ކޮވިޑް ޖެހުމުން ސިކުނޑިއަށް ބޮޑު ބަދަލުތަކެއް އައުން އެކަށީގެންވާ ކަމަށް އިނގިރޭސިވިލާތުގައި ހެދި ދިރާސާއަކުން ދައްކައިފި އެވެ.
ސައިންސްވެރިންނަށް އެކަން ފާހަގަވީ ކޮވިޑް ޖެހުމުގެ ކުރިން އަދި އޭގެ ފަހުން ނެގި ސިކުނޑީގެ އެމްއާރްއައި ސްކޭންތައް އަޅައި ކިޔައިގެންނެވެ.
ކޮވިޑް ޖެހި ވަރަށް ކުޑަ މިންވަރަކަށް ބަލިވި ނަމަވެސް، ސިކުނޑީގެ ސައިޒް ކުޑަވާ ކަމަށް ދިރާސާއިން ދެއްކި އެވެ. އެއާ އެކު ހަނދާނާއި ވަސް ބެލުމާއި ގުޅިފައިވާ ސިކުނޑީގެ ބައިތަކުން ބައެއް މާއްދާތައް މަދުވެ އެވެ.
އެ ދިރާސާ ޝާއިއުކޮށްފައި ވަނީ "ނޭޗާ" ޖާނަލްގަ އެވެ.
އޮކްސްފޯޑް ޔުނިވާސިޓީގެ ވެލްކަމް ސެންޓާ ފޯ އިންޓެގްރޭޓިވް ނިޔުރޯއިމޭޖިންގެ ޕްރޮފެސަރު ގްވެނައެލް ޑުއާއޫޑް ވިދާޅުވީ ދިރާސާގައި ބޮޑަށް ބެލީ ކޮވިޑް ޖެހި، ވަރަށް ކުޑަކޮށް ބަލިވި މީހުންގެ ސިކުނޑިތައް ކަމަށެވެ.
ޔޫކޭ ބަޔޯބޭންކް ޕްރޮޖެކްޓުގެ ދަށުން ފާއިތުވި 15 އަހަރު 500،000 އެއްހާ މީހުންގެ ސިއްހީ ރެކޯޑް ދިޔައީ އެއްކުރަމުންނެވެ. އެހެންކަމުން ބަލިމަޑުކަމުގެ ކުރިން ނަގާފައި ހުރި ގިނަ ސްކޭންތަކުގެ ޑޭޓާބޭސްއެއް އެބަ ހުއްޓެވެ.
ސައިންސްވެރިން އަލުން ސްކޭން ކުރީ
- ކޮވިޑް ޖެހުނުތާ 4.5 މަސް ފަހުން 401 މީހުން، އޭގެ 96 ޕަސެންޓަކީ މައިލްޑް އާދައިގެ މިންވަރަކަށް ބަލިވި މީހުން
- ކޮވިޑް ނުޖެހޭ 384 މީހުން
ސައިންސްވެރިންގެ ހޯދުންތަކުން ދެއްކީ
- ކޮވިޑް ޖެހުނު މީހުންގެ ސިކުނޑީގެ ސައިޒް 0.2 އާއި 2 ޕަސެންޓާ ދެމެދުގެ މިންވަރަކުން ކުޑަވި
- ހަނދާނާއި ވަސް ބެލުމާ ގުޅޭ ސިކުނޑީގެ ބައިތަކުން "ގްރޭމެޓާ" މަދުވި
ކޮވިޑް ޖެހުމުން ސިކުނޑިއަށް އަންނަ ބަދަލަކީ ދާއިމީ ބަދަލެއް ކަމެއް ސައިންސްވެރިންނަށް ޔަގީންކޮށް ބުނާކަށް ނޭނގެ އެވެ. ނަމަވެސް ސިކުނޑިއަކީ ފަސޭހަވުމުގެ ގާބިލްކަން އޮތް ގުނަވަނެއް ކަމަށް ފާހަގަކުރި އެވެ.
