ބިލިއަނަރު އެލޮން މަސްކްއާ އެކު ސީދާ ހަނގުރާމަކޮށް މޮޅުވެއްޖެ ނަމަ، ރަޝިއާގެ ރައީސް ލެޑިމިއަ ޕުޓިންއަށް ޔޫކްރެއިން ދޭނެ ކަމަށް މަސްކް ބުނެފި އެވެ.
ޕުޓިންއަށް ގޮން ޖަހައި، ސީދާ ހަނގުރާމައަށް އައުމަށް މަސްކް ގޮވާލީ ޓްވިޓާގަ އެވެ. އުމުރުން 69 އަހަރުގެ ޕުޓިންގެ ރަސްމީ ޓްވިޓާ އެކައުންޓު ޓެގްކޮށް އޭނާ ވަނީ ޓްވީޓުކޮށްފަ އެވެ.
"މި ޗެލެންޖު ގަބޫލު ކުރަންތަ؟" ރަޝިއާ ބަހުން މަސްކް ސުވާލުކުރި އެވެ.
ޓްވިޓާގައި މަސްކް ފޮލޯކުރާ 77 މިލިއަން މީހުންގެ ތެރެއިން އެކަކު ބުނީ މިއީ ސީރިއަސްކޮށް ވިސްނާފައި ކުރި ޗެލެންޖެއް ނޫން ކަމަށެވެ. ރައްދުގައި މަސްކް ބުނީ "ވަރަށް ސީރިއަސް" ކަމަށެވެ.
"ޕުޓިންއަށް އެހާ ފަސޭހައިން ހުޅަނގުގެ ގައުމުތައް ލަދުގަންނަވާލެވޭނެ ނަމަ މި ޗެލެންޖު ގަބޫލުކުރާނެ. އެކަމަކު އޭނާއަށް ގަބޫލުކުރާކަށް ނުކެރޭނެ،" މަސްކް ބުންޏެވެ.
މަސްކްގެ ވާހަކަތަކާ ގުޅިގެން ރަޝިއާއިން ވަކި އެއްޗެއް އަދި ނުބުނެ އެވެ.
ދެކުނު އެފްރިކާއަށް އުފަން އުމުރުން 50 އަހަރުގެ މަސްކް މީގެ ކުރިން ވަނީ އޭނާ ޔޫކްރެއިނަށް ތާއީދުކުރާކަން ހާމަކޮށްފަ އެވެ.
މަސްކްގެ ސްޓާލިންކް އިންޓަނެޓް ހިދުމަތް ޔޫކްރެއިންގައި އެކްޓިވޭޓުކޮށް، ރަޝިއާގެ ހަމަލާތަކުގައި ގެއްލުންވެފައިވާ ހިސާބުތަކަށް އިންޓަނެޓް ލިބޭނެ ވަސީލަތްތައް ވެސް ފޮނުވި އެވެ.
