ލަންޑަން، އިނގިރޭސިވިލާތް (މާޗް 10) - ޔޫކްރެއިންގައި ކުރަމުންދާ ހަނގުރާމައިގައި ބައިވެރިވުމާ ދެކޮޅަށް އިނގިރޭސި ސަރުކާރުން އިންޒާރުދީފައި ވަނިކޮށް އެ ގައުމުގެ ބަޔަކު ހަނގުރާމައަށް ހިނގައްޖެ އެވެ.
ހަނގުރާމައަށް ދިޔަ މީހުންގެ ތެރޭގައި ކޮންޒަވޭޓިވް ޕާޓީގެ ޕާލިމެންޓް މެމްބަރެއްގެ ދަރިއަކު ވެސް ހިމެނެ އެވެ.
ފެބްރުއަރީ 27 ވަނަ ދުވަހު ފޮރިން ސެކެޓްރީ ލިޒް ޓްރުސް ވިދާޅުވީ އިނގިރޭސި ރައްޔިތުން ހަނގުރާމައަށް ދާން ބޭނުން ނަމަ ހުރަހެއް ނެތް ކަމަށެވެ.
ނަމަވެސް، ބޮޑު ވަޒީރު ބޮރިސް ޖޯންސަންގެ އޮފީހާއި، ޑިފެންސް ސެކެޓްރީ ބެން ވޮލެސް އަދި ސިފައިންގެ ވެރިޔާ ވެސް އެ ވިސްނުމާ ދެކޮޅެވެ. ބުދަ ދުވަހު ޓްރުސް ވެސް ވިދާޅުވީ އެއީ ރަނގަޅު ވިސްނުމެއް ނޫން ކަމަށެވެ.
ވޮޝިންޓަންގައި ބޭއްވި ނިއުސް ކޮންފެރެންސެއްގައި ޓްރުސް ވިދާޅުވީ ޔޫކްރެއިނަށް ދަތުރު ނުކުރުމަށް ފޮރިން އޮފީހުން ލަފާދޭ ކަމަށާއި އެހީވާން ބޭނުންވާ އިނގިރޭސި ރައްޔިތުންނަށް ފައިސާ އާއި ތަކެތި ހަދިޔާ ކުރެވޭނެ ކަމަށެވެ.
ނަމަވެސް، ދަ ގާޑިއަން ނޫހުން ބުނީ ފާއިތުވި ހަފްތާ ބަންދުގެ ތެރޭގައި އިނގިރޭސި ހަތް މީހުން ޔޫކްރެއިނަށް ދަތުރު ކުރި ކަމަށެވެ. އެ އެންމެންނަކީ ވެސް ކުރީގެ ސިފައިންނެވެ. އޭގެ ތެރޭގައި ހިމެނޭ އުމުރުން 30 އަހަރުގެ ބެން ގްރާންޓަކީ ރޯޔަލް މެރީންސްގައި ފަސް އަހަރު ހިދުމަތްކޮށްފައިވާ މީހެކެވެ.
އޭނާގެ މަންމަ، ހެލެން ގްރާންޓަކީ ކޮންޒަވޭޓިވް ޕާޓީގެ ޕާލިމެންޓް މެމްބަރެކެވެ. އޭގެ އިތުރުން ކުރިން މިނިސްޓަރުކަން ވެސް ކުރައްވައި، ބޮޑު ވަޒީރު ޖޯންސަން އަންހެން ކުދިންގެ ތައުލީމަށް ކަނޑައެޅުއްވި ހާއްސަ މަންދޫބުކަން ވެސް ކުރެއްވި އެވެ.
ތިން ކުދިންގެ ބައްޕަ، ބެން ގްރާންޓް ބުނީ އޭނާ ދަތުރު ފެށުމުގެ ކުރިން މަންމައަށް ނާންގާ ކަމަށާއި ހަނގުރާމައިގައި ބައިވެރިވާން ނިންމީ ޓީވީން ފެންނަމުން ދިޔަ މަންޒަރުތަކުގެ ސަބަބުން ކަމަށެވެ.
އޭނާ ބުނީ އިނގިރޭސިވިލާތުން އިތުރު 100 މީހުން ޔޫކްރެއިނަށް ދަތުރު ކުރަމުންދާ ކަމަށާއި އޭގެ ތެރެއިން ބައެއް މީހުންނަކީ ހަނގުރާމައިގެ އެކި ކަންކަމަށް ހާއްސަވެފައިވާ "ސްޕެޝަލިސްޓުން" ކަމަށެވެ.
