ރަޝިއާގެ ސިފައިން ޔޫކްރެއިނަށް އަރައި ކުރަމުންދާ ހަނގުރާމައާ ހެދި ދުނިޔޭގެ ކާބޯތަކެތީގެ ނިޒާމު އޮތީ ބޮޑު ނުރައްކަލެއްގައި ކަމަށާއި ހާލަތު ގޯސް ނުވަނީވެސް އަވަސް ފިޔަވަޅު އަޅަން ޖެހޭ ކަމަށް އދ. އިން ބުނެފި އެވެ.
އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒް ނިއު ޔޯކްގައި ނޫސްވެރިންނަށް ވިދާޅުވީ ހަނގުރާމައިގެ ސަބަބުން ދުނިޔޭގެ ކާބޯތަކެތީގެ ސަޕްލައިއަށް ގިނަ ނުރައްކާތަކެއް އެބަ ހުރި ކަމަށާއި އޭގެ އަސަރު އެންމެ ބޮޑަށް ކުރާނީ ފަގީރުންނަށް ކަމަށެވެ.
"މިއީ ހަމައެކަނި ޔޫކްރެއިނާ ހަމައިގައި އޮތް ހަނގުރާމައެއް ނޫން. މިއީ ދުނިޔޭގެ އެންމެ ނާޒުކު ރައްޔިތުންނާއި ގައުމުތަކަށް ވެސް ދެވޭ ހަމަލާއެއް،" ގުޓެރޭޒް ވިދާޅުވި އެވެ.
އޭނާ ވިދާޅުވީ ހަނގުރާމަ ފެށުމުގެ ކުރިން ވެސް ތަރައްގީވަމުން އަންނަ ގައުމުތައް ދިޔައީ ބަލިމަޑުކަމުގެ އަސަރުން އަރައިގަންނަމުން ކަމަށެވެ. އެގޮތުން ރެކޯޑް އަދަދަށް އިންފްލޭޝަން މަތިވެ، އިންޓްރެސްޓް ރޭޓުތައް އުފުލި، ދަރަނި ދެއްކުމުގެ ބުރަ އޮތް ކަމަށް ފާހަގަކުރެއްވި އެވެ.
"މިހާރު އެ ބޮން އަޅަނީ އެ މީހުންގެ ކާބޯތަކެއްޗަށް،" ވޯލްޑް ފުޑް ޕްރޮގްރާމް (ޑަބްލިއުއެފްޕީ) އަށް ސަޕްލައި ކުރާ ގޮދަން ފުށުގެ 50 ޕަސެންޓަށް ވުރެ ގިނައިން ލިބެނީ ޔޫކްރެއިނުންކަން ފާހަގަކުރައްވަމުން ގުޓެރޭޒް ވިދާޅުވި އެވެ.
ގުޓެރޭޒް ވިދާޅުވީ އދ. ގެ ކާބޯތަކެތީގެ އަގުތަކުގެ އިންޑެކްސްގައި ތަކެތީގެ އަގުތައް ރެކޯޑް މިންވަރަށް އުފުލިފައިވާ ކަމަށާއި ދުނިޔޭގެ އެންމެ ފަގީރު 45 ގައުމަށް ބޭނުންވާ ގޮދަން ފުށުގެ ތިންބައިކޮށްފައި އެއްބައި ލިބެނީ ރަޝިއާ ނުވަތަ ޔޫކްރެއިނުން ކަމަށެވެ.
އެ ގައުމުތަކުގެ ތެރޭގައި ބުރްކީނާ ފާސޯ، މިސްރު، ކޮންގޯ، ލުބްނާން، ލީބިޔާ، ސޯމާލިއާ، ސޫދާން އަދި ޔަމަން ހިމެނެ އެވެ.
