ރަޝިއާއިން ޔޫކްރެއިންގެ މާބަނޑު މީހުންނަށް ހާއްސަ ހޮސްޕިޓަލަށް ބޮން އެޅުމުން އަނިޔާވި އަންހެން މީހާ އާއި އޭނާގެ ތުއްތު ދަރިފުޅު ވެސް މަރުވެއްޖެ އެވެ.
އޭޕީއިން ނެގި ފޮޓޯތަކުން ފެނުނީ މިދިޔަ ހަފްތާގެ ބުދަ ދުވަހު މަރިޔުޕޯލްގެ ހޮސްޕިޓަލަށް ދިން ހަމަލާއަށް ފަހު މާބަނޑު އަންހެން މީހަކު ސްޓްރެޗަރެއްގައި ގެންދަނިކޮށެވެ.
ހޮސްޕިޓަލަށް ދިން ހަމަލާގައި ތިން މީހުން މަރުވި އެވެ. އެ ތަނަށް ހަމަލާ ދިޔުމާ އެކު އަންހެން މީހާ ވިހަން ގެންދިޔައީ އެހެން ހޮސްޕިޓަލަކަށެވެ.
ސިޒޭރިއަން ހެދުމަށް ފަހު ތުއްތު ކުއްޖާ ނެގިއިރު އެއްވެސް ދިރުމެއް ނެތެވެ. ސާޖަރީ ހެދި ޓިމުރް މަރިން އޭޕީއަށް ބުނީ އަންހެން މީހާއަށް ހުރީ ސީރިއަސް އަނިޔާތަކެއް ލިބިފައި ކަމަށެވެ.
ތުއްތު ދަރިފުޅު ވިހެއި އިރު ވެސް މަރުވެފައި އޮތް އިރު، އަންހެން މީހާގެ ފުރާނަ ސަލާމަތް ކުރެވޭތޯ 30 މިނެޓު ވަންދެން މަސައްކަތް ކުރި އެވެ. ނަމަވެސް ކާމިޔާބެއް ނުވި އެވެ.
އަންހެން މީހާގެ ފިރިމީހާ އާޢި ބައްޕަ ހަށިގަނޑު ގެންގޮސްފައިވާ އިރު، އޭނާގެ ނަން ސާފު ކުރާނެ ވަގުތު ވެސް ނުލިބުނު ކަމަށް ޑޮކްޓަރުން ބުންޏެވެ.
މަރިޔުޕޯލް ސިޓީއަށް ރަޝިއާއިން ދެމުންދާ ހަމަލާތަކުގައި މަރުވެފައިވާ މީހުން ވަޅުލުމަށް ބޮޑެތި ވަޅުތައް ދަނީ ކޮންނަމުންނެވެ. ނަމަވެސް އަންހެން މީހާގެ އާއިލާއިން ހަށިގަނޑު ގެންގޮސްފައި ވާތީ، އޭނާގެ ހަށިގަނޑު ވަޅުލާނީ ވަކިންނެވެ.
ހޮސްޕިޓަލަށް ބޮން އެޅުމަށް ފަހު، އެއީ "ސްޓޭޖްކޮށްގެން" ކުޅުނު ޑްރާމާއެއް ކަމަށް ލަންޑަންގައި ހުންނަ ރަޝިއާގެ އެމްބަސީން ތުހުމަތުކޮށް، ކުރި ޓްވީޓުތައް ޓްވިޓާއިން ވަނީ ޑިލީޓުކޮށްފަ އެވެ.
އެމްބަސީން ބުނީ ހަމަލާދިން އިރު ހޮސްޕިޓަލް ހުރީ ބަންދުކޮށްފައި ކަމަށާއި ފޮޓޯއިން ފެނުނު އަންހެން މީހާއަކީ އެފަދަ މަންޒަރުތަކަށް ހާއްސަ އެކްޓަރެއް ކަމަށެވެ.
އޭގެ އިތުރުން، އެ ހޮސްޕިޓަލުން ސަލާމަތްވި އިތުރު އަންހެން މީހެއްގެ ފޮޓޯއާ މެދު ވެސް އެމްބަސީން ސުވާލު އުފެއްދި އެވެ.
މަރިއަނާ ވިޝެގިރްސްކަޔާ. -- ފޮޓޯ: އޭޕީ
މަރިއަނާ ވިޝެގިރްސްކަޔާ ވަނީ މިދިޔަ ބުރާސްފަތި ދުވަހު ވިހައިފަ އެވެ. ޔޫކްރެއިން ސަރުކާރުން ބުނީ މަރިޔުޕޯލް އިން މިހާތަނަށް 2،500 އަށް ވުރެ ގިނަ އާއްމުން މަރުވެފައިވާ ކަމަށެވެ.
