ތެޔޮ އުފައްދާ ގައުމުތަކުން ސަޕްލައި އިތުރު ކުރާނެ ކަމުގެ އުއްމީދާ އެކު އަގުތައް ތިރިވުމަށް ފަހު އަނެއްކާވެސް އުފުލިއްޖެ އެވެ.
ޔޫއޭއީ އިން ވަނީ ތެލުގެ ސަޕްލައި އިތުރު ކުރަން، އޯޕެކް ގައުމުތަކުގެ ތެލުގެ އުފެއްދުންތެރިކަން މައްޗަށް ޖައްސަން ބާރު އަޅާފައި ކަމަށް ބައެއް ރިޕޯޓުތައް ބުންޏެވެ.
ނަމަވެސް, ޔޫއޭއީގެ ހަކަތަ އާ ބެހޭ މިނިސްޓަރު އެ ވާހަކަ ދޮގުކުރެއްވި އެވެ.
ބުދަ ދުވަހު ތެލުގެ އަގު 17 ޕަސެންޓުން ތިރިވުމަށް ފަހު ބުރާސްފަތި ދުވަހު އަނެއްކާވެސް ވަނީ ތިން ޕަސެންޓުގެ އުފުލުމެއް އައިސްފަ އެވެ.
އެމެރިކާގެ ރައީސް ޖޯ ބައިޑެން އާއި އެހެން އޮފިޝަލުން ވައުދުވެވަޑައިގެންފައި ވަނީ ތެލުގެ އަގުތައް ތިރި ކުރަން މަސައްކަތް ކުރާނެ ކަމަށެވެ.
އެހެންވެ، އެމެރިކާއިން ދަނީ ސަޕްލައި އިތުރު ކުރަން ބާރު އެޅުމުގެ މަގްސަދުގައި ތެޔޮ އުފައްދާ ގައުމުތަކާ އެކު މެދުނުކެނޑި މަޝްވަރާ ކުރަމުންނެވެ.
"ތެލުގެ އުފެއްދުންތެރިކަން މަތި ކުރަން އަޅުގަނޑުމެން ތާއީދު. އަދި އޯޕެކް ގައުމުތަކުން އެގޮތަށް ވިސްނަން އަޅުގަނޑުމެން ބާރު އަޅަން،" ޔޫއޭއީގެ ސަފީރު ޔޫސުފް އަލް އުތައިބާ ވިދާޅުވި އެވެ.
އެކަމަކު ހަކަތައާ މިނިސްޓަރު ސުހައިލް އަލް މަޒްރުއޭއީ ފަހުން ވިދާޅުވީ އޯޕެކް ގައުމުތަކުން ކޮންމެ މަހަކު ވެސް ތެޔޮ އުފައްދަަން ކަނޑައަޅާފައިވާ ޓާގެޓަށް ބަދަލު ގެންނަން ޔޫއޭއީއިން ނުވިސްނާ ކަމަށެވެ.
ފެބްރުއަރީ 24 ވަނަ ދުވަހުން ފެށިގެން ތެލުގެ އަގުތައް ވަނީ 30 ޕަސެންޓު އުފުލިފަ އެވެ. މި ހަފްތާފައި ސާފުނުކުރާ ތެޔޮ ފީފާއެއްގެ އަގު 139 ޑޮލަރަށް އެރި އެވެ.
ބުދަ ދުވަހު އަގު 106 ޑޮލަރަށް ތިރިވުމަށް ފަހު އަނެއްކާވެސް ބުރާސްފަތި ދުވަހު އަގު އުފުލުފައި ވަނީ 114 ޑޮލަރަށެވެ.
