ރަޝިއާގެ ސިފައިން ޔޫކްރެއިނަށް އަރައި ކުރަމުންދާ ހަނގުރާމައާ ގުޅިގެން ހުޅަނގުގެ ގައުމުތަކުން ދަތިކުރުމުގެ ފިޔަވަޅު އަޅާފައި ވާތީ، ރައްދުގައި ރަޝިއާއިން ބައެއް މުދާ އެކްސްޕޯޓް ކުރުން މެދުކަނޑާލައިފި އެވެ.
ދެހާސް ބާވީސް ވަނަ އަހަރުގެ ނިޔަލަށް އެކްސްޕޯޓް ކުރުން މެދުކަނޑާލި މުދަލުގެ ތެރޭގައި ޓެލެކޮމް، ސިއްހީ ދާއިރާ، އުޅަނދު ފަހަރު، ދަނޑުވެރިކަމުގެ ދާއިރާ އަދި ކަރަންޓާ ގުޅުން ހުރި ބައެއް އުފެއްދުންތަކާއި، ލަކުޑި ފަދަ ތަކެތި ހިމެނެ އެވެ.
އިކޮނޮމީ މިނިސްޓްރީން ބުނީ އިތުރު ފިޔަވަޅެއްގެ ގޮތުން ބޭރުގެ ބޯޓުތައް ރަޝިއާގެ ބަނދަރުތަކަށް ވަނުން މަނާ ކުރުމާ މެދު ވިސްނަމުންދާ ކަމަށެވެ. މިއީ ރަޝިއާއަށް ދަތިކޮށްފައި ވާތީ ރައްދުގައި އަޅަން "އެންމެ އެކަށޭނަ" ފިޔަވަޅުތަކުގެ ގޮތުގައި މިނިސްޓްރީން ސިފަކުރި އެވެ.
ހުޅަނގުގެ ގައުމުތަކުން ރަޝިއާއާ ދެކޮޅަށް ގިނަ ފިޔަވަޅުތަކެއް އަޅާފައިވާ އިރު، ސީދާ ރައީސް ލެޑިމިއަ ޕުޓިން އާއި ރަޝިއާގެ މަހުޖަނުންނަށް ވެސް ދަތިކޮށްފައިވެ އެވެ. އޭގެ އިތުރުން ރަޝިއާއިން ތެޔޮ ގަތުން ހުއްޓާލަން ވެސް އެމެރިކާއިން ނިންމާފައިވެ އެވެ.
ރައްދުގައި ރަޝިއާއިން އެޅި ފިޔަވަޅުތަކުގެ އަސަރު 48 ގައުމަކަށް ކުރާނެ އެވެ. އޭގެ ތެރޭގައި އީޔޫގެ ގައުމުތަކާ އެމެރިކާ ހިމެނެ އެވެ.
ރަޝިއާގެ ބޮޑު ވަޒީރު މީކާއީލް މިޝުސްޓިން ވިދާޅުވީ ފިޔަވަޅުތަކުގެ ދަށުން ރަޝިއާގައި އޮޕަރޭޓް ކުރާ ބޭރު ކުންފުނިތަކުގެ އުފެއްދުންތައް އެކްސްޕޯޓް ކުރުން ވެސް މަނާ ވާނެ ކަމަށެވެ. އެގޮތުން ކާރާއި، ރޭލުގެ ބައިތަކާއި ކޮންޓެއިނަރު ހިމެނެ އެވެ.
ރަޝިއާގެ ކުރީގެ ރައީސް ޑިމިޓްރީ މެޑްވެޑެވް ވިދާޅުވެފައި ވަނީ އެ ގައުމުގައި އޮޕަރޭޓް ކުރުން ހުއްޓާލާ ހުޅަނގުގެ ގައުމުތަކުގެ ކުންފުނިތަކުގެ މުދާ، ދައުލަތުގެ ދަށަށް ގެންނަން ފުރުސަތު އެބަ އޮތް ކަމަށެވެ. އަދި އެކަމަށް މަގުފަހިވާ ގާނޫނެއް ޕާލިމެންޓުން މިދިޔަ ބުދަ ދުވަހު ފާސްކުރި އެވެ.
ބައިނަލްއަގްވާމީ ގިނަ ކުންފުނިތަކުން ރަޝިއާ ދޫކޮށް ދާން ފަށާފައިވާ އިރު އިތުރު ކުންފުނިތަކުން ވަނީ އެ ގައުމުގައި ހިންގާ އޮޕަރޭޝަންތައް މެދުކަނޑާލާފަ އެވެ. އޭގެ ތެރޭގައި ސްޓާބަކްސް، ސޮނީ އަދި ޔުނިލެވާ ހިމެނެ އެވެ.
