ހުޅަނގުގެ ގައުމުތަކުން ރަޝިއާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާ ހެދި ބައިނަލްއަގްވާމީ ޖައްވީ އިދާރާ (އައިއެސްއެސް) ދުނިޔެއަށް ވެއްޓިދާނެކަމުގެ އިންޒާރު ރަޝިއާއިން ދީފި އެވެ.
ރަޝިއާގެ ޖައްވީ އިދާރާ ރޮސްކޮސްމޯސްގެ ވެރިޔާ ޑިމިޓްރީ ރޮގޮޒިން ހޮނިހިރު ދުވަހު ގޮވާލެއްވީ ދަތިކުރުމުގެ ފިޔަވަޅުތައް އަވަހަށް އުވާލުމަށެވެ.
ރޮގޮޒިން ވިދާޅުވީ ޖައްވީ އިދާރާ އޯބިޓުގައި ފްލޯޓްވާ ގޮތް ހެދުމަށް ރަޝިއާއިން އޮޕަރޭޓް ކުރާ އުޅަނދުތައް ސާވިސް ކުރުމުގެ މަސައްކަތަށް ފިޔަވަޅުތަކާ ހެދި ހުރަސް އެޅިދާނެ ކަމަށެވެ.
އެމެރިކާއިން ސަޕްލައި ކުރަނީ އައިއެސްއެސްއަށް ބޭނުންވާ ހަކަތަ އެވެ. އަދި ރަޝިއާއިން ޒިންމާ ވަނީ އައިއެސްއެސް އޯބިޓްގައި ހުއްޓުމެއް ނެތި އެނބުރުމާއި ފްލޯޓްވުމަށެވެ.
ރަޝިއާއިން އެކަން ކުރަނީ އައިއެސްއެސްގައި ޖައްސާފައިވާ "ޕްރޮގްރެސް" ޖައްވީ އުޅަނދުގެ އެހީގައި އެ ސްޓޭޝަން 250 މޭލު އުސް ހިސާބެއްގައި ދަމަހައްޓައިގެންނެވެ.
މީގެ ކުރިން ވެސް ރޮގޮޒިން ވިދާޅުވެފައި ވަނީ އެމެރިކާއިން އަޅާފައިވާ ފިޔަވަޅުތަކަށް ރައްދެއްގެ ގޮތުން އައިއެސްއެސްގެ ޕާޓްނާޝިޕް ނިންމަން ވިސްނަމުންދާ ކަމަށެވެ.
އެހެން ވެއްޖެ ނަމަ، 400 ޓަނުގެ ޖައްވީ ސްޓޭޝަން ދުނިޔެއަށް ވެއްޓޭނެ އެވެ. އައިއެސްއެސް އޯބިޓުގައި ރަޝިއާ މަތިން ދަތުރު ކުރަނީ ވަރަށް މަދުންނެވެ. އެހެންކަމުން ދުނިޔެއަށް ވެއްޓޭ ނަމަ ރަޝިއާގެ ބިމުގެ ސަރަހައްދަކަށް ވެއްޓުމުގެ ފުރުސަތު ވެސް ކުޑަ އެވެ.
ފިނި ހަނގުރާމައަށް ފަހު އެއްބައިވަންތަކަމުގެ ނިޝާނެއްގެ ގޮތުގައި ފާއިތުވި 21 އަހަރު އެކި ގައުމުގެ އެސްޓްރޮނޯޓުން މަސައްކަތުގައި އުޅެމުންދާ އައިއެސްއެސްގައި މީގެ ކުރިން ރަޝިއާ އާއި އެމެރިކާއިން ގުޅުން ކަނޑާލާފައެއް ނުވެ އެވެ.
ނަމަވެސް ރަޝިއާގެ ސިފައިން ޔޫކްރެއިނަށް ދެމުންދާ ހަމަލާތައް އިތުރަށް ގޯސްވާ ނަމަ، އެމެރިކާ އާއި ރަޝިއާގެ ޖައްވީ ގުޅުން ދެމިއޮތުމުގެ ފުރުސަތު ކުޑަ ކަމަށް އެނެލިސްޓިން ބުނެ އެވެ.
