ރަޝިއާގެ ސިފައިން ޔޫކްރެއިނަށް އަރައި ފަށާފައިވާ ހަނގުރާމައާ ގުޅިގެން ގައުމުތަކުން ކާބޯތަކެތީގެ އެކްސްޕޯޓް މަދު ނުކުރުމަށް ސިނާއީ ގޮތުން އެންމެ ކުރިއަރާފައިވާ ގައުމުތައް ހިމެނޭ ޖީ7 އިން ގޮވާލައިފި އެވެ.
ހުކުރު ދުވަހު ޖީ7 ގައުމުތަކުގެ ދަނޑުވެރިކަމާ ބެހޭ މިނިސްޓަރުންގެ ބައްދަލުވުމެއް އޮތެވެ. ބައްދަލުވުމުގައި މަޝްވަރާ ކުރީ ޔޫކްރެއިންގައި ކުރަމުންދާ ހަނގުރާމައިގެ ސަބަބުން ކުރާނެ އަސަރުތަކާ ގުޅޭ ގޮތުންނެވެ.
"އަޅުގަނޑުމެން ގައުމުތަކަށް ގޮވާލަނީ ކާބޯތަކެއްޗާއި ދަނޑުވެރިކަމުގެ މާކެޓުތައް ހުޅުވާލާފައި ބާއްވަން. އަދި ސަބަބެއް ނެތި ގައުމަކުން އެކްސްޕޯޓް ކުރުން މެދުކަނޑާލަފާނެ ކަމަށް ބަލައި، ތައްޔާރީ ހާލަތުގައި ތިބުމަށް އަވަސް ފިޔަވަޅު އެޅުން މުހިއްމު،" ބައްދަލުވުމަށް ފަހު ނެރުނު ބަޔާނުގައި ބުންޏެވެ.
މި ވަގުތު ޖީ7 ގެ ރިޔާސަތު ބަލަހައްޓަނީ ޖަރުމަނުވިލާތުންނެވެ. އެ ގައުމުގެ ދަނޑުވެރިކަމާ ބެހޭ މިނިސްޓަރު ވިދާޅުވީ ގައުމުތަކުން އެކްސްޕޯޓް ކުރުން މެދުކަނޑާލުމުގެ ފުރުސަތު އޮތުމަކީ "ވަރަށް ކަންބޮޑުވާ" މައްސަލައެއް ކަމަށެވެ.
"މި ހާލަތުގައި އަމިއްލަ އެދުން ބޮޑުވާ ނަމަ، ކާރިސާ ގޯހުން ގޯހަށް ގޮސް، އަގުތައް ނުހިފެހެއްޓޭ ވަރަށް މައްޗަށް އަރައިގެން ދާނެ. މިއީ އަޅުގަނޑުމެންނަށް ބޭނުން ނުވާ ހާލަތެއް އަދި އެ ހާލަތުން ދުރުގައި ތިބެވިދާނެ ފަދަ ހާލަތެއް،" މިނިސްޓަރު ވިދާޅުވި އެވެ.
ޔޫކްރެއިންގައި ކުރަމުންދާ ހަނގުރާމައާ ހެދި ބައެއް މުހިއްމު ތަކެތީގެ އަގު ދުނިޔޭގެ މާކެޓުގައި ވަނީ އުފުލިފަ އެވެ. އެގޮތުން ތެލާއި ކާބޯތަކެތީގެ އަގު ފާހަގަކުރެވެ އެވެ.
ރަޝިއާ އާއި ޔޫކްރެއިނަކީ ވެސް ގިނަ އަދަދަކަށް ކާބޯތަކެތި އުފައްދާ ދެ ގައުމެވެ. އޭގެ ތެރޭގައި ސަންފްލާވާ ތެލާއި ގޮދަން ފުށް ހިމެނެ އެވެ. މި ދެ ގައުމުގެ މުދަލަށް އެންމެ ބޮޑަށް ބަރޯސާ ވަނީ މެދުއިރުމަތީގެ ގައުމުތަކެވެ.
މިދިޔަ ބުރާސްފަތި ދުވަހު ރަޝިއާގެ ރައީސް ލެޑިމިއަ ޕުޓިން ވިދާޅުވީ ހުޅަނގުގެ ގައުމުތަކުން އެ ގައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާ ހެދި ކާބޯތަކެތީގެ އަގު ވަރަށް ބޮޑަށް އުފުލޭނެ ކަމަށެވެ. ދަނޑުވެރިކަމަށް ބޭނުންވާ ގަސް ކާނާ އެންމެ ގިނައިން އުފައްދާ އެއް ގައުމަކީ ރަޝިއާ އެވެ.
