ޔޫކްރެއިންގެ ދެކުނުގައި އޮންނަ މެލިޓޮޕޯލް ސިޓީގެ މޭޔަރު ރަޝިއާގެ ސިފައިންނަށް އެއްބާރުލުން ނުދޭތީ އޭނާ ރަހީނުކޮށްފައިވާ ކަމަށް ރައީސް ވޮލޮޑިމިރް ޒެލެންސްކީ އާއި އެހެން އިސް އޮފިޝަލުން ވިދާޅުވެއްޖެ އެވެ.
"ރަޝިއާ ސިފައިންގެ 10 މީހުންގެ ގްރޫޕަކުން ވަނީ މެލިޓޮޕޯލްގެ މޭޔަރު އައިވަން ފެޑޮރޯވް ރަހީނުކޮށްފައި،" ޔޫކްރެއިންގެ ޕާލިމެންޓުން ކުރި ޓްވީޓެއްގައި ބުންޏެވެ.
"އޭނާ ވަނީ ދުޝްމަނުންނަށް އެއްބާރުލުން ދޭން ދެކޮޅު ހަދާފައި."
ފެޑޮރޯވް ރަހީނު ކުރީ ސިޓީއަށް ދިމާވެފައިވާ ސަޕްލައި މައްސަލަތައް ހައްލު ކުރުމަށް ކާރިސާތަކަށް ހާއްސަ ސެންޓަރުގައި ހުންނަވަނިކޮށެވެ.
ހުކުރު ދުވަހު ނެރުނު ވީޑިއޯ މެސެޖެއްގައި ރައީޒް ޒެލެންސްކީ ސިފަކުރެއްވި ގޮތުގައި ފެޑޮރޯވް އަކީ "ޔޫކްރެއިނާއި ރައްޔިތުން ދިފާއު ކުރުމުގައި ހިތްވަރު ގަދަ ނަމޫނާ" އެކެވެ.
"ރަޝިއާގެ ދުޝްމަނުން ހިންގަމުން މިދާ އަމަލުތަކަކީ އިސްލާމިކް ސްޓޭޓްގެ ޓެރަރިސްޓުން ހިންގި ކަންކަމާ އެއް ފަދަ އަމަލުތަކެއް."
ޔޫކްރެއިން ރައީސްގެ އޮފީހުން ނެރުނު ވީޑިއޯއެއްގައި ފެންނަނީ ކަޅު ކުލައިގެ ކޮތަޅެއް މީހެއްގެ ބޮލުގައި އަޅުވައިގެން، ނެރިގެން ގެންދާ މަންޒަރެވެ.
މެލިޓޮޕޯލްގެ މޭޔަރު ރަހީނުކޮށްފައިވާ އިރު، ޒަޕޮރިއްޒިޒިއާގެ ސަރަހައްދީގެ ކައުންސިލްގެ ނައިބު ވެސް މީގެ ދުވަސްކޮޅެއް ކުރިން ރަހީނު ކުރުމަށް ފަހު ދޫކޮށްލާފައިވާ ކަމަށް ޔޫކްރެއިނުން ބުނެ އެވެ.
މެލިޓޮޕޯލްއަކީ 150،000 މީހުންގެ އާބާދީއެއް އޮންނަ ސިޓީއެކެވެ.
