މޯލްޑިވްސް އެއާޕޯޓްސް ކޮމްޕެނީ ލިމިޓެޑު (އެމްއޭސީއެލް) އިން ހުޅުމާލޭގެ ދެވަނަ ފިޔަވަހީގައި އަޅާފައިވާ ދެ ޓަވަރުގެ ފްލެޓުތަކުގެ ތަޅުދަނޑި އަންނަ މަހު ހަވާލު ކުރުމަށް މަސައްކަތް ކުރަމުންދާ ކަމަށް އެ ކުންފުނިން ބުނެފި އެވެ.
މިއީ ކުރީ ސަރުކާރުން ފެށި ހިޔާ މަޝްރޫއުގެ ދަށުން އެމްއޭސީއެލް އާ ހަވާލުކުރި 24،000 އަކަފޫޓުގެ ބިމުގައި އެޅި ދެ ޓަވަރެވެ.
މި ޓަވަރުތަކުގައި ހުންނަނީ 1+2 ކޮޓަރި ހުންނަ 240 އެޕާޓުމަންޓާއި އެއް ކޮޓަރީގެ 144 އެޕާޓުމަންޓު ހިމެނޭހެން ޖުމްލަ 384 ހައުސިން ޔުނިޓެވެ. އޭގެ ތެރެއިން 312 ޔުނިޓު ލިބެނީ އެމްއޭސީއެލް މުވައްޒަފުންނަށެވެ. ބާކީ 72 ޔުނިޓަކީ އާންމުންނަށް ވިއްކާލާ އެއް ކޮޓަރީގެ ފްލެޓުތަކެވެ.
އެމްއޭސީއެލް ޓަވަރުތަކުން ފްލެޓުތައް ލިބޭ މުވައްޒަފުންގެ ލިސްޓު ފައިނަލްވެފައިވާއިރު، ހުސްވި މަހުގެ ތެރޭގައި ފްލެޓު ލިބޭ މީހުންނަށް އެތަންތަން ދައްކާ ވެސް ނިމިއްޖެ އެވެ. އެކަމަކު ތަޅުދަނޑި ހަވާލުކުރެވޭނެ ސީދާ ތާރީހެއް ބުނަން ނޭނގޭ ކަމަށް އެ ކުންފުނިން ބުނެ އެވެ.
އެމްއޭސީއެލުން ބުނީ އެޕާޓްމަންޓްތައް މުވައްޒަފުންނާއި ހަވާލު ކުރުމުގެ އެންމެ ފަހުގެ ތައްޔާރީތައް ފަށައިފައިވާ ކަމަށެވެ. އެ ޓަވަރުތަކުގެ 99 އިންސައްތަ މަސައްކަތް މިހާރު ވަނީ ނިމިފަ އެވެ.
ފްލެޓްތައް މުވައްޒަފުންނާއި ހަވާލުކުރުމުގެ މަސައްކަތްކުރިއަށް ގެންދާއިރު މިހާރު އޮތް އެންމެ ބޮޑު ގޮންޖެހުމަކީ ކަރަންޓާއި، ފެނުގެ ހިދުމަތް ފޯރުކޮށްދިނުމުގެ މަސައްކަތް ލަސްވުން ކަމަށް އެ ކުންފުނިން ބުންޏެވެ.
"މި ކުންފުނިން މިހާރު ދަނީ މި ހިދުމަތްތައް އަވަސްކުރުމަށްޓަކައި ކަމާއި ބެހޭ ފަރާތްތަކާއި މަޝްވަރާކުރަމުން. މި ކުންފުނީގެ އަމާޒަކީ އަންނަ އޭޕްރީލް މަހު މުވައްޒަފުންނަށް ތަޅުދަނޑި ހަވާލުކުރުން،" އެމްއޭސީއެލުން ބުންޏެވެ.
އެ ފްލެޓްތަކުގެ ކޮންޓްރެކްޓަރަކީ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) އެވެ.
ފްލެޓު މަޝްރޫއަށް އެމްއޭސީއެލް އިން މުވައްޒަފުންގެ އަތުން އެއްވެސް ފައިސާއެއް ނުނަގަ އެވެ. އެގޮތުން، މުޅި މަޝްރޫއަށް ފައިނޭންސްކުރީ އެމްއޭސީއެލްގެ ކޭޝްފްލޯ އިންނެވެ. އެ ކުންފުނިން ވިސްނަނީ އަޕްފްރަންޓު ފީއެއް ނަގައިގެން 15 އަހަރަށް ބަހާލައިގެން ފްލެޓުގެ ކުލި ދައްކާ ގޮތަށް ދޫކުރުމަށެވެ.
އެގޮތުން އެ މަޝްރޫއުގެ ޖުމުލަ އަންދާޒާ ކުރާ އަގަކީ 408،280،814.10ރ. / 251،291،698.16ރ. އެވެ.
އެއް ކޮޓަރި:
- ޓައިޕް އޭ – 128 ކޮޓަރި / 448.06 / އަގު: 1،367،805.00ރ.
- ޓައިޕް ބީ – 8 ކޮޓަރި / 446.22 / އަގު: 1،362،188ރ.
- ޓައިޕް ސީ – 8 ކޮޓަރި / 440.31 / އަގު: 1،344.146ރ.
ދެ ކޮޓަރި ޕްލަސް އެކެއް:
- ޓައިޕް ޑީ – 20 ކޮޓަރި / 662.09 / 2،021،180ރ.
- ޓައިޕް އީ – 120 ކޮޓަރި / 649.78 / 1،983،600ރ.
- ޓައިޕް އެފް – 20 ކޮޓަރި / 665.66 / 2،032،078ރ.
- ޓައިޕް ޖީ – 80 ކޮޓަރި / 663.77 / 2،026،308ރ.
ތަޅުދަނޑި ހަވާލު ނުވަނީ ފެނާ ނަރުދަމާގެ މަސައްކަތްތައް ނުނިމޭތީ ކަމަށް އެމްއޭސީއެލް އިން ބުނި ނަމަވެސް، އެ މަސައްކަތްތައް ނިމިފައިވާ ކަމަށް އެޗްޑީސީއާ ހަވާލާދީ ރައްޔިތުންގެ މަޖިލިހުގެ އެސްއޯއީ ކޮމިޓީން ތައްޔާރުކުރި ސަރުކާރު ކުންފުނިތަކުގެ ބޯހިޔާވަހިކަމުގެ މަޝްރޫއުތަކާ ގުޅޭ ރިޕޯޓުގައި ވެ އެވެ.
