ދަ ހޭގް، ނެދަލޭންޑްސް (މާޗް 7) - ރަޝިއާގެ ސިފައިން ޔޫކްރެއިނަށް އަރައި ދެމުންދާ ހަމަލާތައް ހުއްޓުވުމުގެ އަމުރަކަށް ޔޫކްރެއިނުން އދ. ގެ އެންމެ މަތީ ކޯޓުގައި އެދެފި އެވެ.
ޔޫކްރެއިންގައި ކުރަމުންދާ ހަނގުރާމައާ ގުޅޭ އަވަސް މައްސަލައެއް އެ ގައުމުގެ ސަރުކާރުން އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އަށް ހުށަހެޅީ ފެބްރުއަރީ 27 ވަނަ ދުވަހު އެވެ.
ޔޫކްރެއިނުން ބުނީ އެ ގައުމުގެ އިރުމަތީގައި އޮންނަ ޑޮނެސްކް އަދި ލުހާންސްކްގައި ސަރުކާރުން ގިނަ އަދަދެއްގެ ބަޔަކު މަރަމުންދާ ކަމަށް ރަޝިއާއިން ދޮގު ތުހުމަތެއް ކުރި ކަމަށެވެ.
އެ ތުހުމަތުގެ ބޭނުން ހިފައި، ރަޝިއާއިން ބުނަމުން ދަނީ ޔޫކްރެއިންގައި ހަނގުރާމަ ފަށަން ޖެހުނީ ޑޮނެސްކް އަދި ލުހާންސްކްގައި އިންސާނިއްޔަތާ ހިލާފު ބޮޑެތި ޖަރީމާ ހިންގާތީ ކަމަށެވެ.
ނަމަވެސް ޔޫކްރެއިނުން ބުނީ "ޖަރީމާގެ އަމަލުތައް" ހިންގަން ރާވަމުން ދަނީ ރަޝިއާއިން ކަމަށާއި، ފެބްރުއަރީ 24 ވަނަ ދުވަހު ރައީސް ލެޑިމިއަ ޕުޓިން ފެއްޓެވި ހަމަލާތަކުން އެ މަންޒަރު ފެންނަ ކަމަށެވެ.
އެހެންވެ، ޔޫކްރެއިން ސަރުކާރުން ކޯޓުގައި އެދުނީ "އަސްކަރީ އޮޕަރޭޝަންތައް ވަގުތުން މެދުކަނޑާލުމުގެ" އަމުރެއް ރަޝިއާއާ ދެކޮޅަށް ނެރެދިނުމަށެވެ. މައްސަލައިގެ ހުކުމަކާ ހަމައަށް ދެވެންދެން އެ އަމުރު ދަމަހައްޓައިދިނުމަށް ވެސް އެދުނެވެ. ހުކުމަކާ ހަމައަށް ދިޔުމަށް އަހަރުތަކެއް ހޭދަވުން އެކަށީގެންވެ އެވެ.
އައިސީޖޭގެ ރައީސް ޖޮއާން ޑޮނޮހިޔު މާޗް އެއް ވަނަ ދުވަހު ރަޝިއާއަށް ފޮނުއްވި "އަވަސް ލިޔުމެއްގައި" އެދުނީ ހަމަލާ ހުއްޓުމުގެ އަމުރެއް ނެރިއްޖެ ނަމަ ވަގުތުން ތަންފީޒު ކުރެވޭނެ ފަދަ ހާލަތެއް ގާއިމް ކުރުމަށެވެ.
އައިސީޖޭގެ ޕީސް ޕެލެސް.
މައްސަލައިގެ އަޑުއެހުން ހޯމަ ދުވަހު ފަށާނީ އައިސީޖޭގެ ޕީސް ޕެލެސް އޮފީހުގަ އެވެ. ހޯމަ ދުވަހު ޔޫކްރެއިނަށް ވާހަކަ ދައްކަން ފުރުސަތު ލިބޭއިރު، ރަޝިއާއަށް ފުރުސަތު ލިބޭނީ އަންގާރަ ދުވަހު އެވެ.
މައްސަލައާ ގުޅިގެން ރަޝިއާގެ ދިފާއު ހުށަހަޅާނީ ކޮން ގޮތަކަށް ކަމެއް ސާފެއް ނޫނެވެ. ދަ ހޭގްގައި ހުންނަ ރަޝިއާ އެމްބަސީން ވެސް އެކަމާ ގުޅޭ ގޮތުން ވަކި އެއްޗެއް ނުބުނެ އެވެ.
އައިސީޖޭ އުފެއްދީ ދެ ވަނަ ބޮޑު ހަނގުރާމައަށް ފަހު އދ. ގެ މެމްބަރު ގައުމުތަކުގެ މެދުގައި އުފެދޭ ހިޔާލު ތަފާތުވުން ހައްލު ކުރުމަށެވެ. އެ ކޯޓުގެ ނިންމުންތަކަށް ގާނޫނީ ގޮތުން އަމަލު ކުރަން ޖެހުނު ނަމަވެސް، އަމަލު ނުކުރާ ނަމަ ތަންފީޒު ކުރެވޭނެ ގޮތެއް ނޯވެ އެވެ.
