ރަޝިއާގެ ސިފައިންގެ ކޮންޓްރޯލްގެ ދަށުގައި ޔޫކްރެއިންގެ ސަރަހައްދުން ދެ ވަނަ މޭޔަރަކު ރަހީނުކޮށްފައިވާ ކަމަށް ޔޫކްރެއިން ސަރުކާރުން ތުހުމަތުކޮށްފި އެވެ.
ފޮރިން މިނިސްޓަރު ޑިމިޓްރޯ ކުލެބާ ވިދާޅުވީ ދެކުނުގައި އޮންނަ ޑްނީޕްރޯރުޑްނޭ އަވަށުގެ މޭޔަރު ޔެހްވެން މަތްވެޔޭވް ރަހީނުކޮށްފައިވާ "ޓެރަރިޒަމް"ގެ އަމަލުތައް ހިންގަމުންދާ ކަމަށެވެ.
އޭގެ ކުރިން ރަޝިއާއިން ވަނީ މެލިޓޮޕޯލް ސިޓީގެ މޭޔަރު ވެސް ރަހީނުކޮށްފަ އެވެ. މިހާރު އެ ސިޓީގެ މޭޔަރުގެ މަގާމުގައި ހުންނެވީ ރަޝިއާއިން އައްޔަނުކުރި މީހެކެވެ.
މެލިޓޮޕޯލްގެ އާ މޭޔަރު ގަލީނާ ޑަނިލްޗެންކޯ އާއްމުންނާ ފުރަތަމަ ފަހަރަށް މުހާތަބު ކުރައްވަމުން ވިދާޅުވީ "ހަރުކަށި އަމަލުތަކުގައި" ރައްޔިތުން ބައިވެރިނުވާން އެދޭ ކަމަށެވެ.
ސިޓީ ހޯލްގެ ކުރިމައްޗަށް އެތައް ސަތޭކަ ބަޔަކު އެއްވެ ވަނީ ކުރީގެ މޭޔަރު އައިވަން ފެޑޮރޯވް ވަގުތުން މިނިވަން ކުރުމަށް ޑިމާންޑުކޮށްފަ އެވެ.
ރައީސް ވޮލޮޑިމިރް ޒެލެންސްކީ ވެސް ވަނީ އޭނާ މިނިވަން ކުރުމަށް ގޮވާލައި، އިޒްރޭލާއި، ޖަރުމަނުވިލާތާއި ފްރާންސުން ރަޝިއާއަށް ޕްރެޝަރު ކުރުމަށް އެދިވަޑައިގެންފަ އެވެ.
