އެއާޕޯޓުން ދަތުރު ނަގަން މަސައްކަތްކުރި ބައެއް ޓެކްސީ ޑްރައިވަރުންނަށް ފުލުހުން "ޖެއްސުން" ކުރިކަމަށް ބުނެ ހިތްހަމަނުޖެހުން ފާޅުކުރުމުގެ ގޮތުން ބައެއް ޓެކްސީ ޑްރައިވަރުން ހުޅުމާލެ ރުއްގަނޑު ސަރަހައްދުގައި އިހްތިޖާޖުކުރަން ފަށައިފި އެވެ.
ގާތްގަނޑަކަށް 10-15 ޑްރައިވަރުން މިހާރު ހުޅުމާލޭގައި އިހްތިޖާޖުކުރަމުން ދަނީ އެމީހުން ބުނާ ގޮތުގައި އެއާޕޯޓުގައި ފުލުހުން އެމިހުންގެ މަސައްކަތަށް ހުރަސްއެޅުމުންނެވެ.
އެގޮތުން އެއާޕޯޓުގައި ދަތުރު ނަގަން މަސައްކަތްކުރަމުންދިޔަ ޑްރައިވަރުންގެ ކާރުތައް ހުއްޓުވައި ކަސްޓަމަރުން ކައިރިން ފުލުހުން އެކި ސުވާލުތައް ކުރިކަމަށް ޓެކްސީ ސެންޓަރެއްގެ އިސްވެރިޔަކު މި ނޫހަށް މައުލޫމާތު ދިނެވެ.
ހުޅުމާލެ ރުއްގަނޑު ސަރަހައްދަށް ބައެއް ޓެކްސީ ޑްރައިވަރުން އެއްވެގެން. އެމީހުން އިހްތިޖާޖުކުރަނީ ފުލުހުން މަސައްކތަށް ހުރަސްއަޅާތީވެކަމަށް ސެންޓަރަކުން މައުލޫމާތު ދިން. ފޮޓޯ: ސޯޝަލް މީޑިއާ
"ކިއުގަ ތިބޭއިރު ބައެއް މީހުން ފޮނުވާލާ. އަނެއްބައި މީހުން ދަތުރު ނަގަނިކޮށް ކަސްޓަމަރުން ކައިރީ ކިހާވަރަކަށްހޭ ދަތުރުކުރަނީ އަހާ. ބައެއް ކާރުތަކުގައި ކަޅު ބިއްލޫރި ހުރިކަމަށް ބުނެ ޖޫރިމަނާކޮށް. ޑްރައިވަރުންނަށް އުނދަގޫވެެ ޖެއްސުންކުރާ ކަންތައްތަކަކާހެދި އިހްތިޖާޖުކުރަނީ،" ނަން ހާމަނުކުރަން ޝަރުތުކުރަމުން އޭނާ ކިޔައިދިނެވެ.
އޭނާ އިތުރަށް ބުނީ އެއީ އެއްވެސް ސެންޓަރަކުން ރާވައިގެން ކުރާ ކަމެއް ނޫން ކަމަށެވެ. އަދި އެއީ ސެންޓަރަކުން އަންގައިގެން ޑްރައިވަރުން ކުރާ ކަމެއް ނޫންކަމަށް ވެސް އޭނާ ބުނި އެވެ. އަދި ޑްރައިވަރުންގެ ހިތްހަމަނުޖެހުން ހުރީ އެއީ ވަކި ބަޔަކަށް ވަކި ގޮތަކަށް ކަންކަން އޮންނާތީވެކަމަށް އޭނާ ބުނި އެވެ.
"ހަމަ ޕްރައިވެޓް ކިތައް ކާރުގަ ކަޅު ބިއްލޫރި ޖަހާފަ އޮންނަނީ؟ އެކަމަކު ކަމެއް ނުކުރޭ. ރީނދޫ ބޯޑު ޖަހާފަ ހުރީމަ މިހެން މި ހަދަނީ. މިއުޅެނީ އަދި އަޅުގަނޑުމެން އަގުބޮޑުކުރާކަށް ވެސް ނޫން. ވަގުތީ ގޮތުން ތެޔޮ ހަރަދަށް ބަލާފަ އަގުބޮޑުކޮށްދޭން އެދުނީ،" އޭނާ ބުނި އެވެ.
އެހެން ސެންޓަރެއްގެ އިސްވެރިޔަކު މި ނޫހަށް ބުނީ މިހާރު ސެންޓަރުތަކުން އަމިއްލަ އިސްނެގުމަށް ޓެކްސީތަކުގައި މީޓަރު ހަރުކުރަން މަސައްކަތް ފަށާފައިވާކަމަށެވެ. އަދި މިއަދު ސެންޓަރުތަކުގެ ވެރިން ޓްރާންސްޕޯޓު މިނިސްޓަރު އައިޝަތު ނަހުލާއާއި ބައްދަލުކޮށް، ޑްރައިވަރުންގެ ފަރާތުން އަގުތަކަށް ގެންނަން އެދޭ ބަދަލުތަށް ހުށަހަޅާފައިވާކަމަށެވެ.
"މިނިސްޓަރު ވިދާޅުވި އެ ދިރާސާކުރުމަށްފަހު އެކަމަށްޓަކައި ބައްދަލުވުމެއް ވެސް ބާއްވާނަމޭ. ދެން މިހާރު މީޓަރު ހަރުކުރުން ނޫން އިތުރު ގޮތެއް ނެތީމަ އެގޮތަށް މިދަނީ،" އޭނާ ބުނި އެވެ.
ޓެކްސީ ސެންޓަރުތަކުން ދަތުރުތަކުގެ އަގުބޮޑުކުރަން މަސައްކަތް ފެށީ ރާއްޖެއާއި ދުނިޔޭގެ ތެލުގެ ބާޒާރުގައި އަގުތައް މަތިވުމުގެ ސަބަބުންކަމަށް ޑްރައިވަރުން ބުނެ އެވެ.
އެގޮތުން މިއަދު މިނިސްޓްރީއަށް ޑްރައިވަރުން ހުށަހެޅި އަގުތަކުގައި މާލޭގެ އެތެރޭގެ ދަތުރުތަކުގެ އަގުތައް 30ރ. އަށް އިތުރުކުރަން ވަނީ ހުށަހަޅާފަ އެވެ. ނަމަވެސް ހުޅުމާލެ ފޭސް 1 އަދި ފޭސް 2 ގެ އެތެރޭގެ އަގުތަކަށް ބަދަލެއް ގެންނާކަށް ހުށައެއްނާޅަ އެވެ.
އޭގެ އިތުރުން ވެސް ބްރިޖު ހުރަސްކޮށް މާލެއިން ހުޅުމާލެއަށް ނަމަ 100ރ. އަދި މާލެއިން އެއާޕޯޓަށް ނަމަ 80ރ. ނަގަން ވަނީ ހުށަހަޅާފަ އެވެ. އަދި މާލެއިން ހުޅުލޭގެ ސީޕްލޭން ޓާމިނަލަށް ނަމަ 100ރ. ގެ ރޭޓުން ނެގުމަށް ވަނީ ހުށަހަޅާފަ އެވެ.
އަދި ހުޅުމާލެ އެއް ފޭސް އިން އަނެއް ފޭސްއަށް ދާނަމަ 40ރ. އަދި ހުޅުމާލެ ފޭސް ދެއަކުން އެއާޕޯޓުގެ ސީޕްލޭން ޓާމިނަލަށް ވެސް 120ރ. އަދި މާލެއިން ހުޅުމާލެ ފޭސް ދެއަކަށް ވެސް 120ރ. ނެގުމަށް ވަނީ ހުށަހަޅާފަ އެވެ.
ނަމަވެސް ޓްރާންސްޕޯޓު މިނިސްޓްރީން މީގެ ކުރިން ވަނީ އަގުތަކަށް ބަދަލުގެނައުމުގެ ވިސްނުމެއް އެ މިނިސްޓްރީއަކު ނެތްކަމަށް ބުނެފަ އެވެ. އަދި ފުލުހުން ވެސް ވަނީ ބޮޑު އަގުގައި ދަތުރުކުރާ ޓެކްސީތަކަށް ފިޔަވަޅު އަޅާނެކަމަށް މިއަދު ބުނެފަ އެވެ.
