ދަ ހޭގް، ނެދަލޭންޑްސް (މާޗް 7) - ރަޝިއާގެ ސިފައިން ޔޫކްރެއިނަށް އަރައި ފަށާފައިވާ ހަނގުރާމަ ވަގުތުން ހުއްޓާލުމުގެ އަމުރަކަށް އެދި އދ. ގެ އެންމެ މަތީ ކޯޓަށް ޔޫކްރެއިނުން ހުށަހެޅި މައްސަލައިގެ އަޑުއެހުމަށް ރަޝިއާއިން ހާޒިރެއް ނުވި އެވެ.
ރަޝިއާއިން އަޑުއެހުމަށް ހާޒިރު ނުވުމުން އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން ވަނީ ފާޑުކިޔާފަ އެވެ. ޔޫކްރެއިނުން ބުނީ ރަޝިއާގެ ފަޅީގައި ހުރި ހުސް ގޮނޑިތަކުން "ދެނީ އަޑުގަދަ މެސެޖެއް" ކަމަށެވެ.
ޔޫކްރެއިންގައި ކުރަމުންދާ ހަނގުރާމައާ ގުޅޭ އަވަސް މައްސަލައެއް އައިސީޖޭއަށް ހުށަހެޅީ ފެބްރުއަރީ 27 ވަނަ ދުވަހު އެވެ. ޔޫކްރެއިނުން ބުނީ އެ ގައުމުގެ އިރުމަތީގައި އޮންނަ ޑޮނެސްކް އަދި ލުހާންސްކްގައި ސަރުކާރުން ގިނަ އަދަދެއްގެ ބަޔަކު މަރަމުންދާ ކަމަށް ރަޝިއާއިން ދޮގު ތުހުމަތެއް ކުރި ކަމަށެވެ.
އެ ތުހުމަތުގެ ބޭނުން ހިފައި، ރަޝިއާއިން ބުނަމުން ދަނީ ޔޫކްރެއިންގައި ހަނގުރާމަ ފަށަން ޖެހުނީ ޑޮނެސްކް އަދި ލުހާންސްކްގައި އިންސާނިއްޔަތާ ހިލާފު ބޮޑެތި ޖަރީމާ ހިންގާތީ ކަމަށެވެ.
ނަމަވެސް ޔޫކްރެއިނުން ބުނީ "ޖަރީމާގެ އަމަލުތައް" ހިންގަން ރާވަމުން ދަނީ ރަޝިއާއިން ކަމަށާއި، ފެބްރުއަރީ 24 ވަނަ ދުވަހު ރައީސް ލެޑިމިއަ ޕުޓިން ފެއްޓެވި ހަމަލާތަކުން އެ މަންޒަރު ފެންނަ ކަމަށެވެ.
އެހެންވެ، ޔޫކްރެއިން ސަރުކާރުން ކޯޓުގައި އެދުނީ "އަސްކަރީ އޮޕަރޭޝަންތައް ވަގުތުން މެދުކަނޑާލުމުގެ" އަމުރެއް ރަޝިއާއާ ދެކޮޅަށް ނެރެދިނުމަށެވެ. މައްސަލައިގެ ހުކުމަކާ ހަމައަށް ދެވެންދެން އެ އަމުރު ދަމަހައްޓައިދިނުމަށް ވެސް އެދުނެވެ. ހުކުމަކާ ހަމައަށް ދިޔުމަށް އަހަރުތަކެއް ހޭދަވުން އެކަށީގެންވެ އެވެ.
ރަޝިއާގެ ސަފީރު އެލްގެޒެންޑާ ޝުލްގުން ކޯޓަށް ފޮނުއްވި ސިޓީއެއްގައި ވިދާޅުވީ ރަޝިއާއިން އަޑުއެހުންތަކުގައި ބައިވެރިނުވާނެ ކަމަށެވެ. އައިސީޖޭގެ ރައީސް ޖޮއާން ޑޮނޮހިޔު ވިދާޅުވީ ރަޝިއާގެ ނިންމުމާ މެދު ހިތާމަ ކުރާ ކަމަށެވެ.
ޔޫކްރެއިނުގެ ތުހުމަތުތަކަށް ރައްދު ދިނުމުގެ ފުރުސަތު ރަޝިއާއަށް ލިބޭނީ އަންގާރަ ދުވަހު އެވެ.
އައިސީޖޭ އުފެއްދީ ދެ ވަނަ ބޮޑު ހަނގުރާމައަށް ފަހު އދ. ގެ މެމްބަރު ގައުމުތަކުގެ މެދުގައި އުފެދޭ ހިޔާލު ތަފާތުވުން ހައްލު ކުރުމަށެވެ. އެ ކޯޓުގެ ނިންމުންތަކަށް ގާނޫނީ ގޮތުން އަމަލު ކުރަން ޖެހުނު ނަމަވެސް، އަމަލު ނުކުރާ ނަމަ ތަންފީޒު ކުރެވޭނެ ގޮތެއް ނޯވެ އެވެ.
