ވޮޝިންޓަން، އެމެރިކާ (މާޗް 7) - ރަޝިއާގެ ސިފައިންނާ ދެކޮޅަށް ހަނގުރާމަ ކުރުމަށް ދުނިޔޭގެ އެކި ގައުމުތަކުން 20،000 މީހުން ޔޫކްރެއިނަށް އެތެރެވެފައިވާ ކަމަށް އެ ގައުމުން ބުނެފި އެވެ.
"މިހާރު އަދަދު އުޅެނީ ގާތްގަނޑަކަށް 20،000 ގައި. ގިނައިން ހިމެނެނީ ޔޫރަޕްގެ ގައުމުތަކަށް ނިސްބަތްވާ މީހުން،" ފޮރިން މިނިސްޓަރު ޑިމިޓްރޯ ކުލެބާ ސީއެންއެންއަށް ދެއްވި އިންޓަވިއުގައި ވިދާޅުވި އެވެ.
"ދުނިޔޭގެ ގިނަ ބަޔަކު ރަޝިއާގެ އަމަލުތަކާ މެދު ނަފުރަތު ކުރޭ އެކަމަކު ނުކުމެ ހަނގުރާމަ ކުރަން ފަސްޖެހިފައި ތިބީ،" އޭނާ ވިދާޅުވި އެވެ.
"ޔޫކްރެއިންގެ މީހުން ހަނގުރާމަ ކުރާ މަންޒަރު ފެނި، ޔޫކްރެއިން މީހުން ދޫނުކުރާނެކަން ސާފުވުމުން، ގިނަ ބަޔަކަށް ހިތްވަރު ލިބިއްޖެ."
ހަނގުރާމައިގައި ސީދާ ބައިވެރިވާން ބޭނުންވުމުގެ ޝުއޫރުތައް ބަލައިގަންނަ ކަމަށް ވިދާޅުވެ، ކުލެބާ ފާހަގަކުރެއްވި ގޮތުގައި އެންމެ މުހިއްމީ "ސިޔާސީ، އިގްތިސާދީ އަދި އަސްކަރީ" އެހީ އެވެ.
"މިކަމުގައި އެމެރިކާގެ ލީޑާޝިޕް ބޭނުންވޭ. ފޯކަސް ކުރަންވީ ޔޫކްރެއިންގެ ވައިގެ ސަރަހައްދު ދިފާއު ކުރަން،" ކުލެބާ ވިދާޅުވި އެވެ.
ރަޝިއާ ސިފައިން ޔޫކްރެއިނަށް އަރައި ހަމަލާ ދޭން ފެށުމުން، އެހެން ގައުމުތަކުގެ ރައްޔިތުން ރަޝިއާއާ ދެކޮޅަށް ހަނގުރާމައިގައި ބައިވެރިވުމަށް ދައުވަތު ދެއްވީ ރައީސް ވޮލޮޑިމިރް ޒެލެންސްކީ އެވެ.
އެގޮތުން ޝައުގުވެރިވާ މީހުން ޔޫކްރެއިންގެ އެމްބަސީގައި ރަޖިސްޓްރީ ވާން ފުރުސަތު ހުޅުވާލި އެވެ. ޑެންމާކްގެ ރައްޔިތުންނަށް ހަނގުރާމައަށް ދިޔުމަށް ހުރަހެއް ނެތް ކަމަށް އާއްމުކޮށް ވަނީ އިއުލާނުކޮށްފަ އެވެ.
