ވިއެނާ، އޮސްޓްރިއާ (މާޗް 9) - ޔޫކްރެއިންގައި ހުންނަ ޗެރްނޮބީލް ނިޔުކްލިއާ ފެސިލިޓީއިން އދ. ގެ ނިޔުކްލިއާ ހަކަތައާ ބެހޭ އިދާރާއަށް ޑޭޓާ ފޮނުވުން ހުއްޓާލާފައި ވާތީ އެ އިދާރާއިން ކަންބޮޑުވުން ފާޅުކޮށްފި އެވެ.
ފެބްރުއަރީ 24 ވަނަ ދުވަހު ރަޝިއާގެ ސިފައިން ޔޫކްރެއިނަށް އަރައި ފެށި ހަނގުރާމައިގައި ޗެރްނޮބީލް ފެސިލިޓީގެ ކޮންޓްރޯލް ވަނީ ހޯދާފަ އެވެ. އެ ފެސިލިޓީއަކީ 1986 ވަނަ އަހަރު ހިނގި ހާދިސާއެއްގައި އެތައް ސަތޭކަ ބަޔަކު މަރުވެ، ރޭޑިއޯއެކްޓިވް މާއްދާތައް މުޅި ޔޫރަޕްގައި ފެތުރުން މެދުވެރިވި ތަނެކެވެ.
އިންޓަނޭޝަނަލް އެޓޮމިކް އެނާޖީ އެޖެންސީ (އައިއޭއީއޭ) ގެ ވެރިޔާ ރަފައެލް ގްރޮސީ ވިދާޅުވީ އެ ފެސިލިޓީގެ ޑޭޓާ ލިބުން ހުއްޓިފައިވާ ކަމަށާއި ޔޫކްރެއިންގެ އެހެން ހިސާބުތަކުގައި ހުރި ނިޔުކްލިއާ ފެސިލިޓީތަކުގެ ސްޓެޓަސް ބަލަމުންދާ ކަމަށެވެ.
ރަޝިއާއިން ޔޫކްރެއިނަށް އެރި ފަހުން ފާއިތުވި 13 ދުވަހު ޗެރްނޮބީލް ފެސިލިޓީގެ 200 އަށް ވުރެ ގިނަ ޓެކްނިކަލް ސްޓާފުން ތިބީ އެ ތަނުގެ ތެރޭގައި ތާށިވެފަ އެވެ. ޔޫކްރެއިންގެ ރެގިއުލޭޓަރާ ހަވާލަދީ އައިއޭއީއޭ އިން ބުނީ ސްޓާފުންގެ ހާލަތު "ގޯސްވަމުންދާ" ކަމަށެވެ.
ބޭނުން ކުރުން ހުއްޓާލާފައިވާ ޗެރްނޮބީލް ފެސިލިޓީ ހުންނަ ޒޯނުގައި ބޭނުން ކުރުން ހުއްޓާލާފައިވާ ރިއެކްޓަރުތަކާއި ރޭޑިއޯއެކްޓިވް ކުނި ނައްތާލަން ހާއްސަ ފެސިލިޓީތައް ވެސް ހުރެ އެވެ. ފެސިލިޓީ ބޭނުން ނުކުރި ނަމަވެސް، ނިޔުކްލިއާ ކާރިސާއެއް ކުރިމަތިވި ނުދިނުމަށް ފެސިލިޓީ މެނޭޖް ކުރުމުގެ މަސައްކަތުގައި 2،000 އަށް ވުރެ ގިނަ މުވައްޒަފުން އުޅެ އެވެ.
އައިއޭއީއޭއިން ރަޝިއާއަށް ގޮވާލީ ބަންދުވެފައި ތިބި މުވައްޒަފުން ދޫކޮށްލައި، މުވައްޒަފުންގެ މެދުގައި ޑިޔުޓީ ރޮޓޭޓް ކުރުމުގެ ފުރުސަތު ދިނުމަށެވެ. އެއީ މުވައްޒަފުން ވަރުބަލިވެ، ހާސްކަމުގައި މަސައްކަތް ކުރަން ޖެހޭ ނަމަ، ނިޔުކްލިއާ ކާރިސާއެއް ކުރިމަތިވުމުގެ ފުރުސަތު އޮތުމުންނެވެ.
މިދިޔަ ހަފްތާގައި ރަޝިއާއިން ވަނީ ޔޫރަޕްގެ ދެ ވަނައަށް އެންމެ ބޮޑު ނިޔުކްލިއާ ފެސިލިޓީއަށް ހަމަލާދީ އެ ތަން ވެސް ހިފާފަ އެވެ. ޔޫކްރެއިންގެ ޒަޕޮރިއްޒިޒިއާ ފެސިލިޓީ ހިފުމާ އެކު ޔޫކްރެއިން ސަރުކާރުން ބުނީ ރަޝިއާއިން "ނިޔުކްލިއާ ޓެރަރިޒަމް"ގެ އަމަލުތައް ހިންގަމުންދާ ކަމަށެވެ.
