ރަޝިއާގެ ސިފައިން ޔޫކްރެއިނަށް އަރައި ކުރަމުންދާ ހަނގުރާމައިގައި ޕޮލޭންޑާއި ޔޫކްރެއިން ގުޅޭ ބޯޑަރާ ހަމައަށް ހަމަލާތައް ފޯރާފައި ވާތީ، ޕޮލޭންޑަށް އޮތް ބޮރުވެރިކަން އިތުރުވެއްޖެ އެވެ.
ޔޫކްރެއިންގެ ހުޅަނގުގައި ޕޮލޭންޑް ބޯޑަރު ކައިރީ އޮންނަ ލްވިވް ސިޓީގެ އަސްކަރީ ތަމްރީން މަރުކަޒަކަށް ރަޝިއާއިން ވަނީ ހަމަލާ ދީފަ އެވެ.
ޔޫކްރެއިންގެ 1.7 މިލިއަން ރެފިއުޖީން މިހާރު ވެސް ޕޮލޭންޑުގައި ތިބި އިރު، އަދިވެސް އިތުރު މީހުން ދަނީ އެ ގައުމަށް އެތެރެވުމަށް މަސައްކަތް ކުރަމުންނެވެ.
ބައެއް ރެފިއުޖީން އެހެން ގައުމުތަކުގައި ދިރިއުޅޭ އާއިލާ ކައިރިއަށް ދަތުރު ކުރި ނަމަވެސް، ޕޮލޭންޑާއި ޔޫކްރެއިނާ ދެމެދު އޮންނަ ސަގާފީ، އާއިލީ ގުޅުންތަކާއި ބަހުގެ އެއް ގޮތް ކަމާ ހެދި ގިނަ ބަޔަކު ނިންމަނީ އެ ގައުމުގައި މަޑު ކުރުމަށެވެ.
ނަތީޖާއެއްގެ ގޮތުގައި ފާއިތުވި ދެ ހަފްތާގެ ތެރޭގައި ޕޮލޭންޑްގެ ވެރިރަށް ވޯސޯގެ އާބާދީ ވަނީ 15 ޕަސެންޓުން އުފުލިފަ އެވެ.
ފާއިތުވި ހަފްތާ ބަންދުގައި ރަޝިއާއިން ބޮން އެޅި އަސްކަރީ މަރުކަޒަކީ ޕޮލޭންޑް ބޯޑަރާ އެންމެ 16 ކިލޯމީޓަރު ދުރުގައި އޮންނަ ތަނެކެވެ.
ޔޫރަޕްގެ ބޯޑަރުތައް ބަދަލުކޮށް، ބާރު ހޯދުމުގެ ބޮޑު ރޭވުމެއް ރަޝިއާއިން ގެންގުޅޭ ކަމަށް މީގެ އެތައް އަހަރެއް ކުރިން ފެށިގެން ޕޮލޭންޑުން ދިޔައީ ހުޅަނގަށް އިންޒާރުދެމުންނެވެ. ނަމަވެސް އެއީ ހަގީގަތެއް ނެތް ވާހަކަތަކެއްގެ ގޮތުގައި އޭރު ގިނަ ބަޔަކު ސިފަކުރި އެވެ.
ހޯމަ ދުވަހު ޕޮލޭންޑްގެ ބޮޑު ވަޒީރު މަޓެޔުސްޒް މޮރަވިއެކީ ވިދާޅުވީ ހުޅަނގުގެ އެހީ އާއި އެއްބާރުލުން ޔޫކްރެއިން ސިފައިންނަށް ބޭނުންވާ ކަމަށާއި ހައްގުވާ ކަމަށެވެ.
ޔޫކްރެއިންގައި ހަނގުރާމަ ކުރަނީ ހަމައެކަނި އެ ގައުމުގެ މިނިވަން ކަމަށް ނޫން ކަމަށާއި އެއީ އިރުމަތީ ޔޫރަޕްގެ ގައުމުތަކަށް ވެސް މިނިވަންކަން ހޯދައިދިނުމުގެ ހަނގުރާމައެއް ކަމަށް ވިދާޅުވި އެވެ.
އޭގެ އިތުރުން ޔޫކްރެއިންގައި ހިންގާ ހަނގުރާމައަކީ ރަޝިއާގެ ރައީސް ލެޑިމިއަ ޕުޓިންގެ "ޖިއޯޕޮލިޓިކަލް" ރޭވުމުގެ ކުޑަ މިންވަރެއްގެ ގޮތުގައި ސިފަކުރެއްވި އެވެ.
ޔޫކްރެއިނާއި ހުޅަނގުގެ ގައުމުތަކާ ގުޅުވައިދޭ އެންމެ ބާރުގަދަ ވަސީލަތެއްގެ ގޮތުގައި މި ވަގުތު އޮތީ ޕޮލޭންޑެވެ. ހުޅަނގުން ފޮނުވާ ހަތިޔާރުތައް ޔޫކްރެއިނަށް ފޯރަނީ ޕޮލޭންޑް ތެރެއިން ދަތުރު ކުރުމަށް ފަހު އެވެ.
މިދިޔަ ހޮނިހިރު ދުވަހު ރަޝިއާއިން ބުނީ ހަތިޔާރު ހިފައިގެން ދަތުރު ކުރާ އުޅަނދުތަކަކީ "ގާނޫނީ ގޮތުން ސައްހަ އަސްކަރީ ޓާގެޓުތަކެއް" ކަމަށެވެ.
ޕޮލޭންޑަކީ ނޭޓޯ އައި އީޔޫގެ މެމްބަރު ގައުމެކެވެ. އެހެންކަމުން، ރަޝިއާއިން ހަގީގަތުގައި ވެސް ޕޮލޭންޑްގެ ފަސްގަނޑަށް ހަމަލާއެއް ދީފާނެ ކަމާ މެދު ބައެއް ފަރާތްތަކުން ސުވާލު އުފައްދަ އެވެ.
ނޭޓޯ އާއި އީޔޫއިން ވެސް ބުނާ ގޮތުގައި މެމްބަރު ގައުމަކަށް ދޭ ހަމަލާއަކީ ހުރިހާ ގައުމަކަށް ދޭ ހަމަލާއެއްގެ ގޮތުގައި ދެކޭނެ އެވެ. އެހެންކަމުން، އެ ހާލަތް ވާނީ ދެ ނިޔުކްލިއާ ގަދަ ބާރު، ރަޝިއާ އާއި އެމެރިކާގެ ކުރިމަތިލުމަކަށެވެ.
ވޯސޯގެ މޭޔަރު ރަފަލް ޓްރްޒަސްކޮވްސްކީ ވިދާޅުވީ ޕޮލޭންޑް ހާސް ނުވި ނަމަވެސް، ބައެއް އާއްމުންގެ މެދުގައި ހުރި ކަންބޮޑުވުންތައް އިތުރުވަމުންދާ ކަމަށެވެ.
"[ހުޅަނގުގައި ބައިބައިވުން އުފައްދަން] ފޭކު ހަބަރާއި، ދޮގު މައުލޫމާތު ފަތުރައި، ރެފިއުޖީ ކާރިސާއެއް އުފައްދަން ވެސް ޕުޓިން ފަހެއް ނުޖެހޭނެ. ރެފިއުޖީ އަދަދުތައް އިތުރުވާ ނަމަ ޕޮލޭންޑްގެ ނިޒާމު ހުއްޓުމަކަށް އަންނާނެ،" އޭނާ ބީބީސީއަށް ވިދާޅުވި އެވެ.
އޭނާ ގޮވާލެއްވީ އީޔޫ އާއި އދ. އިން އިތުރު އެހީ ދިނުމަށެވެ. އެގޮތުން ވޮލަންޓިއަރުންނާއި، މާލީ އެހީ އާއި އެހެން ގައުމުތަކުން ރެފިއުޖީން ބަލައިގަތުން މުހިއްމު ކަމަށް ފާހަގަކުރެއްވި އެވެ.
