ވިއެނާ، އޮސްޓްރިއާ (މާޗް 8) - ޔޫކްރެއިންގެ ދެ ވަނައަށް އެންމެ ބޮޑު ސިޓީ ހާރްކީވްގައި ހަމަލާ ބަދަލުކުރުމުގެ ތެރޭގައި ނިޔުކްލިއާ ފެސިލިޓީއަކަށް ގެއްލުން ލިބިފައިވާ ކަމަށް އިންޓަނޭޝަނަލް އެޓޮމިކް އެނާޖީ އެޖެންސީ (އައިއޭއީއޭ) އިން ބުނެފި އެވެ.
ވިއެނާގައި ހުންނަ އދ. ގެ ނިޔުކްލިއާ ހަކަތައާ ގުޅޭ އިދާރާއިން ބުނީ ނިޔުކްލިއާ ފެސިލިޓީއަށް ގެއްލުން ލިބުނީ އާދީއްތަ ދުވަހު ކަމަށެވެ. ނަމަވެސް އެ ސައިޓުގައި ރޭޑިއޭޝަން ހުރި މިންވަރަށް އެއްވެސް ބަދަލެއް ނާންނަ ކަމަށް ބުންޏެވެ.
އެ ފެސިލިޓީއަކީ ހާރްކީވް އިންސްޓިޓިއުޓް އޮފް ފިޒިކްސް އެންޑް ޓެކްނޮލޮޖީގެ ބަޔެކެވެ. އެ ތަނުގެ ބޭނުމަކީ ސިއްހީ އަދި ސިނާއީ ކަންކަމަށް ރޭޑިއޯއެކްޓިވް މާއްދާ އުފެއްދުމެވެ.
ރަޝިއާގެ ސިފައިން ޔޫކްރެއިނަށް އަރައި ކުރަމުންދާ ހަނގުރާމައިގައި އެންމެ ބޮޑެތި ހަމަލާތަކެއް އަމާޒުވެފައި ވަނީ ހާރްކީވް އަށެވެ.
އައިއޭއީއޭއިން ބުނީ ޔޫކްރެއިންގެ ނިޔުކްލިއާ ފެސިލިޓީތަކުގައި ރައްކާތެރިކަމަށް ހުރަސް އެޅޭ ގިނަ ހާލަތްތަކެއް ހަނގުރާމައިގައި ފެންމަތިވަމުންދާ ކަމަށެވެ.
އެގޮތުން ޒަޕޮރިއްޒިޒިއާ ނިޔުކްލިއާ ޕްލާންޓަށް ދިން ހަމަލާއެއްގައި އެ ތަނުގައި ރޯވި އެވެ. ނަމަވެސް އެ ފަހަރު ވެސް ރޭޑިއޯއެކްޓިވް މިންވަރަށް ބަދަލެއް ނާންނަ ކަމަށް އައިއޭއީއޭއިން ބުންޏެވެ.
އޭގެ އިތުރުން ރޭޑިއޯއެކްޓިވް ކުނި ނައްތާލާ ފެސިލިޓީތަކަށް ވެސް ކިޔެވް އާއި ހާރްކީވްގައި ގެއްލުންވަމުންދާ ކަމަށް ބައެއް ރިޕޯޓުތައް ބުނެ އެވެ.
އައިއޭއީއޭއިން ބުނީ ޒަޕޮރިއްޒިޒިއާ ނިޔުކްލިއާ ޕްލާންޓް މިހާރު އޮތީ ރަޝިއާގެ ބާރުގެ ދަށުގައި ކަމަށެވެ. އެ ތަނަކީ ޔޫރަޕްގެ އެންމެ ބޮޑު ނިޔުކްލިއާ ހަކަތަ އުފައްދާ ފެސިލިޓީ އެވެ.
އައިއޭއީއޭއިން ރަޝިއާ އާއި ޔޫކްރެއިނަށް ގޮވާލީ ނިޔުކްލިއާ ފެސިލިޓީތައް ރައްކާތެރި ކުރެވޭނެ ގޮތެއް ރޭވުމަށެވެ.
