ޔޫކްރެއިން މަތިން އުދުހުން މަނާ ޒޯނެއް ނުހަދައިފި ނަމަ ނޭޓޯ މެމްބަރު ގައުމުތަކަށް ރަޝިއާގެ ހަމަލާތައް އަރާނެ ކަމަށް ވިދާޅުވެ، ޔޫކްރެއިންގެ ރައީސް ވޮލޮޑިމިރް ޒެލެންސްކީ އަނެއްކާވެސް އިންޒާރު ދެއްވައިފި އެވެ.
"އަޅުގަނޑުމެންގެ ވައިގެ ސަރަހައްދު ބަންދު ނުކުރާ ނަމަ، ނޭޓޯގެ ސަރަހައްދަށް ރަޝިއާގެ ރޮކެޓްތައް ވެއްޓެން މާ ގިނަ ދުވަހެއް ނުނަގާނެ،" ރޭ ނެރުނު ވީޑިއޯއެއްގައި ޒެލެންސްކީ ވިދާޅުވި އެވެ.
ޒެލެންސްކީ އެހެން ވިދާޅުވި އިރު އާދީއްތަ ދުވަހު ރަޝިއާއިން ވަނީ ޔޫކްރެއިންގެ ހުޅަނގުގައި އޮންނަ ލްވިވް ސިޓީއަށް ވައިގެ ހަމަލާތަކެއް ދީފަ އެވެ.
ޕޮލެންޑާއި ޔޫކްރެއިން ގުޅޭ ބޯޑަރު ކައިރީގައި އޮންނަ އެ ސިޓީގެ އަސްކަރީ ތަމްރީން މަރުކަޒަށް ދިން ހަމަލާގައި 35 މީހުން މަރުވެ، 130 މީހުންނަށް އަނިޔާވި އެވެ. ޕޮލެންޑަކީ ނޭޓޯގެ މެމްބަރެކެވެ.
ޔޫކްރެއިންގެ މަތިން އުދުހުން މަނާ "ނޯ ފްލައި ޒޯނެއް" ގާއިމް ކުރަން މަސައްކަތް ކުރާ ކޮންމެ ގައުމަކީ ހަނގުރާމައިގެ ބައިވެރިއެއްގެ ގޮތުގައި ދެކޭނެ ކަމަށް ރަޝިއާގެ ރައީސް ލެޑިމިއަ ޕުޓިން ކުރިން ވިދާޅުވި އެވެ.
"އެ ދިމާލަށް މިސްރާބް ހުރި ކޮންމެ ހަރަކާތަކީ ހަތިޔާރާ އެކު ހިންގާ ހަމަނުޖެހުމެއްގައި އެ ގައުމަކުން ބައިވެރިވުން ކަމުގައި އަޅުގަނޑުމެން ދެކޭނަން،" ރަޝިއާގެ އެއާލައިން އެއިރޯފްލޮޓުގެ މުވައްޒަފުންނާ އެކު ބޭއްވި ބައްދަލުވުމަކަށް ފަހު ޕުޓިން ވިދާޅުވި އެވެ.
އޭގެ އިތުރުން ނޯ ފްލައި ޒޯނެއް ގާއިމް ކުރުމަކީ "ޔޫރަޕާއި މުޅި ދުނިޔެއަށް ވެސް ބިޔަ، ނުރައްކާތެރި ނަތީޖާތަކެއް ނުކުންނާނެ" ކަމެއްގެ ގޮތުގައި ޕުޓިން ސިފަކުރެއްވި އެވެ.
