެއިލީ އޮޕެލްކާ އާއި ކެނަޑާގެ ޑެނިސް ޝަޕަވަލޯވް ކުޅެގެން މޮޅުވާ ކުޅުންތެރިއަކާ އެެވެ.

ނަޑާލް ބުނީ މެޗަކަށް ފަހު މެޗެއްގައި އޭނާގެ ފިޓްނަސް ރަނގަޅުވަމުން އަންނަކަން އިހުސާސް އެބަކުރެވޭ ކަމަށާއި މި ވަގުތު ފޯކަސް އަކީ ހަމަ ކުރިން ވެސް ވިސްނުން ބެހެއްޓި ގޮތަށް ހަށިގަނޑަށް ބަލައިގެން ކުޅެވޭނެ މުބާރާތެއްގައި ކުޅެފައި، ރިކަވަރީ އަށް ވަގުތު ދިނުން ކަމަށެވެ.