ވޮޝިންޓަން، އެމެރިކާ (މާޗް 9) - ޔޫކްރެއިނަށް ނޭޓޯގެ މެމްބަރުކަން ހޯދަން މިހާރު މަސައްކަތް ނުކުރާ ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވެއްޖެ އެވެ.
ރަޝިއާއިން ޔޫކްރެއިނަށް އަރައި ހަނގުރާމައެއް ފަށާފައިވާ އިރު، ރަޝިއާގެ ރައީސް ލެޑިމިއަ ޕުޓިންގެ ޑިމާންޑުތަކުގެ ތެރޭގައި ހިމެނެނީ ޔޫކްރެއިނަށް ނޭޓޯގެ މެމްބަރުކަން ނުދިނުމެވެ.
ރަޝިއާއަށް ދޫދޭން ތައްޔާރަށް ހުންނެވިކަން ހާމަކުރުމުގެ ގޮތުން ޒެލެންސްކީ އެކަން އިއުލާން ކުރެއްވި އިރު، އިރުމަތީ ޔޫކްރެއިންގެ މައްސަލައިގައި ވެސް "ދޫދޭން" ތައްޔާރު ކަމަށް ޒެލެންސްކީ ވިދާޅުވި އެވެ.
އިރުމަތީ ޔޫކްރެއިންގައި 2014 ވަނަ އަހަރުން ފެށިގެން ހަނގުރާމަ ކުރަމުން ދަނީ ސަރުކާރުގެ ފައުޖާއި ރަޝިއާއަށް ތާއީދުކުރާ ގްރޫޕްތަކާ ދެމެދު އެވެ.
ރަޝިއާގެ ސިފައިން ޔޫކްރެއިނަށް އެރުމުގެ ކުރިން ޕުޓިން ވިދާޅުވީ އިރުމަތީ ޔޫކްރެއިންގެ ޑޮނެސްކް އަދި ލުހާންސްކް މިނިވަން ދައުލަތްތަކެއްގެ ގޮތުގައި ބަލައިގަންނަން ރަޝިއާއިން ނިންމާފައިވާ ކަމަށެވެ.
"އަޅުގަނޑު ވަރަށް ކުރިން ގޮތެއް ނިންމައިފިން... އެއީ ނޭޓޯއިން ޔޫކްރެއިނަށް މެމްބަރުކަން ދޭން ތައްޔާރު ނޫންކަން އެނގުނު ހިސާބުން،" އޭބީސީ ނިއުސްއަށް ދެއްވި އިންޓަވިއުގައި ޒެލެންސްކީ ވިދާޅުވި އެވެ.
"ހަމަނުޖެހުމެއް އުފެދިދާނެ ކަންކަމާ މެދު ނޭޓޯއިން ބިރު ގަނޭ. އަދި ރަޝިއާއާ ކުރިމަތިލުމަކަށް ދިޔުމާ މެދު ވެސް ނޭޓޯއިން ބިރު ގަނޭ."
ނޭޓޯއަކީ ފިނި ހަނގުރާމައިގެ ތެރޭގައި ސޯވިއެޓް ޔޫނިއަން (މިހާރުގެ ރަޝިއާ)ގެ ހަމަލާއަކުން ޔޫރަޕްގެ ގައުމުތައް ރައްކާތެރި ކުރުމަށް އެމެރިކާ އިސްވެ އޮވެ އުފެއްދި އަސްކަރީ ކޯލިޝަނެކެވެ.
ފަހަކަށް އައިސް ނޭޓޯއިން އިރުމަތީ ޔޫރަޕަށް ފުޅާވެ، ކުރީގެ ސޯވިއެޓް ޔޫނިއަންގެ ދަށުގައި އޮތް ބައެއް ގައުމުތަކަށް މެމްބަރުކް ދީފައިވެ އެވެ. އެކަމާ ރަޝިއާއިން ހިތްހަމައެއް ނުޖެހެ އެވެ.
