އެހެން ގައުމުތަކުގެ ވޮލަންޓިއަރުން ރަޝިއާގެ ސިފައިންނާ ގުޅި ޔޫކްރެއިންގެ ފައުޖާ ދެކޮޅަށް ހަނގުރާމަ ކުރުމަށް ރަޝިއާގެ ރައީސް ލެޑިމިއަ ޕުޓިން ގޮވާލައްވައިފި އެވެ.
ރަޝިއާގެ ސަލާމަތީ މަޖިލީހުގެ ބައްދަލުވުމެއްގައި ޕުޓިން ވިދާޅުވީ ރަޝިއާގެ ފައުޖާ ގުޅެން ބޭނުންވާ އެހެން ގައުމުތަކުގެ މީހުންނަށް އެ ފުރުސަތު އޮންނަން ވާނެ ކަމަށެވެ.
ރަޝިއާގެ ޑިފެންސް މިނިސްޓަރު ސާގެއި ޝޮއިގޫ ވިދާޅުވީ މެދުއިރުމަތީގެ ގައުމުތަކުން 16،000 ވޮލަންޓިއަރުން ތިބީ ރަޝިއާގެ ސިފައިންނާ ގުޅުމަށް ތައްޔާރަށް ކަމަށެވެ.
އެމެރިކާގެ އޮފިޝަލުން ބުނީ އެ ވޮލަންޓިއަރުންގެ ތެރޭގައި ޒަމާނީ ހަނގުރާމައަށް ތަމްރީންވެފައިވާ ސީރިއާގެ ރައްޔިތުން ހިމެނުން އެކަށީގެންވާ ކަމަށެވެ.
ރަޝިއާއަކީ ސީރިއާގެ ޒަމާންވީ އެކުވެރިއެކެވެ. ސީރިއާގެ ދާހިލީ ހަނގުރާމައިގައި ރައީސް ބައްޝާރުލް އަސަދަށް އެންމެ ބޮޑަށް އެހީ ފޯރުކޮށްދެއްވަނީ ޕުޓިން އެވެ.
ރަޝިއާގެ ވާހަކަތަކަށް ރައްދުގައި ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވީ "ސީރިއާގެ ގުންޑާއިން ބޭރު ގައުމަކަށް ދަތުރު ކުރާނީ" އާއްމު ރައްޔިތުން މެރުމަށް ކަމަށެވެ.
ބޭރު ގައުމުތަކުގެ ގިނަ އަދަދެއްގެ ރައްޔިތުން ވަނީ ރަޝިއާއާ ދެކޮޅަށް ޔޫކްރެއިން ސިފައިންނާ ވެސް ގުޅިފަ އެވެ. އެގޮތުން 16،000 މީހުން ގުޅިފައިވާ ކަމަށް ޒެލެންސްކީ ވިދާޅުވިއެވެ.
