ރަޝިއާގެ ސިފައިން ޔޫކްރެއިނަށް އަރައި ހަނގުރާމަ ކުރަން ފެށި ފަހުން މިހާތަނަށް ޔޫކްރެއިން ސިފައިން 1،300 މީހުން މަރުވެފައިވާ ކަމަށް ރައީސް ވޮލޮޑިމިރް ޒެލެންސްކީ ވިދާޅުވެއްޖެ އެވެ.
މިއީ ފެބްރުއަރީ 24 ވަނަ ދުވަހު ހަނގުރާމަ ފެށި ފަހުން ޔޫކްރެއިން ސަރުކާރުން މަރުވެފައިވާ މީހުންގެ އަދަދު ރަސްމީކޮށް ހާމަކުރި ފުރަތަމަ ފަހަރެވެ.
މާޗް ދެ ވަނަ ދުވަހު ރަޝިއާ ސަރުކާރުން ބުނީ އެ ގައުމުގެ ސިފައިންގެ 500 މީހުން އެހާތަނަށް މަރުވެފައިވާ ކަމަށެވެ.
ނަމަވެސް ޔޫކްރެއިންގެ ރައީސް ވިދާޅުވީ ރަޝިއާ ސިފައިން 12،000 އެއްހާ މީހުން މަރުވެފައިވާ ކަމަށެވެ.
ޔޫކްރެއިންގައި ކުރާ ހަނގުރާމައިގައި ރަޝިއާ ސިފައިންގެ 150،000 މީހުން ބައިވެރިވެ އެވެ. ރަޝިއާގެ އަމާޒު އަނެއްކާވެސް ހުރީ ވެރިރަށް ކިޔެވް ހިފުމުގެ މަސައްކަތަށެވެ.
ހޮނިހިރު ދުވަހު ހެނދުނު ކިޔެވްގެ ދެކުނުން އޮންނަ ވަސިލްކިވް އަވަށުގެ އެއާޕޯޓަށް ހަމަލާދީ ވަނީ ބޮޑެތި ގެއްލުންތަކެއް ލިބިފަ އެވެ. އޭގެ އިތުރުން ތެޔޮ ރައްކާ ކުރާ ފެސިލިޓީއަކަށް ހަމަލާ ދިނުމުން އަލިފާން ރޯވި އެވެ.
ކިޔެވްގެ ހުޅަނގު އުތުރުގައި އޮންނަ އިރްޕިން އަދި ބުޗާ ހިސާބުތަކުގައި ވަރުގަދަ ހަމަލާތައް ބަދަލުކުރާތާ ދުވަސްތަކެއް ވެއްޖެ އެވެ. ރަޝިއާގެ އަސްކަރީ އުޅަނދުތައް މިހާރު ދަތުރު ކުރަނީ ސިޓީގެ އިރުއުތުރާ ދިމާލަށެވެ.
މޭޔަރު ވިޓާލީ ކްލިޝްކޯ ހޮނިހިރު ދުވަހު ވިދާޅުވީ ކިޔެވްގެ ދިފާއީ ބާރު ވަރުގަދަކޮށް، ކާބޯތަކެއްޗާއި ބޭށް އެއްކުރަމުންދާ ކަމަށެވެ.
ދެކުނުގައި އޮންނަ މަރިޔުޕޯލް ސިޓީގައި 12 ދުވަސް ތެރޭ 1،500 އާއްމުން މަރުވެފައިވާ އިރު، ފޮރިން މިނިސްޓަރު ޑިމިޓްރޯ ކުލެބާ ސިފަކުރެއްވީ "އެއީ ދުނިޔޭގައި ހިނގާ އެންމެ ބޮޑު އިންސާނީ ކާރިސާ"ގެ ގޮތުގަ އެވެ.
